ކުރިއަށް އޮތް ލޯކަލް ކައުންސިލް އިންތިޚާބަށް ނުފޫޒު ފޯރުވުމަށް މި ސަރުކާރުން ކުރާ ކަންކަން އެންޓި ކޮރަޕްޝަން ކޮމިޝަން (އޭސީސީ)އަށް ނުބެލޭ ކަމަށް، ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެންބަރު އަދި އެމްޑީޕީގެ ކެމްޕެއިން ތަރުޖަމާނު އަބްދުﷲ ވަޙީދު މިއަދު ވިދާޅުވެއްޖެއެވެ. އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ވަހީދު ވިދާޅުވީ، ވެރިކަން ކުރާ ޕާޓީ ޕީއެންސީ ތެރެއިން ފެންނަނީ ނުފޫޒާއި ބާރު ބޭނުންކޮށްގެން އިންތިޚާބު ކާމިޔާބުކުރުމަށް މަސައްކަތް ކުރަމުން ދާތަން ކަމަށެވެ. އެގޮތުން އިންތިޚާބާ ދިމާކޮށް ގޯއްޗާއި ފްލެޓު ދިނުމަށް މަސައްކަތްކުރަމުން ދާކަމަށާއި އެތައް 100 ވަޒީފާއެއްގެ ފުރުސަތު ހުޅުވާލާފައިވާ ކަމަށް އޭނާ ވިދާޅުވިއެވެ. ވަހީދު ވިދާޅުވީ ސަރުކާރުން ކުރަމުންދާ އެފަދަ އެއްވެސް ކަމެއް ބެލޭނޭ މުއައްސަސާއެއް މި ގައުމުގައި ނެތް ކަމަށެވެ. ސަރުކާރުން މި އިންތިޚާބަށް ނުފޫޒުފޯރުވަން ކުރާ އެއްވެސް ކަމެއްް މިއަދު އޭސީސީއަކަށް ނުފެނޭ. ނުބެލޭ. އެހެންވީމަ ސަރުކާރަށް މިއަދު ބޭނުން ގޮތަކަށް މަގާމްތަކަށް މީހުން ހޯދުމާއި، އަދި ސަރުކާރުން ބޭނުންވާ ގޮތަަށް ޕްރޮޖެކްޓުތައް ހިންގުމުގެ ޖާގަ މިއަދު އެބައޮތްދިއްދޫ ދާއިރާގެ ކުރީގެ މެމްބަރު އަބްދުﷲ ވަޙީދު ވަހީދު ވިދާޅުވީ، މި ސަރުކާރުން ލާމަރުކަޒީ ގާނޫނަށް ގެނައި އިސްލާހާއެކު ކައުންސިލްތަކުގެ މާލީ ބާރުވެރިކަން އެއް އަހަރަށް ހިފަހައްޓާފައިވާ ކަމަށެވެ. އޭނާ އިޝާރާތް ކުރެއްވީ، މިދިޔަ އޮގަސްޓް މަހުގެ 14 ވަނަ ދުވަހުގެރޭ ރައީސް ޑރ. މުހައްމަދު މުއިއްޒު ތަސްދީގުކުރެއްވި އިސްލާހަށެވެ. އެ އިސްލާހާއެކު، ކައުންސިލްތަކުގެ ދައުރު ހަމަވާ ފަހު އަހަރު، ވަރަށް ގިނަ ކަންކަން ނުކުރެވޭ ގޮތް ވަނީ ހަދައިފައެވެ. އެގޮތުން ކައުންސިލަށް މުވައްޒަފުން ނެގުމާއި، މަސައްކަތްތައް ހަވާލުކުރުމާއި، އެހެނިހެން މުހިންމު ކަންކަން ހިމެނެއެވެ. https://x.com/MDPSecretariat/status/2016400231353716980 ވަހީދު ވަނީ، ކަމާގުޅުންހުރި މުއައްސަސާތައް ގުޅިގެން ''ރީތި'' އިންތިޚާބެއް ބޭއްވުމުގެ ޖާގަ ދިނުމަށް ގޮވާލައްވައިފައެވެ. އަދި އެނޫން ގޮތަކަށް އިންތިޚާބު ބޭއްވުމަށް އެމްޑީޕީން ތާއީދު ނުކުރާނޭ ކަމަށްވެސް އޭނާ ވަނީ ވިދާޅުވެފައެވެ. ލޯކަލް ކައުންސިލް އަދި އަންހެނުންގެ ތަރައްގީއަށް މަސަައްކަތް ކުރާ ކޮމިޓީތަކުގެ އިންތިޚާބު ބާއްވަން ހަމަޖެހިފައިވަނީ އަންނަ އޭޕްރިލް މަހުގެ ހަތަރެއްގައެވެ. https://sun.mv/217024 އެ އިންތިޚާބަށް ކުރިމަތިލުމަށް ހުޅުވާލީ މިމަހުގެ 17ވަނަ ދުވަހެވެ. އެ ފުރުސަތު ހުޅުވާލީ އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށެވެ. އެމްޑީޕީން މީގެ ކުރިން ވަނީ، މެނުއަލްކޮށް ނުވަތަ ގަނޑުކޮށް ފޯމް ބަލައިގަތުމުގެ އިންތިޒާމް ހަމަޖެއްސުމަށް އިލެކްޝަންސް ކޮމިޝަނަށް މިދިޔަ ހޮނިހިރު ދުވަހު ގޮވާލައިފައެވެ. އަދި އިންތިޚާބަށް ކުރިމަތިލެވެނީ އިލެކްޝަންސް ކޮމިޝަން (އީސީ)ގެ ޕޯޓަލްއިން ކަމަށްވާއިރު، އެމްޑީޕީން ވަނީ އެ ޕޯޓަލުން މައުލޫމާތުތައް ބެލުމުގެ ބާރު ޕީއެންސީއަށް އޮންނަ ކަމަށް ތުހުމަތުކޮށްފައެވެ. ނަމަވެސް އެ ކޮމިޝަނުން ވަނީ އެ ތުހުމަތު ދޮގުކޮށްފައެވެ.