މިނެސޯޓާގެ މިނިއަޕޮލިސްގައި ބޭއްވި ޓައުން ހޯލް ބައްދަލުވުމެއްގައި ވާހަކަދައްކަވަމުން ގެންދަވަނިކޮށް، އެމެރިކާގެ ކޮންގްރެސް މެންބަރު އިލްހާން އުމަރަށް ގޮތް ނޭނގޭ ދިޔާ އެއްޗަކުން މީހަކު ހަމަލާދީފިއެވެ.
މި ހާދިސާ ހިނގާފައިވަނީ މިދިޔަ އަންގާރަ ދުވަހު، އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައި.ސީ.އީ) އުވާލުމަށް ގޮވާލައްވައި އިލްހާން ވާހަކަދައްކަވަމުން ގެންދަވަނިކޮށެވެ. ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، މި ހަމަލާގައި އިލްހާނަށް އެއްވެސް އަނިޔާއެއް ލިބިފައެއް ނުވެއެވެ. އަދި ހަމަލާދިން މީހާ ވަނީ ހައްޔަރުކޮށް، ދައުވާ އުފުލާފައެވެ.
ސީ-ސްޕޭން (C-SPAN) އިން އާންމުކޮށްފައިވާ ވީޑިއޯއިން ފެންނަ ގޮތުގައި، އިލްހާން ޕޯޑިއަމް ކައިރީގައި ހުންނަވައި އައި.ސީ.އީ އުވާލުމަށާއި، ޑިޕާޓްމަންޓް އޮފް ހޯމްލޭންޑް ސެކިއުރިޓީގެ ސެކްރެޓަރީ ކްރިސްޓީ ނޯމް އިސްތިއުފާ ދެއްވުމަށް ގޮވާލައްވަމުން ގެންދަވަނިކޮށް، މީހަކު ދުވެފައި އައިސް އޭނާއަށް ހަމަލާދެއެވެ. އެ މީހާ އިލްހާނަށް ހަމަލާދީފައިވަނީ ސިރިންޖެއް ބޭނުންކޮށްގެން ކަޅު ކުލައިގެ ދިޔާ އެއްޗެއް ޖަހައިގެންނެވެ. ހަމަލާދިން ވަގުތު އެ މީހާ "ކަލޭ އިސްތިއުފާ ދޭންޖެހޭނެ" ކަމަށް ބުނާ އަޑު އިވެއެވެ.
މި ހަމަލާއަށްފަހު އިލްހާން ވިދާޅުވީ، އޭނާގެ ހާލު ރަނގަޅު ކަމަށާއި، މިފަދަ ހަމަލާތަކުން އޭނާ ބިރު ނުގަންނާނެ ކަމަށެވެ. އަދި މިނެސޯޓާގެ ރައްޔިތުންނަކީ ވަރުގަދަ ބައެއް ކަމަށާއި، ކޮންމެ ފަދަ ހުރަހަކާ ކުރިމަތިލާން ޖެހުނަސް ސާބިތުކަމާއެކު ދެމިތިބޭނެ ކަމަށް ވިދާޅުވިއެވެ.
މި ހަމަލާއާ ގުޅިގެން ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. މިނިއަޕޮލިސްގެ މޭޔަރު ޖޭކޮބް ފްރޭ ވިދާޅުވީ މިއީ ބަލައިގަނެވޭނެ ކަމެއް ނޫން ކަމަށާއި، ސިޔާސީ ގޮތުން ޚިޔާލު ތަފާތުވިޔަސް ހަރުކަށި އަމަލުތަކަށް ޖާގަ ނުދެވޭނެ ކަމަށެވެ. އަދި ސައުތު ކެރޮލައިނާގެ މެންބަރު ނޭންސީ މޭސް ވެސް ވަނީ މި ހަމަލާ ކުށްވެރިކުރައްވާފައެވެ.
އިލްހާން އުމަރަކީ ސޯމާލިއާއަށް އުފަން، އެމެރިކާގެ ކޮންގްރެސްއަށް އިންތިޚާބުވި ފުރަތަމަ ދެ މުސްލިމް އަންހެނުންގެ ތެރެއިން އެކަކެވެ. އޭނާއަކީ އިޒްރޭލުން ގާޒާގައި ހިންގާ ގަތުލުއާންމާ ދެކޮޅަށް އަޑުއުފުއްލަވާ، އަދި ހިޖުރަވެރިންގެ ހައްގުތަކަށް ވަކާލާތުކުރައްވާ ބޭފުޅެކެވެ. މި ސަބަބުތަކަށްޓަކައި އެމެރިކާގެ ކޮންޒަވޭޓިވް ފަރާތްތަކުގެ ފާޑުކިޔުން އޭނާއަށް އަބަދުވެސް އަމާޒުވެއެވެ.