މި އަހަރު މާލޭގައި ބާއްވަން ނިންމާފައިވާ ދެކުނު އޭޝިއާގެ ގައުމުތަކުގެ 20 އަހަރުން ދަށުގެ ފުޓްބޯޅަ މުބާރާތުގައި، ރާއްޖޭން ހަތަރު ޓީމު ވާދަކުރާ ގްރޫޕްގައި ލައްވާލައިފި އެވެ.
އެ ގޮތުން، ތައިލެންޑުގެ ބެންކޮކްގައި އިއްޔެ ކުރިއަށްގެންދިޔަ ގުރުއަތުލުމުގައި ރާއްޖެ ހިމެނޭ ގްރޫޕްގައި ދެން އޮތީ ނޭޕާލް، ބޫޓާން އަދި ސްރީ ލަންކާ އެވެ. އަދި، ގްރޫޕް ބީގައި ހިމެނެނީ، ބަންގްލަދޭޝް އާއި އިންޑިއާ އަދި ޕާކިސްތާން އެވެ.
ސާފްގެ އުމުރުފުރާ މުބާރާތެއް ފުރަތަަމަ ފަހަރަށް ރާއްޖޭގައި ހޯސްޓްކުރުމުގެ ފުރުސަތު ލިބިފައިވާއިރު، ސާފް 20 އަހަރުން ދަށުގެ މުބާރާތް ކުރިއަށްދާ ގޮތަށް އޭރު އިއުލާނުކޮށްފައިވަނީ މި އަހަރުގެ މާޗް މަހުގެ 22 އިން ފެށިގެން އޭޕްރީލް 3 ގެ ނިޔަލަށް ކަމަށެެވެ.
މުބާރާތް ހޯސްޓް ކުރުމުގެ ފުރުސަތު ލިބުމުން، އެފްއޭއެމް އިން އޭރު ބުނެފައިވަނީ، ސާފް އިން އެ ފެޑެރޭޝަނުގެ 20 އަހަރުން ދަށުގެ މުބާރާތް ރާއްޖޭގައި ބޭއްވުމުގެ ފުރުސަތު ދިނުމުން އެނގިގެންދަނީ، ބައިނަލްއަގުވާމީ ރަނގަޅު ލެވަލްގެ މުބާރާތެއް ރާއްޖޭގައި ހޯސްޓްކުރުމުގެ ގާބިލުކަން އެފްއޭއެމްގައި ހުރި ކަމަށް ސާފް އިން ގަބޫލުކުރުމާއި އެ ޖަމިއްޔާގެ އިތުބާރު ލިބިފައިވުން ކަމަށެވެ.
ރާއްޖޭގައި 2021 ވަނަ އަހަރު ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގެ ޗެމްޕިއަން އާއި ރަނަރަޕަށް ދޭން ޖެހޭ އިނާމް ފައިސާ އަށް ވާ 75000 ޑޮލަރު އެފްއޭއެމް އިން ވަނީ ދާދި ފަހުން ހަމަޖައްސައިފަ އެވެ.
އަނެއްކޮޅުން، ސާފް 20 އަހަރުން ދަށުގެ މުބާރާތަކީ، 2019 ވަަަނަ އަހަރުގެ ފަހުން ރާއްޖޭގައި ހޯސްޓްކުރާ އުމުރުފުރާ ގައުމީ ޓީމުގެ ފުރަތަމަ މުބާރާތެވެ. މީގެ ކުރިން، 2019 ވަނަ އަހަރުގެ ޖުލައި މަހު އައްޑޫ ސިޓީގައި ވަނީ، ޔުއެފާ އެސިސްޓް 15 އަހަރުން ދަށުގެ މުބާރާތެއް ބާއްވައިފަ އެވެ.
ރާއްޖޭން ހޯސްޓްކޮށްފައިވާ ބައިނަލްއަގުވާމީ އެހެން ފުޓްބޯޅައިގެ އިވެންޓްތަކަށް ބަލާއިރު، 2008 ވަނަ އަހަރާއި 2021 ވަނަަ އަހަރުގެ ސާފް ޗެމްޕިއަންޝިޕް ހޯސްޓްކޮށްފަ އެވެ. މީގެ ތެރެއިން، 2008 ގެ މުބާރާތް ހޯސްޓްކުރީ ސްރީ ލަންކާއާ ގުޅިގެންނެވެ. އެކަަމަކު، 2021 ވަނަ އަހަރުގެ މުބާރާތް އޮތީ މާލޭގަ އެވެ.
ރާއްޖޭގައި ބާއްވާފައިވާ ބައިނަލްއަގުވާމީ ގައުމީ ޓީމުތަކަށް ހާއްސަ، ފުޓްބޯޅަ މުބާރާތްތަކަށް ބަލާއިރު، 2000 ވަނަ އަހަރުގެ ގޯލްޑަން ޖުބިލީ، 2014 ގެ އޭއެފްސީ ޗެލެންޖް ކަޕް ވެސް ހިމެނެ އެވެ. އަދި، 2009 ގެ އޭއެފްސީ ޗެލެންޖް ކަޕްގެ ކޮލިފައިން މެޗުތައް ރާއްޖޭން ހޯސްޓްކުރިއިރު، ކްލަބް ފުޓްބޯޅައިގެ އިންޓަނޭޝަނަލް މުބާރާތްތަކުގެ މެޗުތައް ވެސް ރާއްޖޭން ވަނީ ހޯސްޓްކޮށްފަ އެވެ. އެ ގޮތުން، 2015 ވަނަ އަހަރުގެ ޕީޕަލްސް ކަޕްގެ އިތުރުން، ކޮވިޑް-19 އަށް ފަހު، އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ރާއްޖޭން ދެ ފަހަރެއްގެ މަތިން ސެންޓްރަލައިޒްކޮށް ހޯސްޓްކުރި އެވެ.