ލޯކަލް ގަވަމަންޓް އޮތޯރިޓީ (އެލްޖީއޭ) އަށް އާންމުންގެ ތެރެއިން ކަނޑައަޅާ މެމްބަރަކަށް ގދ. ރަތަފަންދޫ ފިނިފެންމާގޭ ޝުޖާއު ހުސެއިންގެ ނަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
މަޖިލީހުގެ މިއަދުގެ ޖަލްސާގައި ޝުޖާއުގެ ނަން ފާސްކުރިއިރު، އެކަމަށް އެދި ހުށަހަޅާފައިވާ ތިން ނަމުގެ ތެރެއިން އޭނާ އަށް ލިބިފައި ވަނީ 84.5 ޕަސެންޓެވެ. އެލްޖީއޭގެ މެމްބަރުކަމަށް ޝުޖާއު ހަމަޖެއްސުމަށް ފާސްވީ މަޖިލީހުގެ ނެގި ވޯޓުގައި ބައިވެރިވެވަޑައިގެންނެވި 53 މެމްބަރުންގެ ތެރެއިން 52 މެމްބަރުންގެ އަޣުލަބިއްޔަތުންނެވެ.
އެލްޖީއޭގެ މެމްބަރު ކަމަށް ޝުޖާއު ހޮވުނުއިރު ގައުމީ ސަލާމަތުގެ ކޮމިޓީން ދިރާސާކޮށް އެންމެ މަތީ މާކްސް ލިބިވަޑައިގެންނެވި މޯލްޑިވްސް މީޑިއާ ކައުންސިލްގެ ކުރީގެ ރައީސް މުހަންމަދު ނަޒީފުގެ ނަން ވަނީ މަޖިލީހުގެ ތަޅުމުން ފޭލްވެފަ އެވެ. ކޮމިޓީން ނަޒީފަށް 95.3 ޕަސެންޓް ދީފައިވާއިރު އެލްޖީއޭގެ މެމްބަރުކަމަށް އޭނާ ހަމަޖައްސަން ފެނިވަޑައިގަންނަވާ ކަމަށް ވޯޓު ދެއްވީ ވޯޓުގައި ބައިވެރިވެވަޑައިގެންނެވި 42 މެމްބަރުންގެ ތެރެއިން އެންމެ 13 މެމްބަރުންނެވެ. ފެނިވަޑައިނުގަންނަވާ ކަމަށް 29 މެމްބަރަކު ވޯޓު ދެއްވިއިރު ވަކި ގޮތަކަށް ވޯޓު ނުދެއްވާ ފަސް މެމްބަރަކު ތިއްބެވި އެވެ.
އެލްޖީއޭގެ މެމްބަރުކަމަށް އައްޔަން ކުރުމަށް ޝުޖާއުގެ ނަން ފާސްވުމުން ތިންވަނަ ނަމަކަށް ވޯޓަކަށް ނާހަ އެވެ. އެލްޖީއޭގެ މެމްބަރުކަމަށް ކުރިމަތިލި އަނެއް ބޭފުޅަކީ ދަފްތަރު، އަހުމަދު ރަޝީދު ހުސެއިން އެވެ. އޭނާ އަށް ކޮމިޓީން ދިނީ 33.7 ޕަސެންޓެވެ.
އެލްޖީއޭގެ މެމްބަރުކަމަށް ކުރިމަތިލައްވާފައިވާ ބޭފުޅުންގެ ނަންތައް ދިރާސާކުރި ކޮމިޓީގެ ރިޕޯޓާ މެދު މަޖިލީހުގެ މިއަދުގެ ޖަލްސާގައި ވާހަކަ ދެއްކެވި ބައެއް މެމްބަރުން އެންމެ ކަންބޮޑުވެވަޑައިގަތީ ނަޒީފަށް އެންމެ މަތީ މާކްސް ދީފައި އޮތުމުންނެވެ.
މަޑަވެލި ދާއިރާގެ މެމްބަރު މުހަންމަދު ނާޒިމް ވަނީ ނަޒީފަކީ މީޑިއާ ކައުންސިލްގައި ހުންނެވި ދުވަސްވަރު އެ ތަނުގެ ފައިސާ ނަހަމަ ގޮތުގައި ނަންގަވައިގެން ދައުލަތް ކުރިމަތީގައި ގޮންޖައްސަވާފައިވާ ބޭފުޅެއް ކަމަށް ތުހުމަތުކުރައްވައިފަ އެވެ. އަދި ނަޒީފަށް އެންމެ މަތީ މާކްސް ކޮމިޓީން ދިން ގޮތާ މެދު ނާޒިމް ސުވާލު އުފެއްދެވި އެވެ. އަދި ނަޒީފު ފަދަ ބޭފުޅަކަށް އެންމެ މަތީ މާކްސް ދިނުމަކީ ލަދުވެތިވާން ޖެހޭ ކަމެއް ކަމަށް އޭނާ ވިދާޅުވި އެވެ.
ނާޒިމްގެ އެ ވާހަކައަށް އިޝާރާތް ކުރައްވައި ވިލިމާފަންނު ދާއިރާގެ މެމްބަރު އަހުމަދު ނިހާން ހުސެއިން މަނިކު ވިދާޅުވީ ނަޒީފަކީ މަޖިލީހުގެ ތަޅުމުގައި ޖަވާބުދާރީ ވެވެން ނެތް ބޭފުޅެއް ކަމަށާއި މީޑިއާ ކައުންސިލުން އޭނާ އިސްތިއުފާ ދެއްވި ހަގީގީ ސަބަބު ވެސް މެމްބަރުންނަށް އޮޅު ނުފިލާ ކަމަށެވެ. އަދި އެލްޖީއޭގެ މެމްބަރު ކަމަށް ހުށަހެޅުއްވި މެމްބަރުން މަޖިލީހުގައި "ކަތިލަން" އުޅޭ ނަމަ ބޭނުންވާ ކަންކަން ހާސިލް ނުވާނެ ކަމަށް އޭނާ ވިދާޅުވި އެވެ.
ނިހާން ވިދާޅުވީ ނަޒީފަކީ ވަރަށް އިހުލާސްތެރި، ތެދުވެރި އަދި އިސްލާމީ އުސޫލުތަކަށް ތަބާވާން ވަރަށް ފަރިތަ ބޭފުޅެއް ކަމަށެވެ.