މާލޭ ސިޓީ ކައުންސިލުން ގޯމީޑިއާ އާއި ހަވާލުކޮށްގެން ރޭފެށި ނައިޓް މާކެޓް މޫސުން ގޯސްވެ ވައިގަދަވުމުގެ ސަބަބުން މިރޭ ނުބާއްވާ ގޮތަށް ނިންމައިފިއެވެ.
ގޯމީޑިއާއިން ބުނީ މިމަހުގެ 17 ވަނަ ދުވަހުގެ ނިޔަލަށް ކުރިއަށް ގެންދަން ހަމަޖެއްސި ނައިޓް މާކެޓް މިރޭ ނުބާއްވަން ހަމަޖެއްސީ މޫސުމާބެހޭ ގައުމީ އިދާރާއިން ޔެލޯ އެލާޓް ނެރެފައިވާތީ ކަމަށެވެ.
އަދި މިރޭ ނައިޓްމާކެޓް ނުބޭއްވި ނަމަވެސް މާދަމާ ރޭ އަނެއްކާވެސް ނައިޓް މާކެޓް ފަށާނެ ކަމަށާއި އަދި ކެންސަލްވާ ކޮންމެ ރެޔަކަށް ރެއެއް އިތުރު ކުރާނެ ކަމަށް ވެސް ގޯމީޑިއާ އިން މައުލޫމާތުދެ އެވެ.
މިރޭ ނައިޓް މާކެޓް ކެންސަލްކުރި އިރު ރޭ ދަންވަރުގެ ވަގުތެއްގައި އައި ކޮޅިގަނޑެއްގައި ނައިޓް މާކެޓްގައި ހުރި ގިނަ އަދަދެއްގެ ޓެންޓް ވަނީ ހަލާކުވެފައެވެ.
މޫސުން ގޯސްވުމުގެ ސަބަބުން މޫސުމާ ބެހޭ ގައުމީ އިދާރާ (މެޓް) އިން މިއަދު މެންދުރު 1:00 އިން ހަވީރު 5:00 އަށް ޔެލޯ އެލާޓް ނެރުނެވެ. ނަމަވެސް މިހާރު ވަނީ ވައިޓް އެލާޓަށް ދަށްކޮށްފަ އެވެ.
ޔެލޯ އެލާޓަކީ މޫސުން ގޯސްވުމުގެ ސަބަބުން ދެވޭ އިންޒާރުގެ ދެވަނަ ދަރަޖައެވެ.
ޔެލޯ އެލާޓް ނެރެނީ ވައިގެ ބާރުމިން ގަޑިއިރަކަށް 30 މޭލާއި 40 މޭލު ބާރުމިނަށް އެރުމުންނާއި، ބޯކޮށް ހުއްޓުމެއްނެތި ދެ ގަދިއިރަށްވުރެ ގިނައިރު ވާރޭ ވެހުމުން ނުވަތަ ކަނޑު ގަދަވުމުންނެވެ.
މޫސުމާއި ބެހޭ އިދާރާއިން ނެރުނު ޔެލޯ އެލާޓްގައި ބުނެފައިވަނީ އެވްރެޖްކޮށް 30 އާއި 40 މޭލުގެބާރު މިނުގައި ވައި ޖެހެމުންދާ ކަމަށެވެ.
އަދި މެދު ރާއްޖެ ތެރެއަށް 50 މޭލު ބާރު މިނުގައި ވައި ޖެހޭނެ ކަމަށް ވެސް ބުނެފައިވެ އެވެ.