ހދ.ހަނިމާދޫ ޕޮލިސް ސްޓޭޝަނާއި ހަނިމާދޫ ކައުންސިލް އަދި ހަނިމާދޫ ސްކޫލްގުޅިގެން "ސްކޫލް ތަރައްގީގެ ޕްރޮގްރާމް" ގެ ނަމުގައި ޕްރޮގުރާމެއް ކުރިޔަށް ގެންގޮސްފި އެވެ.
މި މާރިޗު މަހުގެ 3 ން 5 އަށް ކުރިއަށް ގެންދިޔަ މި ޕްރޮގްރާމަކީ ހދ.ހަނިމާދޫ ކައުންސިލް އިދާރާއިން އިސްނަގައިގެން ފުލުހުންނާއި ހަނިމާދޫ ސްކޫލު ގުޅިގެން އެސްކޫލުގެ ދަރިވަރުންނާއި ބެލެނިވެރިންނާއި ޓީޗަރުންގެ އިތުރުން ހަނިމާދޫގައި ހުރި މުއައްސަސާތަކުގައި އިދާރީ މަސައްކަތްކުރާ މުވައްޒަފުންނަށް އަމާޒުކޮށްގެން ކުރިއަށް ގެންދިޔަ ޕްރޮގްރާމެށް ކަމަށް ފުލުހުން ބުނެއެވެ.
މި ޕްރޮގްރާމުގައި ބެލެނިވެރިންނަށް އަމާޒްކޮށްގެން ކުރިޔަށްގެންދިޔަ ކްލާސްތަކުގައި ދަރިން ތަރުބިއްޔަތު ކުރާނެ ޒަމާނީ ގޮތްތަކާއި ފުރާވަރުގެ ކުދިންނާއި މުއާމަލާތް ކުރަންވީގޮތާކާއި ބެހޭގޮތުން މަޢުލޫމާތު ދީފައިވާ ކަމަށާއި އަދި ސްކޫލް ދަރިވަރުންނަށް އަމާޒްކޮށްގެން ކުރިޔަށް ގެންދިޔަ ކްލާސްތަކުގައި ކާމިޔާބު ދަރިވަރަކަށް ވުމަށް ގެންގުޅެވިދާނެ އުކުޅުތަކާއި ކިޔެވުމުގެ މޮޅު ހުނަރުތަކުގެ އިތުރުން ދިވެހި އިމްތިހާނަށް ތައްޔާރުވުމުގެ ހުނަރުތަކާއި ބެހޭގޮތުން މަޢުލޫމާތު ދީފައިވާނެ ކަމަށްވެސް ފުލުހުން ބުނެއެވެ.
ޓީޗަރުންނަށް ކުރިޔަށްގެންދިޔަ ކްލާސްތަކުގައި އަމިއްލަ ނަފުސު ތާޒާކުރުމަށް ކުރެވިދާނެ ކަންތައްތަކާއި، ކިޔަވައި ދިނުމުގެ ހުނަރުތަކާއި ދިވެހި އިމްތިހާނަށް ދަރިވަރުން ތައްޔާރުކުރުމަށް ކުރެވިދާނެ ގޮތްތަކާއި ބެހޭގޮތުން މަޢުލޫމާތު ދީފައިވާނެ ކަމަށާއި އަދި މުއައްސަސާތަކުގެ އިދާރީ މުވައްޒަފުންނަށް ކުރިއަށް ގެންދިޔަ ކުލާސްތަކުގައި ޒާމާނީ މެނޭޖުމަންޓްގެ އަސާސްތަކާއި ކަންތައްތައް ރާވާ ހިންގުމުގައި ގެންގުޅެވިދާނެ ރަނގަޅު އުސޫލުތައް ކިޔައިދީފައިވާނެކަމަށް ފުލުހުން ބުނެއެވެ.
މި ޕްރޮގްރާމުގެ ބައިވެރިންނަށް ވަނީ ހިނިތުންވުމުގައި ހުރި އަޖައިބުތަކާއި، ރަގަޅު އިޖްތިމާއީ އަދަބުތަކާއި، ވަގުތު ހެޔޮގޮތުގައި ބޭނުން ކުރުމާއި ބެހޭގޮތުންނާއި، އަމިއްލަ ނަފުސް ތަރައްޤީކުރަން ކުރެވިދާނެ ކަންތައްކާއި ބެހޭތުންވެސް މަޢުލޫމާތު ދީފައި ކަމަށް ފުލުހުން ބުނެއެވެ.
މި ޕްރޮގްރާމުގައި ކްލާސްތައް ނަގައިދީފައިވަނީ ސިވިލް ސަރވިސް ކޮމިޝަނުގެ ރައީސް ޑރ.ޢަލީ ޝަމީމް އާއި އިސްލާމިކް ޔުނިވާރސިޓީ ގެ ލެކްޗަރަރ އާދަމް ނަސީރު އިބްރާހީމް އާއި ޙަސަން ޝިޔާމްއެވެ.
މިޕްރޮގްރާމްގައި 300 ބެލެނިވެރިންނާއި ، 179 ސްކޫލް ދަރިވަރުންނާއި، 41 ޓީޗަރުންނާއި އަދި ހަނިމާދޫގެ އެކިއެކި މުއައްސަސާތަކުގެ އިދާރީ 32 މުވައްޒަފުން ބައިވެރިވެފައިވާ ކަމަށް ފުލުހުން ބުނެއެވެ.
މިޕްރޮގްރާމް ކުރިޔަށް ގެންދިއުމަށް ހަނިމާދޫ ޕޮލިސް ސްޓޭޝަނުގައި މަސައްކަތްކުރާ ފުލުހުންނާއި ގުޅިގެންހ ހަނިމާދޫ ޔޫތު ސެންޓަރުން ވަރަށް ބޮޑު އެހީތެރިކަމެއް ދީފައިވާއިރު މި ޕްރޮގްރާމް ކުރިއަށް ގެންދިޔުމަށް ހަނިމާދޫގެ ބައެއް ވިޔަފާރި ވެރިންގެ ފަރާތުންނާއި އަމިއްލަ ފަރާތްތަކުގެ އެހީތެރިކަން ލިބިފައިވާކަން ފުލުހުން ހާމަކުރިއެވެ.