ޚަތިމުތައް އުކައިލައި، ފުރުޤާނު މިސްކިތަށް ގެއްލުންދިންކަމުގެ ތުހުމަތުގައި ކުރިން ހައްޔަރުކޮށްފައިވާ މީހަކު، ރޯދަ މަހު ދުވާލު ކައިގެން އަނެއްކާ ވެސް ހައްޔަރުކޮށްފިއެވެ. ފުރުޤާން މިސްކިތަށް ގެއްލުންދިން މައްސަލައިގައި ކުރިން ހައްޔަރުކޮށް، އަދި މި ރޯދަ މަހު ދުވާލު ކައިގެން ހައްޔަރުކޮށްފައިވަނީ ގ. މާލެހިޔާ 2 13-02 ނައުޝާދު މޫސާއެވެ. އޭނާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް 15 ދުވަސްވަނީ ޖަހައިފައެވެ. ބަންދު މަޖިލީހަށް ހާޒިރުކުރުމުން އެއްވެސް ވާހަކައެއް ދައްކަން ބޭނުން ނުވާ ކަމަށް ނައުޝާދު ބުނެފައިވާ ކަމަށް ބަންދު އަމުރު ރިޕޯޓުގައި ގާޒީ ފާހަގަކުރައްވާފައިވެއެވެ. ދެހާސް ސައުވީސްވަނަ އަހަރު ނައުޝާދު ހައްޔަރުކޮށްފައިވާ ކަމަށް ރެކޯޑްތަކުން ދައްކަނީ ފުރުޤާން މިސްކިތުގެ ހަތިމުތައް މުޅި ތަނަށް އުކާލައި، އިމާމު ހުންނަ ދިމާލުގައި ހުރި ކަރަންޓު ބޯޑުތަކާއި އެއަށް ޖަހާފައި ހުރި އެޑެޕްޓަރުތައް ހަލާކުކޮށްލާފައިވާ މައްސަލައިގައެވެ. އޭގެ އިތުރުން ފުރުޤާން މިސްކިތުގެ ވުޟޫ ކުރާ ބައިގެ ބައެއް އިސްކުރުތައް ވެސް އޭނާ ބިންދާލިކަމަށް އޭރުގެ ރިޕޯޓްތައް ބުނެއެވެ. ނައުޝާދަކީ މާލެއިން، މި ރޯދަ މަހު ދުވާލު ގަޑީގައި ކައިގެން ހައްޔަރު ކުރި ފަސްވަނަ މީހާއެވެ. ރޯދަ މަހުގެ ފުރަތަމަ ދުވަހު ވެސް މާލޭން، ދެ ފިރިހެނުން ދުވާލު ގަޑީގައި ކެއި މައްސަލައާ ގުޅިގެން ހައްޔަރުކޮށްފައިވެއެވެ. އޭގެ ތެރެއިން އެކެއްގެ ބަންދަށް 15 ދުވަސް ޖަހާފައިވާއިރު، އަނެއް މީހާގެ ބަންދަށްވަނީ ދިހަ ދުވަސް ޖަހައިފައެވެ. ދެވަނަ ދުވަހު ވެސް ދިވެހި ފިރިހެނަކު ދުވާލު ގަޑީގައި ކެއި މައްސަލައިގައި ހައްޔަރުކޮށްފައިވެއެވެ. އަދި އޭގެ ފަހުން ގދ. ވާދޫ މީހަކު ވެސް ދުވާލު ކައިގެން ހައްޔަރު ކުރިއެވެ. ރަމަޟާން މަހު ދުވާލުއިރު އޮއްސުމުގެ ކުރިން، ޝަރުޢީ އުޒުރެއް ނެތި އާންމު ތަންތަނުގައި ކައިބޮއެ ހެދުމަކީ ގާނޫނުލްއުގޫބާތުގެ ދަށުން ކުށެކެވެ. ދިވެހިރާއްޖޭގެ ގާނޫނުލްއުގޫބާތުގެ 611 ވަނަ މާއްދާގެ (ހ) ގެ (2) ވަނަ ނަންބަރުގައި ބަޔާންކޮށްފައިވާ ގޮތުގައި، އިސްލާމީ ޝަރީޢަތުގައި ރޯދަ ހިފުން ވާޖިބުވެގެންވާ މީހަކު، ރަމަޟާން މަހުގެ ދުވާލު ވަގުތެއްގައި އެއްވެސް ޝަރުޢީ އުޒުރެއް ނެތި އާންމު ތަނެއްގައި ކެއުމާއި، ބުއިމާއި ނުވަތަ ދުންފަތުގެ އިސްތިޢުމާލު ކުރުމަކީ ކުށެކެވެ. ގާނޫނުލްއުގޫބާތުގެ 611 ވަނަ މާއްދާގެ (ށ) ގައިވާ ގޮތުން އެއީ ޖުނަޙްގެ ތިން ވަނަ ދަރަޖައިގެ ކުށެކެވެ. ޖުނަޙްގެ ތިން ވަނަ ދަރަޖައިގެ ކުށަކަށް ދެވޭނެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ. ނަމަވެސް، ކުށުގެ ހާލަތަށް ރިއާޔަތްކޮށް އަދަބުގެ މިންވަރު ބަދަލުވުމުގެ ފުރުސަތު އޮވެއެވެ. އަދި ޖަލު އަދަބުގެ ބަދަލުގައި ޖޫރިމަނާ ނުވަތަ މުޖުތަމައަށް ފައިދާހުރި މަސައްކަތް ކުރުން ފަދަ އަދަބެއް ކަނޑައެޅުމުގެ އިޚްތިޔާރު ފަނޑިޔާރަށް ލިބިގެންވެއެވެ. ​މީގެ އިތުރުން، އިސްލާމް ދީނުގެ ޙުރުމަތް ކެނޑުމުގެ އަމަލެއްގެ ގޮތުގައި ބަލައި، ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ ދަށުންވެސް ފިޔަވަޅު އެޅިދާނެއެވެ.