ޖުމުހޫރީ ޕާޓީގެ ޕާލަމެންޓް ގުރޫޕްގައި ހިމެނޭ ރައްޔިތުންގެ މަޖިލީހުގެ ބިލަތްދޫ ދާއިރާގެ މެމްބަރު އަހުމަދު މުބީނަށް މީހަކު ހަމަލާދީ މާރާމާރީ ހިންގައިފިއެވެ،
މުބީނަށް ހަމަލާދީފައިވަނީ މިރޭ ނުވައެއްޖަހާ އެހާކަން ހާއިރު މާފަންނު ބިސް ބުރު ކައިރީގައި ހުރި އެމްޑީޕީގެ ޖަޒްބާތު ޖަގަހަ ކައިރީގައި ހުރި ކެފޭގެ ދޮރުމަތީގައި ހުންނަވަނިކޮށެވެ. މުބީން ވިދާޅުވީ، ހަމަލާދިން މީހާ ގޮށްމުށްކަވާފައި މުބީންގެ ކަނާތު ކަންކަށި މަތީގައި ދެފަހަރަށް ޖެހި ކަމަށާއި، ޖެހިލެއް ބާރުކަމުން ބޮލަށް އެނބުރު އެރިކަމަށެވެ. އަދި ލޯ ކައިރިން މޫނުމަތި ދުޅަވެފައިވާ ކަމުގައިވެސް މުބީން ވިދާޅުވިއެވެ.
"އަޅުގަނޑަކަށް ނޭނގެ އެއީ ކާކުކަމެއް، ދެފަހަރަށް ޖަހާފައި އޭނާ ދިޔައީ، އަޅުގަނޑަކަށް ހިއެއް ނުވޭ ސީދާ އަޅުގަނޑު ގައިިގައި ޖަހަންވެގެން ހޯދައިގެން ޖެހީ ކަމަކަށް" މުބީން ވިދާޅުވިއެވެ.
މުބީން ވިދާޅުވީ، އެހާދިސާ ހިނގިތާ ކުޑައިރު ކޮޅެއްގެ ތެރޭގައި ފުލުހުން އައިސް ހަމަލާދިން ޒުވާނާ ހޯދި ކަމަށެވެ.
" ފުލުހުން އެހި އަޅުގަނޑު ގާތުގައި ދައުވާ ކުރަން ބޭނުންތޯ، އަޅުގަނޑު ދެންނެވިން ނޫނެކޭ. އަޅުގަނޑަކަށް ޤަބޫލެއް ނުކުރެވޭ ހައްޔަރުކޮށްގެން މިފަދަ ކަންކަން ހުއްޓުވޭނެ ކަމަކަށް" މުބީން ވިދާޅުވިއެވެ.
މުބީން ވިދާޅުވީ، އޭނާ އަބަދުވެސް ވަކާލާތު ކުރައްވަނީ ކުށުގެ ވެއްޓާއި ޒުވާނުން ދުރު ކުރެވޭނީ، ހަމައެކަނި ބަންދުކޮށް ހައްޔަރުކޮށްގެން ނޫންކަމަށާއި ދުރު ރާސްތާ ޕްލޭން ތަކެއް އެކުލަވާލައި އެއަށް އަމަލު ކުރެވިގެން ކަމަށެވެ.