ފިލްމީ ދާއިރާއިން ކުރިއަށްދާން ނިންމުމާއެކު ގިނަ ބަޔަކު އޭނާއަކީ މޮޔައެއް ކަމަށް ބުނެ ފާޑުކިޔުން އަމާޒުވި ކަމަށް ޒުވާން ބަތަލާ ޝާލިނީ ޕާންޑޭ ބުނެފިއެވެ. ދާދި ފަހުން ޕީޓީއައިއަށް ދިން އިންޓަވިއުއެއްގައި ވާހަކަދައްކަމުން ޝާލިނީ ހާމަކުރި ގޮތުގައި، އޭނާ ބޮޑުވަމުން އައިއިރު އެކްޓަރަކަށްވާން ބޭނުންވާ ވާހަކަ ބުނުމުން، އެކަންވީ އޭނާގެ ވަށައިގެން ތިބި އެންމެންނަށް ގަބޫލުކުރަން ދަތި ކަމަކަށެވެ. އެ ދުވަސްތަކުގެ ހަނދާންތައް ޝާލިނީ މުހިއްމު ރޯލެއް ކުޅެފައިވާ އެމެޒޯން ޕްރައިމް ވީޑިއޯގެ ވެބް ސީރީސް "ބޭންޑްވާލާ"ގައި ކުޅޭ ކެރެކްޓާއިން އާކޮށްދިން ކަމަށް ވެސް ބަތަލާ ވަނީ ބުނެފައެވެ. މި ސީރީސްގެ މަންޒަރެއްގައި ޝާލިނީ އޭނާގެ ބައްޕައާ ކުރިމަތިލާ މަންޒަރަކީ ވެސް މީގެކުރިން ތަޖުރިބާކުރި މަންޒަރެއް ކަމަށާއި އެ ތަޖުރިބާ އަލުން ތަހައްމަލު ކުރަން ޖެހުމުން ނަފުސާނީގޮތުން ސިކުނޑިއަށް ލުޔެއް ލިބުނު ކަމަށް ބަތަލާ ވަނީ ބުނެފައެވެ. ޝާލިނީ ޕާންޑޭ ފިލްމު "މަހާރާޖް"ގެ މަންޒަރެއްގައި-- ފޮޓޯ/ ޓެލެގްރާފްއިންޑިއާ މިހާރު މިނިވަން ބަތަލާއެއްގެ ގޮތުގައި މަސައްކަތް ކުރަމުން އަންނަ ޝާލިނީއަށް މިހާތަނަށް ފިލްމީ ކެރިއަރުގައި ލިބިފައިވާ ކުރިއެރުމާއި ކާމިޔާބީގެ ސަބަބުން ބައްޕަ އޭނާއާ މެދު ފަޚުރުވެރިވާ ކަމަށް ބަތަލާ ވަނީ ބުނެފައެވެ. ފިލްމީ ތަރިއަކަށްވުމަށް ކުރި އުއްމީދުތަކާއި ހުވަފެންތަކަށް އޭރު ޖޯކު ޖެހި މީހުންނަށް ވެސް މިއަދު ރަނގަޅު ޖަވާބެއް ދެވި ދިރިއުޅުމުގައި ކުރިއަށްދާން ބޭނުންވި ދާއިރާގައި ފައިތިލަ ސާބިތުކޮށްލެވުމަކީ އަމިއްލަ ނަފުސާ މެދުވެސް ފަޚުރުވެރިވާ ކަމެއް ކަމަށް ޝާލިނީ ވަނީ ބުނެފައެވެ. ފިލްމު "ރާހޫ ކެތޫ"އިން އެންމެ ފަހުން ބެލުންތެރިންނަށް ފެނުނު ބަތަލާގެ ފާހަގަކޮށްލެވޭ ފިލްމުތަކުގެތެރޭ 2024ގައި ރިލީޒްކުރި ފިލްމު "މަހާރާޖް" އަދި މިދިޔަ އަހަރު ނެޓްފްލިކްސްއިން ގެނެސްދިން ވެބް ސީރީސް "ޑައްބާ ކާޓެލް" ހިމެނެއެވެ.