މި ހިނގާ ޖޫން މަހުގެ 24 ވަނަ ދުވަހު ހުުޅުމާލެ ފްލެޓުތަކުން ކަރަންޓު ކެނޑުން އެކަށީގެންވާ ކަމަށް ސްޓެލްކޯ އިން ބުނެފިއެވެ.
ސްޓެލްކޯ އިން ބުނީ ހުޅުމާލޭގެ ދެވަނަ ފިޔަވަހީގެ ދާއިމީ ކަރަންޓު ޑިސްޓްރިބިއުޝަން ނެޓްވޯކްގެ މަސައްކަތް އަދިވެސް ނުނިމޭ ކަމަށާއި އެހެންވެ، ދެވަނަ ފިޔަވަހީގައި އަލަށް ކުރަމުންދާ އިމާރާތްތަކަށް ކަރަންޓު ފޯރުކޮށްދިނުމަށް އެ ކުންފުނިން ގާއިމްކޮށްފައިވާ ވަގުތީ ޑިސްޓްރިބިއުޝަން ނެޓްވޯކް އަޕްގްރޭޑް ކުރުމުގެ މަސައްކަތް ޖޫން 24 ވާ ހޮނިހުރު ދުވަހު ކުރުމަށް ނިންމާފައިވާ ކަމަށެވެ.
އެ ކުންފުނިން ބުނީ އެ މަސައްކަތް ކުރުމަށް ހިޔާ ޓަވަރު 1 އިން 8 އަށް ހެނދުނު 10 ން މެންދުރު 12 ޖެހުމާއި ހަމައަށް ކަރަންޓު ކެނޑިދާނެ ކަމަށެވެ. އަދި ޓަވަރު 9 ން 16 އަށް މެންދުރުފަހު 2 ން ހަވީރު 3:30 އަށް ކަރަންޓުގެ ހިދުމަތް މެދުކެނޑުމަކީ އެކަށީގެންވާ ކަމެއް ކަމަށެވެ.
ހުޅުމާލޭގައި ސްޓެލްކޯ އިން މި މަސައްކަތްކުރަމުން އަންނައިރު، މާލޭގެ ކަރަންޓު ވިއުގަ އަޕްގްރޭޑް ކުރުމުގެ މަސައްކަތް ވެސް ދޭތެރެދޭތެރެއިން އަންނަނީ ކުރަމުންނެވެ. އެގޮތުން މާލޭގެ އެކި އެސަރަހައްދުތަކުގައި އެކި ދުވަސްމަތީން އަންނަނީ ކުރަމުންނެވެ.
ކަރަންޓު ކެނޑުމާއި ގުޅިގެން އެ ވަގުތުތަކުގައި ދިމާވެދާނެ ދަތިތަަކަށް އެކުންފުނިން މައާފަށް އެދޭއިރު، މިފަދަ ކަންކަމުގައި ރައްޔިތުންގެ ފަރާތުން ލިބޭ ފުރިހަމަ އެއްބާރުލުން ފާހަގަކޮށް ވަނީ ރައްޔިތުންނަށް ޝުކުރު ވެސް އަދާކޮށްފައެވެ.