އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބުގެ ކަންކަމުގައި ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ފަހިވާގޮތަށް އިލެކްޝަންސް ކޮމިޝަނުން އަމަލުކުރަމުންދާ ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިއަދު ތުހުމަތުކޮށްފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީން ކައުންސިލް އިންތިހާބަށް ހަމަޖައްސާފައިވާ ތަރުޖަމާން، ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ ސަރުކާރުގެ ކެންޑިޑޭޓުންނަށް ފަހިވާ ގޮތަށް އިލެކްޝަނުން އަމަލުކުރަމުންދަނީ މިނިވަން އިންސާފުވެރި އިންތިހާބަކަށް ޖާގަ ނުދިނުމަށްޓަކައި ކަމަށެވެ.
"އިންތިހާބާ ގުޅިގެން ސަރުކާރުގެ ކެންޑިޑޭޓުންނަށް ފަހިވާ ގޮތަށް އެތައް މަސައްކަތެއް އިލެކްޝަނުން ކުރާކަމުގެ ތުހުމަތު އަޅުގަނޑުމެންނަށް އެބަކުރެވޭ. މިކަންކަން މިގޮތަށް ހިންގަވައިގެން ވަޑައިގަންނަވަން މި މަސައްކަތް ކުރައްވަނީ ސީދާ މިނިވަން އިންސާފުވެރި އިންތިހާބަކަށް ޖާގަ ނުދިނުމަށްޓަކައި," އޭނާ ވިދާޅުވި އެވެ.
ޕީއެންސީން އިލެކްޝަނުގެ ޑޭޓާއަށް އެކްސަސްވާ ކަމަށް އެމްޑީޕީން ތުހުމަތު ކުރުމުން، ޑޭޓާއަށް އެކްސަސްވެވޭނީ ހަމައެކަނި އިލެކްޝަންސް އިން ހުއްދަ ދޭ ބަޔަކަށް ކަމަށް އިލެކްޝަނުން ބުނެފައިވާކަން ފާހަގަކުރައްވާ ވަހީދު ވިދާޅުވީ ޕީއެންސީން ޑޭޓާތަކަށް އެކްސަސްވަނީ އިލެކްޝަނުގެ ހުއްދައާއެކުގައި ކަމަށެވެ.
އިލެކްޝަނުން ދަންނަވަނީ އެބޭފުޅުންގެ ހުއްދަ ނުދޭ ފަރާތަކަށް އެކަން ނުކުރެވޭނެ ކަމަށް. އަޅުގަނޑު މިދަންނަވަނީ ތިބޭފުޅުންގެ ހުއްދައާއެކީގައޭ ޕީއެންސީން އެކަން ކުރަމުން އެގެންދަނީ," އޭނާ ވިދާޅުވި އެވެ.
އިލެކްޝަނުން ކުރަމުން ގެންދާ ކަންތައްތައް ހުއްޓާލައި، މިނިވަން އިންސާފުވެރި އިންތިހާބެއް ކުރިއަށް ގެންދަން ޖާގަ ދިނުމަށް ވަހީދު ވަނީ ގޮވާލާފަ އެވެ.
ކައުންސިލް އިންތިހާބަށް ކުރިމަތިލުމަށް ދިމާވާ ކަންތައްތަކާ ގުޅިގެން ދަތިތައް ދިމާވާތީ، އެމްޑީޕީން ވަނީ އިންތިހާބަށް ކުރިމަތިލުމުގެ މުއްދަތު 10 ދުވަހަށް އިތުރުކޮށްދިނުމަށް އެދިފަ އެވެ.
އިންތިހާބަށް ކުރިމަތިލުމުގެ ފުރުސަތު ހުޅުވާލީ ފެބްރުއަރީ 1، ވާ އާދީއްތަ ދުވަހުގެ 15:00 ގެ ނިޔަލަށެވެ.
މި އަހަރު އިންތިހާބަށް ކުރިމަތިލާ މީހުން ހުރިހާ ލިޔެކިޔުންތަކާއި، އިދާރީ ފީ ދައްކަން މިފަހަރު ޖެހެނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. ހުށަހެޅުންތަކާމެދު ނިންމި ގޮތާއި ކެންޑިޑޭޓުންނަށް އަންގަންޖެހޭ އެންގުންތައް އިލެކްޝަނުން އަންގާނީ ވެސް ޕޯޓަލް މެދުވެރިކޮށެވެ.
އެޕްރީލް 4، ގައި ބާއްވާ އިންތިހާބުގައި ޖުމްލަ 225 ދާއިރާއަކުން، ލޯކަލް ކައުންސިލްތަކާއި ޑަބްލިއުޑީސީއަށް މެންބަރުން އިންތިހާބުކުރާނެ އެވެ. އިންތިހާބުގައި ވޯޓުލުމަށް ޖުމްލަ 621 ވޯޓު ފޮށި ބެހެއްޓުމަށް ވަނީ ނިންމާފަ އެވެ.