ޗައިނާގެ ޓެކްނޮލޮޖީ އަދި އީ-ކޮމާސް ދާއިރާގެ ބޮޑު ކުންފުންޏެއް ކަމަށްވާ އަލިބާބާ ގުރޫޕުން އެ ކުންފުނީގެ ފްލެގްޝިޕް އޭއައި މޮޑެލްގެ އަޕްގްރޭޑް ވާރޝަނެއް ކަމަށްވާ "ކުވެން 3" މި މަހު ނެރުމަށް ރާވަމުންދާ ކަމަށް ބްލޫމްބާގް ނިއުސްއިން ރިޕޯޓުކޮށްފި އެވެ.
މި އާ ވާޝަން ނެރުމަށް ރާވާފައިވަނީ އޭޕްރީލް މަހުގެ ފަހުކޮޅު ކަމަށް ވިޔަސް، މި ތާރީހަށް ބަދަލު އައުމަކީ އެކަށީގެންވާ ކަމެއް ކަމަށް ރިޕޯޓުގައި ބުނެފައި ވެއެވެ.
މިއަހަރުގެ ކުރީކޮޅު ޗައިނާގެ ޑީޕްސީކްއިން ނެރުނު އޭއައި މޮޑެލް ބާޒާރުގައި މަގުބޫލުވުމާ ގުޅިގެން، އޭއައި ކުންފުނިތަކުން އައު ޕްރޮޑަކްޓްތައް ނެރުމުގެ ވާދަވެރިކަން އިތުރުވެފައި ވެއެވެ. ޑީޕްސީކްއިން ނެރުނު މޮޑެލަކީ ހުޅަނގުގެ ވާދަވެރިންނާ އަޅާބަލާއިރު އަގު ހެޔޮކޮށް ތައްޔާރުކުރެވުނު މޮޑެލެއް ކަމަށް އެ ކުންފުނިން ބުނެފައި ވެއެވެ.
ޑީޕްސީކްގެ ކާމިޔާބީއަށް ޖަވާބު ދިނުމުގެ ގޮތުން އެންމެ އަވަހަށް އަމަލުކުރި ކުންފުނިތަކުގެ ތެރޭގައި އަލިބާބާ ހިމެނެ އެވެ. އެގޮތުން ޖެނުއަރީ މަހުގެ ފަހުކޮޅު އަލިބާބާއިން "ކުވެން 2.5-މެކްސް" ނަމަކަށް ކިޔާ އަޕްގްރޭޑް ވާރޝަނެއް ނެރެ، އެ މޮޑެލަކީ ޑީޕްސީކް-ވީ3 އަށްވުރެ ފެންވަރު މަތީ މޮޑެލެއް ކަމަށް ދައުވާކުރި އެވެ.
ޗައިނާގެ ގިނަ ރައްޔިތުން މަސައްކަތުން ދުރުގައި ތިބޭ ޗައިނީސް އައު އަހަރުގެ ފުރަތަމަ ދުވަހު "ކުވެން 2.5-މެކްސް" ނެރުމަކީ އާދަޔާ ހިލާފު ކަމެކެވެ. މިކަމުން ދައްކުވައިދެނީ ޑީޕްސީކްގެ ސަބަބުން ޗައިނާގެ އެހެން ވާދަވެރިންނަށްވެސް ކުރިމަތިވެފައިވާ ޕްރެޝަރެވެ.
އަލިބާބާއަކީ ޗައިނާގެ އެންމެ ބޮޑު އީ-ކޮމާސް އަދި ޓެކްނޮލޮޖީ ކުންފުނިތަކުގެ ތެރެއިން އެއް ކުންފުންޏެވެ. 1999 ވަނަ އަހަރު ޖެކް މާ އިން އުފައްދާފައިވާ މި ކުންފުނިން ވޭތުވެދިޔަ އަހަރުތަކުގައި އޭއައި ދާއިރާއަށް ބޮޑެތި އިންވެސްޓްމަންޓްތަކެއް ކޮށްފައި ވެއެވެ.
އަލިބާބާގެ "ކުވެން" ސީރީޒްގެ އޭއައި މޮޑެލްތަކަކީ ޗައިނާގެ އޭއައި ދާއިރާގައި އިސް ސަފުގައި ހިމެނޭ މޮޑެލްތަކެވެ. ނަމަވެސް، ފަހަކަށް އައިސް ޑީޕްސީކް ފަދަ އައު ކުންފުނިތަކުން ނެރެމުންދާ އައު ޓެކްނޮލޮޖީތަކާ ވާދަކުރުމަށްޓަކައި އަލިބާބާއިން އިތުރު މަސައްކަތްތަކެއް ކުރަމުންދާކަން ފާހަގަ ކުރެވެ އެވެ.
މި ދާއިރާގައި ކުރިއަރަމުން އަންނަ ވާދަވެރިކަމަކީ ޗައިނާގެ އޭއައި ޓެކްނޮލޮޖީ އިތުރަށް ތަރައްގީ ވުމަށް މަގުފަހިވާނެ ކަމެއް ކަމަށް ގިނަ ފަރާތްތަކުން ދެކެ އެވެ.