ސިކުނޑިން ފޮނުވާ ސިގްނަލްތަކުން އެކަނި މެޝިންތައް ކޮންޓްރޯލްކޮށް، އާންމު ދިރިއުޅުމުގެ ކަންކަން ކުރެވޭނެ 'ބްރެއިން-ކޮމްޕިއުޓާ އިންޓަފޭސް' (ބީސީއައި) ޓެކްނޮލޮޖީ ކުރިއަށް އޮތް ތިނެއް ނުވަތަ ފަސް އަހަރު ތެރޭގައި ޗައިނާއިން އާންމުކުރާނެ ކަމަށް އެގައުމުގެ މާހިރުން ހާމަކޮށްފިއެވެ. މިއީ އިންސާނާގެ ސިކުނޑިއާއި ކޮމްޕިއުޓަރު ގުޅާލައިގެން، ހަމައެކަނި "ވިސްނާލުމުން" ތަފާތު އާލާތްތައް ހިންގުމަށް މަގުފަހިކޮށްދޭ އިންގިލާބީ ކުރިއެރުމެކެވެ. https://sun.mv/196953 ޗައިނާގެ ސަރުކާރުން މިހާރު ވަނީ މި ޓެކްނޮލޮޖީއަކީ އެ ގައުމުގެ މުސްތަގުބަލުގެ އެންމެ މުހިންމު އެއް 'ސްޓްރެޓީޖިކް' ސިނާއަތުގެ ގޮތުގައި ކަނޑައަޅާފައެވެ. މިއީ އާޓިފިޝަލް އިންޓެލިޖެންސާއި، 6ޖީ އަދި ނިއުކްލިއާ ފިއުޝަން ފަދަ ދާއިރާތަކާ އެއް ސަފެއްގައި ހިމެނޭ، އަދި އެމެރިކާގެ މަހުޖަނު އީލޮން މަސްކްގެ 'ނިއުރަލިންކް' އާ ވާދަކުރުމަށް ޗައިނާއިން ކުރަމުންދާ މަސައްކަތުގެ މުހިންމު ބައެކެވެ. ސިޗުއާން އިންސްޓިޓިއުޓް އޮފް ބްރެއިން ސައިންސްގެ ޑިރެކްޓަރު ޔާއޯ ޑެޒޮންގް ވިދާޅުވީ، ސަރުކާރުން ކަނޑައަޅާފައިވާ އައު ސިޔާސަތުތަކާއެކު، އަންނަ ތިނެއް ނުވަތަ ފަސް އަހަރު ތެރޭގައި މި ޓެކްނޮލޮޖީގެ އުފެއްދުންތައް އާންމު ހިދުމަތްތަކަށް ނެރެވޭވަރަށް ތަރައްގީވާނެ ކަމަށެވެ. މިހާރުވެސް ޗައިނާގެ އެކި ހޮސްޕިޓަލްތަކުގައި މިކަމަށް ހާއްސަ ލެބްތައް އުފައްދައި، މަސައްކަތްތައް ދަނީ ބާރުމިނުގައި ކުރިއަށެވެ. މިހާރު ކުރިއަށްދާ ކްލިނިކަލް ޓްރަޔަލްތަކުން ވަނީ ބޮޑެތި ކާމިޔާބީތަކެއް ފެނިފައެވެ. އެގޮތުން ވާގިނެތިފައިވާ މީހުންނާއި އަތްފައި ބުރިވެފައިވާ މީހުން، ސިކުނޑީގެ ބާރު ބޭނުންކޮށްގެން ރޮބޮޓިކް އަތްތަކާއި އިންޓެލިޖެންޓް ފުރޮޅުލީ ގޮނޑިތައް ކާމިޔާބުކަމާއެކު ހިންގާފައިވާކަން ފާހަގަކޮށްލެވެއެވެ. ޗައިނާގެ އަމާޒަކީ 2027 ވަނަ އަހަރާ ހަމައަށް މި ދާއިރާއިން ބޮޑެތި ފަންނީ ކުރިއެރުންތަކެއް ހޯދައި، 2030 ވަނަ އަހަރާ ހަމައަށް ދުނިޔޭގެ ފެންވަރުގެ 2 ނުވަތަ 3 ކުންފުންޏެއް މި ދާއިރާއިން އުފެއްދުމެވެ. ޔާއޯ އިތުރަށް ވިދާޅުވި ގޮތުގައި، ޗައިނާގައި އޮތް ބޮޑު އާބާދީއާއި، ހުނަރުވެރި ސައިންސްވެރިންގެ ސަބަބުން މި ދާއިރާއިން އެމެރިކާގެ ކުންފުނިތަކާ ވާދަކުރުމުގެ ފުރިހަމަ ގާބިލުކަން ޗައިނާއަށް އެބައޮތެވެ. އަދި އީލޮން މަސްކްގެ ނިއުރަލިންކް އިން ހާސިލްކުރާ ފަންނީ ކުރިއެރުންތައް، ޗައިނާގެ އެތެރޭގައިވެސް މިހާރު ކާމިޔާބުކުރެވެމުންދާ ކަމަށް އޭނާ ފާހަގަކުރެއްވިއެވެ.