އިޒްރޭލާއި އެމެރިކާއިން އީރާނާ ދެކޮޅަށް ފެށި ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު ރެކޯޑް އަދަދަކަށް އުފުލުމާ ގުޅިގެން، ރާއްޖޭގައި އެސްޓީއޯއިން ވިއްކާ ޕެޓްރޯލާއި ޑީސަލްގެ އަގު މިއަދުން ފެށިގެން ބޮޑުކޮށްފިއެވެ.
އެސްޓީއޯއިން ހާމަކުރި ގޮތުގައި، ޕެޓްރޯލް ލީޓަރަކުން 2.51 ރުފިޔާ ބޮޑުކޮށް މިހާރު ވިއްކާނީ 16.01 ރުފިޔާއަށެވެ. އަދި ޑީސަލް ލީޓަރަކުން 3.62 ރުފިޔާ ބޮޑުކޮށް، އާ އަގަކީ 17.54 ރުފިޔާއެވެ. މިއީ ޕެޓްރޯލުން 18.6 އިންސައްތަ އަދި ޑީސަލުން 26 އިންސައްތައިގެ ބޮޑުވުމެކެވެ.
އެސްޓީއޯގެ އިތުރުން ރާއްޖޭގައި ފުޅާދާއިރާއެއްގައި ތެޔޮ ވިއްކާ އަމިއްލަ ކުންފުންޏެއް ކަމަށްވާ ހޯކްސްއިން ވެސް ވަނީ އެސްޓީއޯއާ އެއް މިންވަރަކަށް ތެލުގެ އަގު ބޮޑުކޮށްފައެވެ. ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއްގެ އަގު މިހާރު ވަނީ 81 ޑޮލަރަށް އަރާފައެވެ.
ދިވެހިރާއްޖެއަކީ ބޭނުންވާ ތެޔޮ މުޅިންހެން ރާއްޖޭން ބޭރުން އިމްޕޯޓްކުރާ ގައުމަކަށް ވުމުން، ދުނިޔޭގެ ބާޒާރަށް އަންނަ ކޮންމެ ބަދަލެއްގެ ނޭދެވޭ އަސަރު ވަގުތުން ރާއްޖޭގެ ބާޒާރަށް ކުރެއެވެ. ޕެޓްރޯލާއި ޑީސަލްގެ އަގު މިހާ ބޮޑަށް އުފުލުމުގެ ސަބަބުން ދަތުރުފަތުރުގެ ޚަރަދުތަކާއި ކަރަންޓު އުފެއްދުމަށް ހިނގާ ޚަރަދު އިތުރުވެ، އޭގެ ސަބަބުން ރާއްޖޭގެ ބާޒާރުގައި މުދަލާއި ޚިދުމަތްތަކުގެ އަގު އުފުލިގެންދާނެ ކަމަށް ބެލެވެއެވެ..