އޮސްޓްރޭލިއާއިން ކުޑަކުދިންނަށް ސޯޝަލް މީޑިއާ މަނާކުރުމަށް ނިންމި ނިންމުމާ އެއްގޮތަށް، އިންޑިއާގެ ބައެއް ސްޓޭޓްތަކުން ވެސް އެފަދަ ފިޔަވަޅުތަކެއް އެޅުމަށް ތައްޔާރުވާން ފަށައިފިއެވެ. މިގޮތުން އިންޑިއާގެ ހުޅަނގުގެ ސްޓޭޓެއް ކަމަށްވާ ގޯއާއިން މިހާރު ދަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރެވިދާނެ ގޮތްތަކެއް ދިރާސާ ކުރަމުންނެވެ. ގޯއާގެ އައިޓީ މިނިސްޓަރު ރޯހަން ކައުންޓޭ ވިދާޅުވި ގޮތުގައި، އޮސްޓްރޭލިއާއިން ފާސްކުރި ގާނޫނު އެ މިނިސްޓްރީން ދަނީ ބަލަމުންނެވެ. އަދި އެއާ އެއްގޮތަށް ގޯއާގައި ވެސް 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރަން މަސައްކަތް ކުރާނެ ކަމަށް އޭނާ ވިދާޅުވިއެވެ. https://sun.mv/217060 ގޯއާގެ އިތުރުން އަންދްރަ ޕްރަދޭޝް ސްޓޭޓުން ވެސް ވަނީ މިފަދަ ފިޔަވަޅެއް އެޅުމަށް ޝައުގުވެރިކަން ފާޅުކޮށްފައެވެ. އެ ސްޓޭޓްގެ އައިޓީ އަދި އެޑިއުކޭޝަން މިނިސްޓަރު ނާރާ ލޯކޭޝް ވިދާޅުވީ، ކުޑަކުދިން ސޯޝަލް މީޑިއާއިން ދުރުކުރުމަށް ވަރުގަދަ ގާނޫނީ އޮނިގަނޑެއް ބޭނުންވާ ކަމަށެވެ. އެ ސްޓޭޓުން ވަނީ މިކަމުގެ ގާނޫނީ އަދި އަމަލީ ދަތިތައް ދެނެގަތުމަށް މިނިސްޓަރުންގެ ކޮމިޓީއެއް ވެސް އެކުލަވާލާފައެވެ. މީގެ އިތުރުން، އިންޑިއާގެ މަދްރާސް ހައިކޯޓުން ވެސް ވަނީ މިދިޔަ ޑިސެމްބަރު މަހު، ކުޑަކުދިންގެ ރައްކާތެރިކަމަށްޓަކައި އޮސްޓްރޭލިއާއިން އަމަލު ކުރާ ފަދަ ހަރުދަނާ އުސޫލުތަކެއް ކަނޑައެޅުމަށް އިންޑިއާގެ މަރުކަޒީ ސަރުކާރަށް ބާރުއަޅާފައެވެ. ނަމަވެސް، މިފަދަ ނިންމުމަކީ ފޭސްބުކް، އިންސްޓަގްރާމް އަދި އެކްސް ފަދަ ބޮޑެތި ޓެކްނޮލޮޖީ ކުންފުނިތަކަށް ބޮޑު ގޮންޖެހުމަކަށް ވާނެ ކަމެކެވެ. އިންޑިއާއަކީ އެއް ބިލިއަނަށްވުރެ ގިނަ މީހުން އިންޓަނެޓް ބޭނުންކުރާ ގައުމަކަށް ވާއިރު، މީގެ ތެރޭގައި ގިނަ އަދަދެއްގެ ކުޑަކުދިން ހިމެނެއެވެ. މިކަމާ ގުޅޭގޮތުން މެޓާ ކުންފުނީގެ ތަރުޖަމާނަކު ބުނީ، ކުދިން ބޭނުންކުރާނެ އެޕްތައް ނިންމުމުގެ އިޚްތިޔާރު އޮންނަންވާނީ ސަރުކާރަށްވުރެ ބޮޑަށް ބެލެނިވެރިންނަށް ކަމަށެވެ. އަދި މިފަދަ ބޭންތަކުގެ ސަބަބުން ކުދިން ސަލާމަތީ ގޮތުން ރައްކާތެރިކަން ކުޑަ، އެހެން ސައިޓްތަކަށް ލެނބިދާނެ ކަމުގެ ބިރު އޮތް ކަމަށް ވެސް މެޓާއިން ބުނެއެވެ. ގާނޫނީ ތަޖުރިބާކާރުން ފާހަގަކުރާ ގޮތުގައި، އިންޑިއާގައި އިންޓަނެޓާ ގުޅޭ ގާނޫނުތައް ހެދުމުގެ ބާރު އޮންނަނީ މަރުކަޒީ ސަރުކާރަށެވެ. އެހެންކަމުން، ވަކިވަކި ސްޓޭޓްތަކުން މިފަދަ ބޭނެއް ތަންފީޒުކުރަން ބޭނުންވި ނަމަވެސް، އެކަން ކުރެވޭނީ މަރުކަޒީ ސަރުކާރުގެ އެހީތެރިކަމާ އެކުގައެވެ. އޮސްޓްރޭލިއާއިން މިހާރު ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާ ގާނޫނެއް ފާސްކޮށްފައެވެ. މި ގާނޫނަށް އަމަލުކުރަން ފެށީ 2025 ވަނަ އަހަރުގެ ޑިސެމްބަރު މަހުގައެވެ. އިންޑިއާގެ އިތުރުން ފްރާންސް، ސްޕެއިން އަދި އިންޑޮނޭޝިއާ ފަދަ ގައުމުތަކުން ވެސް ދަނީ މިފަދަ ފިޔަވަޅުތަކެއް އެޅުމަށް ދިރާސާ ކުރަމުންނެވެ.