މަތީ ދަރަޖަ ހޯދާ ފަރާތްތަކަށް ރައީސް ދެއްވާ އިނާމަށް، ނަން ‏‏ހުށަހެޅުމުގެ ފުރުޞަތު މާދަމާ ހުޅުވާލަން އިނާމާބެހޭ ކޮމިޓީން ނިންމަވައިފިއެވެ.
މީގެ އިތުރުން ހާއްސަ ތަފުސީލް އިނާމާބެހޭ ކޮމިޓީން މާދަމާ ރައީސް އޮފީހުގައި ނޫސްވެރިންނަށް ދޭން ވެސް ވަނީ ނިންމާފަ އެވެ.
‏މި އިނާމު ދެނީ ރާއްޖެއަށް ރީތި ނަން ހޯދައިދޭ ފަރާތްތަކުގެ ‏‏ކާމިޔާބީ އާއި، ހިތްވަރާއި ހުނަރުން މަތީ ވަނަތައް ހޯދާ ފަރާތްތަކުގެ ކާމިޔާބީ އިޙްތިފާލު ކުރުމާއި، މިފަދަ ‏‏ކާމިޔާބީތައް ހޯދުމަށް ހިތްވަރު ދިނުމާއި، ރާއްޖެއަށް ބޭނުންވާ ދާއިރާތަކަށް ދިވެހިންގެ އުފެއްދުންތެރިކަމާއި ‏‏މަސައްކަތްތެރިކަން މިޞްރާބު ކުރުމަށެވެ.
‏
އިނާމު ދެނީ މަތީ ތަޢުލީމާއި ތަމްރީނުގެ ކޯހަކުން އެންމެމަތީ ވަނަ ހޯދުމާއި ބައިނަލްއަޤްވާމީ މައުރަޒަކުން ނުވަތަ މުބާރާތަކުން އަދު ނޫންވެސް ބައިނަލްއަޤްވާމީ ‏‏މިންކުރުމަކުން އެންމެމަތީ ވަނަ ނުވަތަ ޝަރަފު ހޯދުމާއި މަސައްކަތްތެރިކަމާއި އުފެއްދުންތެރި ކަމުގެ ރޮނގުން އާދަޔާ ޚިލާފު ކާމިޔާބީއެއް ޙާޞިލު ކުރުމާއި ސަރުކާރުން ކަނޑައަޅާ ފެންވަރަކަށް މަސައްކަތެއް ކުރުން ނުވަތަ އެއްޗެއް އުފެއްދުމެވެ.
‏މަތީ ދަރަޖަ ހޯދާ ފަރާތްތަކަށް ދޭ ޚާއްޞަ ‏‏އިނާމު މިހާރު ދެމުން ގެންދާ ދާއިރާތައް އިތުރަށް ފުޅާކުރައްވައި، ސަރުކާރުން ކަނޑައަޅާ ‏‏ފެންވަރަކަށް މަސައްކަތެއް ކުރުން ނުވަތަ އެއްޗެއް އުފެއްދުމުގެ ދާއިރާއިން ތަފާތު ބައިތަކުން ‏‏އިނާމަށް ފުރުޞަތު ހުޅުއްވާލެއްވުމަށް، ޚާއްޞަ އިނާމާބެހޭ ކޮމިޓީއާ ބައްދަލުކުރައްވައި ‏‏ރައީސުލްޖުމްހޫރިއްޔާ ވަނީ އެދިވަޑައިގެންފައެވެ. އެހެންކަމުން، އެކަމަށް ކޮމިޓީން ރިޢާޔަތް ‏‏ކުރައްވައި، ސަރުކާރުން ކަނޑައަޅާ ފެންވަރަކަށް މަސައްކަތެއްކުރުން ނުވަތަ އެއްޗެއް އުފެއްދުމުގެ ‏‏ގިންތިން މިއަހަރު ހަތަރު ދާއިރާއަކުން އިނާމު ދެއްވުމަށް ހުޅުއްވާލެއްވުމަށްވަނީ ނިންމަވާފައެވެ.