ބައެއް މީހުންނަށް ވިސްނިފައި އޮންނަނީ ﷲ ތަޢަލާއަށް ބިރުވެތިވާންވީ ހަމައެކަނި ލައްވަވައިފާނެ ކޯފާއަކަށް ކަމަށެވެ. އަހުރެން ބުނާނީ އަހުރެން އެންމެ ބޮޑަށް ބިރުގަންނަނީ ﷲ ތަޢާލާ ރުހިވޮޑިނުގަންނަވާ އަޅަކަސްވެދާނެކަމަށްޓަކައި ކަމަށެވެ. ﷲ ތަޢާލާ ރުހިވޮޑިނުގަންނަވާނެ އެއްވެސް ކަމެއް ނުކުރަން އަހުރެން ގަދައަޅައި މަސައްކަތްކުރަނީ އެހެންވެގެންނެވެ.  
އެކަމަކަށް އަހުރެން ޝައްކެއްވެސް ނުކުރަމެވެ. ކޮންމެ މުސްލިމަކުވެސް ބުނާނީ ތިމާއަކީ ﷲ ތަޢާލާއަށް ބިރުވެތިވާ މީހެއްކަމަށެވެ! އަހުރެންގެ ސުވާލަކީ ބިރުވެތިވެވެނީ ކިހައިވަރަކަށް ހެއްޔެވެ؟ ބިރުވެތިވެވޭކަން އެއްވެސް ވަރަކަށް ޢަމަލުން ދެއްކޭ ހެއްޔެވެ؟ އަހުރެން މިބުނެދެނީ ﷲ ތަޢާލާގެ ޙަޟްރަތަށް ބިރުވެތިވެވަޑައިގަންނަވާ މިންވަރު ރަސޫލް ޞައްލަﷲ ޢަލައިހި ވަސައްލަމަ ދެއްކެވި އެއްގޮތެވެ.  
ޢަބްދުﷲ ބިން ޝަޤީޤް (ރޢ) ވިދާޅުވެފައިވެއެވެ. "ރަސޫލް (ﷺ( ނަމާދުފުޅަށް ހުންނެވިއިރު، އިސްތަށިފުޅަށް ފެންބާލިދީއެއް އޮއްސައިލުމުން ތުނބުޅިފުޅުން ފެންފޮދު އޮހޮރޭނެފަދައިން ފެންފޮދު ފައިބަނިކޮށް ދެކެވަޑައިގަތީމެވެ.  
މިހައިވަރަށް ރަސޫލް (ﷺ) ކީރިތި ކުރެއްވެވީ ކޮން ކަމަކާއި ގުޅިގެންކަން އެނގޭހެއްޔެވެ؟ ޢަބްދުﷲ ބިން ޝަޤީޤް (ރޢ) ވިދާޅުވެފައިވަނީ "ﷲ ތަޢާލާއަށް ބިރުފުޅުން ކިރިތި ކުރެއްވެވުމުގެ ސަބަބުން ލޯފުޅުން ފައިބަމުންދިއަ ކަރުނަފޮދު ގިނަކަމުން" ކަމަށެވެ.
ރަސޫލް (ﷺ)އަކީ އެއްވެސް ފާފައެއް ކުރެއްވެވި ބޭކަލެއް ނޫނެވެ. އަދި ކުރެވޭނެ ފާފަތަކަށް ވެސް ﷲ ތަޢާލާ ވަނީ ޢަފޫކުރައްވަވައިފައެވެ. ސުވަރުގެ ލިބިވަޑައިގަންނަވާނެ ކަމުގެ ޔަޤީންކަން ވަނީ ﷲ ތަޢާލާގެ ޙަޟްރަތުން ލިބިވަޑައިގެންފައެވެ. އެހެންކަމާއިއެކުވެސް ﷲ ތައާލާއަށް ބިރުފުޅުގެން ވަޑައިގަންނަވާ މިންވަރު ޝަޤީޤް (ރޢ) ގެ ބަސްފުޅުން މިއޮތީ ވަރަށް ސާފުކޮށް ފެންނާށެވެ!  
ﷲ ތަޢާލާއަށް ބިރުވެތިވާކަމަށް އަހަރެމެން ބުނާއިރު އެތައް އަހަރެއް ވަންދެން އަހަރެމެން ދުނިޔޭގައި އުޅެފައިދާއިރު ﷲ ތައާލާއަށް ބިރުން ލޮލުން އެންމެ ކަރުނަ ތިއްކެއްނަމަވެސް ވައްޓައި ނުލެވޭނަމަ އެއީ ޤިޔާމަތް ދުވަހު ހިތާމަކުރަންޖެހޭނެ ކަމެކެވެ. އެހެނީ ﷲ ތަޢާލާއަށް ބިރުން އެންމެ ކަރުނަތިއްކެއްވެސް އަޅައިފިނަމަ އެމީހަކަށް ޤިޔާމަތް ދުވަހު ޢަރުޝީގެ ހިޔާވަހިކަން ދެއްވަވާނެތީއެވެ.  
ﷲ ތަޢާލާއަށް ބިރުވެތިވެ ލޮލުން ކަރުނައަޅަން ކިތަންމެ ވަރަކަށް ބޭނުންވިނަމަވެސް އެކަން ޙާޞިލްކުރެވޭނީ ހިތުގައި އީމާންކަން އެވަރަށް ވަރުގަދަކޮށްގެންނެވެ. ތަޤްވާވެރިކަން އިތުރުކޮށްގެންނެވެ. އެހެނީ ﷲ ތަޢާލާއަށް ބިރުވެތިވެވޭނީ އީމާންކަން ވަރުގަދަކޮށް ތަޤްވާވެރިކަން އިތުރުކުރިވަރަކުން ކަމުގައިވާތީއެވެ!  
ދެން ވިސްނައިލަންވީ މިކުރެވޭ ނަމާދަށެވެ! ނަމާދަކަށް ނަމާދެއްކޮށްގެން ހިތުގައި ﷲ ތަޢާލާއަށް ބިރުވެތިކަމެއް ނުއުފެއްދޭނެއެވެ. ހިތުގައި ބިރުވެތިކަން އުފެއްދޭނީ ތިމާ ޙާޟިރުވެ މިހުރީ ﷲ ތަޢާލާގެ ޙަޟްރަތުގައި ކަމާއި ތިމާކުރާ ޢަމަލުތަކާއި ކިޔާތަކެއްޗާއި އަދި ހިތަށް އަރާ ތަކެތިވެސް ﷲ ތަޢާލާ ދެނެވޮޑިގެންވާ ކަމާއި ތިމާއަށް ﷲ ތަޢާލާ ބައްލަވައި ވޮޑިގެންވާކަން ހިތްމައްޗަށް ގެނެސްގެން ނަމާދުކުރުމުންނެވެ.
 
- އިސްލާމީ ތިލަވަތުގެ ދަރުސަކުން