ރާއްޖޭގައި ޥޭޕު ބޭނުންކުރުން މަނާކުރިތާ ހަފުތާއެއް ތެރޭ, ވޭޕު ބޭނުންކޮށްގެން ނުވަ މީހަކު, ޖުމްލަ 50,000 ރުފިޔާގެ ޖޫރިމަނާ ކޮށްފައިވާ ކަމަށް ފުލުހުން ބުނެފިއެވެ.
އަލަށް އަަމަލުކުރަން ފެށި ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން, މި މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕު ބޭނުންކުރުމާއި, ގެންގުޅުމާއި ވިޔަފާރި ކުރުން އަދި ހިލޭ ބެހުން ވެސް ވަނީ މަނާކޮށްފައެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ މި މަހުގެ 22 ވަނަ ދުވަހުގެ ނިޔަލަށް ގާނޫނާ ޚިލާފުވެ, ވޭޕު ބޭނުންކުރި ނުވަ މީހަކު ޖޫރިމަނާ ކޮށްފައިވާ ކަމަށެވެ. އެއީ ޖުމްލަ 50,000 ރުފިޔާއެވެ. މި މީހުންގެ ތެރެއިން އެކަކު ވޭޕް ބޭނުންކޮށްފައިވަނީ ސައިކަލު ދުއްވަމުން ކަމަށާއި, އެހެންކަމުން އޭނާ 10,000 ރުފިޔާއިން ޖޫރިމަނާ ކޮށްފައިވާ ކަމަށް ފުލުހުން ބުންޏެވެ.
ސަރުކާރުން ވަނީ، ދުންފަތުންގެ ބާވަތެއް ވިއްކޭނެ އެންމެ ހަގު އުމުރަކީ 18 އަހަރުގެ ބަދަލުގައި 21 އަށް ހެދުމަށް ވެސް ނިންމާފައެވެ.