މައިކްރޯސޮފްޓުން އިއުލާނުކޮށްފައިވާ ގޮތުގައި، އެ ކުންފުނީގެ "މައިކްރޯސޮފްޓް ސެކިއުރިޓީ ކޯޕައިލެޓް" ނަމަކަށް ކިޔާ އާޓިފިޝަލް އިންޓެލިޖެންސް (އޭއައި) ސައިބަ ސެކިއުރިޓީ ޓޫލްއިން، އޯޕަން-ސޯސް ބޫޓްލޯޑާތަކުގައި ކުރިން ނޭނގޭ ސެކިއުރިޓީ މައްސަލަތަކެއް ހޯދައިފިއެވެ.
މި މައްސަލަތައް ހޯދާފައިވަނީ ގިނަ ލިނަކްސް ސިސްޓަމްތަކުގައި ބޭނުންކުރާ ޖީ.އާރް.ޔޫ.ބީ 2 (GRUB2) އަދި އެމްބެޑެޑް ސިސްޓަމްތަކާއި އިންޓަނެޓް އޮފް ތިންގްސް (އައި.އޯ.ޓީ) ޑިވައިސްތަކުގައި ބޭނުންކުރާ ޔޫ-ބޫޓް (U-Boot) އަދި ބެއަރބޮކްސް (Barebox) ބޫޓްލޯޑަރތަކުގައެވެ.
މައިކްރޯސޮފްޓުން މި މައްސަލަތައް ހޯދި ގޮތާއި އޭގެ ނުރައްކާތެރިކަމުގެ މިންވަރު ބަޔާންކޮށް ބްލޮގް ޕޯސްޓެއް ޝާއިއުކޮށްފައިވެއެވެ. މި ޕޯސްޓުގައި ބުނެފައިވާ ގޮތުގައި، ސެކިއުރިޓީ ކޯޕައިލެޓްއަކީ އޭއައި އަށް ބިނާކޮށްފައިވާ ސެކިއުރިޓީ އެނަލިސިސް ޓޫލްއެކެވެ. މި ޓޫލްގެ ބޭނުމަކީ އޮގަނައިޒޭޝަންތައް ސައިބާ ހަމަލާތަކުން ރައްކާތެރިކުރުމާއި ސެކިއުރިޓީ މައްސަލަތައް ހޯދުމެވެ.
ބޫޓްލޯޑަރަކީ އޮޕަރޭޓިން ސިސްޓަމް (އޯއެސް) ފެށުމުގެ ކުރިން ހިންގާ ކުޑަ ޕްރޮގްރާމެކެވެ. މީގެ މަސްއޫލިއްޔަތަކީ އޯއެސް މެމޮރީއަށް ލޯޑްކޮށް، ބޫޓް ޕްރޮސެސް ފެށުމެވެ. މައިކްރޯސޮފްޓުން މި މައްސަލަތަކުގެ މައުލޫމާތު ބޫޓްލޯޑަރތައް ބަލަހައްޓާ ފަރާތްތަކަށް ދީފައިވާ ކަމަށާއި، އެ ފަރާތްތަކުން މި މައްސަލަތައް ހައްލުކުރުމަށް ސެކިއުރިޓީ އަޕްޑޭޓްތައް ނެރެފައިވާ ކަމަށްވެސް މައިކްރޯސޮފްޓުން ބުނެފައިވެއެވެ.
މައިކްރޯސޮފްޓްގެ ތްރެޓް އިންޓެލިޖެންސް ޓީމުން އޭއައި ބޭނުންކޮށްގެން ޖީ.އާރް.ޔޫ.ބީ 2 ގައި 11 ސެކިއުރިޓީ މައްސަލަ ހޯދާފައިވެއެވެ. މީގެ ތެރޭގައި އިންޓެޖާ އޯވަފްލޯ، ބަފަރ އޯވަފްލޯ އަދި ކްރިޕްޓޮގްރަފިކް ސައިޑް-ޗެނަލް މައްސަލަތައް ހިމެނެއެވެ. މި މައްސަލަތަކުގެ ސަބަބުން ސައިބަރ ހަމަލާދޭ ފަރާތްތަކަށް ޔުނިފައިޑް އެކްސްޓެންސިބަލް ފާމްވެއާ އިންޓަފޭސް (ޔޫއީއެފްއައި) ސެކިއާ ބޫޓް ބައިޕާސްކުރެވިދާނެއެވެ. ސެކިއަރ ބޫޓްގެ ބޭނުމަކީ ބޫޓް ޕްރޮސެސްގައި ހުއްދަނެތް ކޯޑެއް ހިންގުން ހުއްޓުވުމެވެ.
ސެކިއުރިޓީ ކޯޕައިލެޓުން ޔޫ-ބޫޓް އަދި ބެއާބޮކްސްގައި 9 ސެކިއުރިޓީ މައްސަލަ ހޯދާފައިވެ އެވެ. މިއީ މައިގަނޑު ގޮތެއްގައި ސްކުއަޝްއެފްއެސް، އީ.އެކްސް.ޓީ 4، ކްރޭމްއެފްއެސް، ޖޭ.އެފް.އެފް.އެސް 2 އަދި ސިމްލިންކްސް ފަދަ ފައިލް ސިސްޓަމްތަކަށް އަސަރުކުރާ ބަފަރ އޯވަފްލޯ މައްސަލަތަކެކެވެ. މި މައްސަލަތައް އެކްސްޕްލޮއިޓް ކުރުމަށް ޑިވައިސްއަށް ފިޒިކަލް އެކްސެސް ބޭނުންވިޔަސް، ސެކިއުރިޓީ ރިސްކް އޮތްކަމަށް މައިކްރޯސޮފްޓުން ބުނެފައިވެއެވެ.
ޖީ.އާރް.ޔޫ.ބީ 2 ގެ މައްސަލަތަކުގެ ސަބަބުން ހަމަލާދޭ ފަރާތްތަކަށް ރިމޯޓްކޮށް ސްޓެލްތީ ބޫޓްކިޓްތައް އިންސްޓޯލްކުރެވިދާނެ ކަމަށް މައިކްރޯސޮފްޓުން ބުނެފައިވެއެވެ. މިފަދަ ބޫޓްކިޓްތަކަކީ އޮޕަރޭޓިންގ ސިސްޓަމް އަލުން އިންސްޓޯލްކުރުމުން ނުވަތަ ހާޑް ޑްރައިވް ބަދަލުކުރުމުންވެސް ނުފިލާ ދެމިހުންނަ އެއްޗެހިކަން ފާހަގަކޮށްފައިވެއެވެ.
ޖީ.އާރް.ޔޫ.ބީ 2، ޔޫ-ބޫޓް އަދި ބެއަރބޮކްސް ބަލަހައްޓާ ފަރާތްތަކުން މި މައްސަލަތައް ހައްލުކުރުމަށް ފެބްރުއަރީ މަހު ސެކިއުރިޓީ އަޕްޑޭޓްތައް ނެރެފައިވެއެވެ.
ބޭނުންކުރާ ސިސްޓަމްތައް ސައިބަރ ހަމަލާތަކުން ރައްކާތެރިވުމަށް، އެންމެ ފަހުގެ ވާޝަނަށް އަޕްޑޭޓްކުރުމަށް މައިކްރޯސޮފްޓުން އިރުޝާދު ދީފައިވެއެވެ.
މައިކްރޯސޮފްޓްގެ ކޯޕައިލެޓުން ބޫޓްލޯޑާތަކުގެ ސެކިއުރިޓީ މައްސަލަތަކެއް ހޯދައިފި މައިކްރޯސޮފްޓްގެ ކޯޕައިލެޓުން ބޫޓްލޯޑާތަކުގެ ސެކިއުރިޓީ މައްސަލަތަކެއް ހޯދައިފި
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ