ބިންވެރިޔާ ސްކީމްގެ ދަށުން ގޯތި ލިބިފައިވާ ކަމަށް އަންގައިދޭ ސައްހަ ނޫން ލިޔުންތަކެއް ބޭނުންކުރި ކަމުގެ ތުހުމަތުގައި ދައުވާ ކުރަން ފޮނުވި މީހުންގެ ތެރޭގައި ގައުމީ ޓީމުގެ ކުރީގެ ކުޅުންތެރިޔާ އަދި އެމްޑީޕީ ވެރިކަމުގައި ސްޓޭޓް މިނިސްޓަރުކަން ކުރެއްވި އަސްހަދު އަލީ (އަޑުބަރޭ)ވެސް ހިމެނިއްޖެއެވެ. ޕްރޮސެކިއުޓާ ޖެނެރަލް (ޕީޖީ) އޮފީހުން ބުނީ ބިންވެރިޔާ ސްކީމަށް ޝަރުތު ހަމަނުވާ ބަޔަކު ބިން ހޯދަން ހުށަހެޅި މައްސަލަ ކޯޓަށް މިހާރު ހުށަހަޅާފައިވާ ކަމަށެވެ. އަދި އެ މައްސަލައިގައި އަޑުބަރޭގެ މައްޗަށް ކުރަނީ، އެނގިހުރެ ސައްހަނޫން ލިޔުމެއް ދިނުމުގެ ކުށުގެ ދައުވާއެވެ. މި ދައުވާ ސާބިތުވެއްޖެނަމަ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް އަންނާނެއެވެ. އަޑުބަރޭއާއެކު އިތުރު އަށް މީހެއްގެ މައްޗަށް އެ ދައުވާ ވަނީ ކޮށްފައެވެ. އެއީ: ސ. ހިތަދޫ، ހަޒާރުމާގެ، މަރްޔަމް ސާއީ ދަފްތަރު. ނަންބަރު ރސ 9044، އައިޝަތު މައުރޫފާ ޏ. ފުވައްމުލައް، ދޫޑިގަން، ދިލް، އީމާ ވަހީދު ހުޅުމާލެ، ފްލެޓް ނަންބަރު 02-ޖީ- 46، މުހައްމަދު އާދަމް ހއ. ދިއްދޫ ޖަމީލާ، އަބްދުލްމަޖީދު މާހިރު މ. ވެސްޓްކޯސްޓް، ހުސައިން ޒާހިރު ޒައިނު މ. ފަޅުމަތީގެ، އަހުމަދު އަލީ މީގެ އިތުރުން ސައްހަ ލިޔުމެއް އުފެއްދުމުގެ ކުށުގެ ދައުވާ ވަނީ ގ. ޕޫލްބަހާރުއާގެ، އަހުމަދު އަތީގު އަބްދުالله އަދި ނ. ވެލިދޫ، ޑޭޒީމާގެ އަހުމަދު މާޒިންގެ މައްޗަށް ކޮށްފައެވެ. އެ ދައުވާ ސާބިތުވެއްޖެނަމަ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް އަންނާނެއެވެ. ހަމައެއާއެކު ސައްހަ ނޫން ލިޔުމެއް އުފެއްދުމުގައި ބައިވެރިވުމުގެ ކުށުގެ ދައުވާ، މ. ފަޅުމަތީގެ، އަރުޝަދު އަލީގެ މައްޗަށް ވަނީ ކޮށްފައެވެ. އެ ދައުވާ ސާބިތުވެއްޖެނަމަ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް އަންނާނެއެވެ. އަޑުބަރޭއަކީ ނިމުނު އެމްޑީޕީގެ ވެރިކަމުގައި ސްޓޭޓް މިނިސްޓަރެކެވެ. އޭނާ އެ މަގާމުން ވަކިކުރީ، ޖިންސީކުށުގެ ދައުވާތަކެއް ލިބޭ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖޭން ބޭރަށް ފޮނުވައިލުމުގައި ޖާމިނުވި އަޑޭގެ މައްޗަށް 15 ދުވަހުގެ ޖަލު ހުކުމެއް އިއްވުމުންނެވެ. އެއީ ކޯޓު ހުރުމަތް ކަނޑައިގެން އިއްވި ހުކުމެވެ. މާރާމާރީގެ މައްސަލައަކާ ގުޅިގެންވެސް އަޑުބަރޭގެ މައްޗަށްވަނީ ދައުވާ އުފުލައިފައެވެ. އެ މައްސަލައިގައި އަނިޔާއެއް ދިނުމާއި މުދަލަށް ގެއްލުން ދިނުމުގެ ދައުވާގެ އޮތީ ކްރިމިނަލް ކޯޓުގައެވެ.