އިންޑިއާގެ މަގުބޫލު ލަވަކިޔުންތެރިޔާ އަރިޖިތު ސިންގް ފިލްމުތަކަށް ލަވަކިޔުން ހުއްޓާލިކަން އިއުލާނުކުރިތާ މަހެއްހާ ދުވަސް ފަހުން އޭނާގެ ފުރަތަމަ އަމިއްލަ ލަވަ ރިލީޒްކޮށްފިއެވެ. ޝޭކަރް ރަވްޖިއާނީ ކޮމްޕޯޒްކޮށް، ޕްރިޔާ ސަރައިޔާގެ ޅެމަކަށް ތައްޔާރުކޮށްފައިވާ މި ލަވައިގެ ނަމަކީ "ރައިނާ"އެވެ. ފިލްމުތަކަށް ލަވަކިޔުން ހުއްޓާލި ނަމަވެސް އަރިޖިތުގެ އަމިއްލަ މިއުޒިކް އުފެއްދުންތަކާއި ލަވަތައް ރިލީޒްކުރާނެ ކަމަށް މީގެކުރިން ވެސް އޭނާ ވަނީ ސަޕޯޓަރުންނަށް ވައުދުވެފައެވެ. ކުޅަދާނަ މިއުޒީޝަން ޝޭކަރް ރަވްޖިއާނީއާ ގުޅިގެން އަރިޖިތު ނެރުނު އޭނާގެ ފުރަތަމަ އަމިއްލަ ސިންގަލް ޓްރެކް ރިލީޒްކޮށްފައި ވަނީ މިދިޔަ ހުކުރު ދުވަހެވެ. މި ލަވަ ރިލީޒްކުރުމާ އެކު އަރިޖިތުއަށް ސަޕޯޓުކުރާ ގިނަބަޔަކު ސޯޝަލް މީޑިއާގައި އުފާފާޅު ކުރަމުން ބުނީ އަރިޖިތު ފަދަ ދެވަނަ ލަވަކިޔުންތެރިއަކު ނެތް ކަމަށެވެ. އަރިޖިތު ސިންގް މިއުޒިކް ޝޯއެއް ދެނީ--ފޮޓޯ/މިންޓް ހަމައެއާއެކު އަރިޖިތުގެ އަމިއްލަ ލަވައެއް ބާޒާރަށް ނެރުނީ ލަވަކިޔުންތެރިޔާގެ އަޑުން އާ ލަވައެއް އިވޭނެ ދުވަހަކަށް ގިނަ ބަޔަކު އިންތިޒާރުކުރަމުން އަންނަނިކޮށް ކަމަށާއި ކުރިއަށް އޮތްތަނުގައި ވެސް އަރިޖިތުގެ އަޑު އިވޭނެކަމުގެ ޔަގީންކަން ސަޕޯޓަރުންނަށް ދީފި ކަމަށް ގިނަ ބަޔަކު ވަނީ ބުނެފައެވެ. އެހެންވެ އަރިޖިތު ފިލްމުތަކަށް ލަވަކިޔުން ހުއްޓާލިކަން އިއުލާނުކުރުމާ އެކު ލިބުނު މާޔޫސްކަން "ރައިނާ"އިން ފިލުވައިދީފި ކަމަށް ސަޕޯޓަރުން ވަނީ ބުނެފައެވެ. ފިލްމީ ލަވަކިޔުން ހުއްޓާލިކަން އިއުލާނުކުރުމަށްފަހު ސަޕޯޓަރަކު ކުރި ސުވާލަކަށް ޖަވާބު ދެމުން އަރިޖީތު ބުނެފައި ވަނީ، ކްލެސިކަލް މިއުޒިކަށް އޭނާގެ ހިތުގައި އޮތް ލޯބި ވަރަށް ބޮޑު ކަމަށެވެ. އެހެންވެ އެ މިއުޒިކް އުފެއްދުމަކީ މިހާރު ވަރަށް ބޮޑަށް އިސްކަންދޭ ކަމެއްގެ ގޮތުގައި އަރިޖިތު ވަނީ ސިފަކޮށްފައެވެ. އަރިޖީތު ދާދިފަހުން އެކްސްގައި ސަޕޯޓަރުންނާ މުޚާތަބުކޮށް ބުނެފައި ވަނީ، އާ މަސައްކަތްތައް ބަލައިގަތުން ހުއްޓާލި ނަމަވެސް، ކުރިން އެއްބަސްވެފައިވާ ގިނަ ލަވަތަކެއް ނިންމަން އެބަހުރި ކަމަށެވެ. މި ލަވަތައް ކުރިއަށް އޮތް މަސްތަކުގައި، އަދި ފަހަރުގައި އަންނަ އަހަރާ ހަމައަށްވެސް ރިލީޒްވަމުންދާނެ ކަމަށް އޭނާ ވަނީ ބުނެފައެވެ. އެގޮތުން އެކްޓަރު އާމިރު ޚާންގެ ފިލްމު ކުންފުނިން ގެނެސްދޭ "އޭކް ދިން"ގެ ޓައިޓްލް ލަވައިގެ މަސައްކަތް ނިންމާލުމާ އެކު އެ ކުންފުނިން ވަނީ އަރިޖިތުގެ އަޑުން ކިޔައިދީފައިވާ އެ ލަވަ އާއްމުކޮށްފައެވެ.