މެޑްރިޑް (މާޗް 3) - ސްޕެނިޝް ލީގުގައި ރޭ ކުޅުނު މެޗުގައި ގެޓަފޭ އިން 1-0 އިން ރެއާލް މެޑްރިޑް ވަނީ ބަލިކޮށްފި އެވެ.
ރެއާލް މި ވަނީ 10 ދުވަސް ތެރޭ ސްޕެނިޝް ލީގުގައި ޖެހިޖެހިގެން ދެ މެޗުން ބަލިވެފަ އެެވެ. މި މެޗުގެ ކުރިން އެންމެ ފަހުން އޮސަސޫނާއާ ކުޅުނު މެޗުގައި ރެއާލް ވަނީ 2-1 އިން ބަލިވެފަ އެވެ. ރޭ ގެޓަފޭ އަތުން ވި ބައްޔާ އެކު، ރެއާލް އޮތީ ލީގުގެ އެއް ވަނައިގައި އޮތް ބާސެލޯނާ އަށް ވުރެން ހަތަރު ޕޮއިންޓް ފަހަތުގަ އެވެ.
ބާސެލޯނާ އަށް 26 މެޗުން 64 ޕޮއިންޓް ލިބިފައިވާއިރު، ރެއާލަށް 26 މެޗުން ލިބިފައިވަނީ 60 ޕޮއިންޓެވެ.
ކަކުލަށް ލިބިފައިވާ އަނިޔާއެއްގެ ސަބަބުން ރެއާލުން ރޭގެ މެޗުގައި ވެސް ކުޅުނީ ކީލިއަން އެމްބާޕޭ ނުލަ އެވެ. މި ސީޒަނުގައި ރެއާލަށް ހުރިހާ މުބާރާތެއްގައި އެންމެ ގިނަ ގޯލު ޖަހައިދީފައިވަނީ އެމްބާޕޭ އެވެ. ގެޓަފޭގެ ކީޕަރު ޑޭވިޑް ސޮރިއާ ވަނީ ރެއާލުން ރޭ ފޮނުވާލި ހަމަލާތައް ހުއްޓުވައިފަ އެވެ.
މެޗުގައި ފެނިގެންދިޔަ ހަމައެކަނި ލަނޑު، 39 ވަނަ މިނިޓްގައި ގެޓަފޭ އަށް ކާމިޔާބުކޮށްދިނީ ވޮލީއަކުން މާޓިން ސަޓްރިއާނޯ އެވެ. އެ ބޯޅަ ހުއްޓުވަން ރެއާލްގެ ކީޕަރު ތިބައު ކޯޓުއާ ކުރި މަސައްކަަތް ކާމިޔާބެއްނުވި އެވެ.
ރެއާލާއި ގެޓަފޭ އިން ވެސް މެޗު ނިންމާލީ ކުޅުންތެރިއަކު މަދުކޮށެވެ. އެ ގޮތުން، ރެފްރީއާ ދިމާލަށް ބޭއަދަބީބަހުން މުހާތަބުކުރުމުން، ރެއާލްގެ ފްރާންކޯ މަސްޓަންޓޫނޯ އަށް ރަތް ކާޑެއް ދެއްކިއިރު، ވަގުުތު ބޭކާރު ކުރަން އުޅުމުން، ގެޓަފޭގެ އެޑްރިއަން ލީސޯ އަށް ވަނީ ދެ ވަނަ ރީނދޫ ކާޑާ އެކު، ރަތެއް ދައްކައިފަ އެވެ.