ރިޔާސީ އިންތިޚާބުގެ ފުރަތަމަ ބުރުގައި ވޯޓު ލީ މީހުންގެ ލިސްޓު ޖުމްހޫރީ ޕާޓީ އަށް ދައްކާ ދުވަހަކީ އިލެކްޝަންސް ކޮމިޝަންގެ ބޭފުޅުން "އޮރިޔާމާ ނުކުންނަވަން ޖެހޭ ދުވަހެއް" ކަމަށް އުމަރު ނަސީރު ބުދަދުވަހުގެ ރޭ ވިދާޅުވެއްޖެ އެވެ.
ޖުމްހޫރީ މައި ޖަގަހާގައި ބޭއްވި ޖަލްސާގައި އޭނާ ތަކުރާރުކޮށް ވިދާޅުވީ ވޯޓުލީ މީހުންގެ ލިސްޓު ދައްކަން އިލެކްޝަންސް ކޮމިޝަނަށް ނުކެރޭނެ ކަމަށެވެ. އޭގެ މައިގަނޑު އެއް ސަބަބެއް ކަމަށް އުމަރު ވިދާޅުވީ ރާއްޖެ އިން ބޭރުގައި ދިރިއުޅޭ މީހުންގެ ތެރެއިން ވޯޓުލާން ރަޖިސްޓްރީ ނުކުރާ 10،000 މީހުންގެ ތެރެއިން އެތައް ބައެއްގެ ނަމުގައި ވަގު އައިޑީ ކާޑު ހައްދައިގެން، ރާއްޖޭގައި ބަހައްޓާފައިވާ ވޯޓު ފޮށިތަކަށް ވޯޓުލާފައި ވުމެވެ. އަދި އެކަން ޔަގީންކުރެވޭ ކަމަށް އުމަރު ވިދާޅުވި އެވެ.
"އަޅުގަނޑު މި ދަންނަވާ ވޯޓުލީ މީހުންގެ ލިސްޓު ފަތުރަން ނުކެރިގެން އުޅޭ މައިގަނޑު އެއް ސަބަބަކީ މިދަންނަވާ ސަބަބު،" އޭނާ ވިދާޅުވި އެވެ.
އުމަރު ވިދާޅުވީ މިހާރުގެ ޖީލުގައި ވޯޓު އޮޅުވާލުމަކީ ލާހިކު ކުޅަދާނަ ކަމެއް ނޫން ކަމަށާއި "އަޅުގަނޑުމެންގެ ހައްގު އަޅުގަނޑުމެން ހޯދާނަން" ކަމަށެވެ.
ވޯޓުލީ މީހުންގެ ލިސްޓު އިލެކްޝަންސް ކޮމިޝަނުން ކަނޑައަޅާ ގޮތެއްގެ މަތިން ޖުމްހޫރީ ޕާޓީ އަށް ދެއްކުމަށް ހައި ކޯޓުން ހުކުމްކޮށްފައިވެ އެވެ. އެހެން ނަމަވެސް ޖޭޕީން ބުނެފައި ވަނީ އެ ހުކުމާ އެއްގޮތަށް އެ ލިސްޓު ނުދެއްކި ކަމަށެވެ.
ޖޭޕީން ބުނާ ގޮތުގައި ދެ ގަޑިއިރަށް އެ ލިސްޓު ބަލަން މިދިޔަ ބުރާސްފަތި ދުވަހު އިލެކްޝަންސް އިން ފުރުސަތު ދިނީ އޭގައި އަތްލުމާއި ރަނގަޅަށް ބަލައި ޗެކްކުރުމުގެ ފުރުސަތު ނުދީ، ވަކިވަކި ނަންނަން ހުށަހަޅައިގެން ހަމައެކަނި އެ ނަންތައް ޗެކްކުރާ ގޮތަށް ކަމަށެވެ.
ހައި ކޯޓުން ކޮށްފައިވާ ހުކުމާ އެއްގޮތަށް ލިސްޓު ދައްކާފައި ނުވާ ކަމަށް ޖޭޕީން ބުނާ ވާހަކަ އިލެކްޝަންސް ކޮމިޝަނުން ވަނީ ދޮގުކޮށްފަ އެވެ.
އެހެން ނަމަވެސް އިންތިޚާބު ބާތިލްކޮށްދިނުމަށް އެދި ޖޭޕީން ސުޕްރީމް ކޯޓުގައި ކުރިއަށް ގެންދާ މައްސަލާގައި އެ ކޯޓުން ކުރި އަމުރަކާ ގުޅިގެން، އިލެކްޝަންސް ކޮމިޝަނުން މިހާރު ވަނީ ވޯޓުލީ މީހުންގެ ލިސްޓުތައް ސުޕްރީމް ކޯޓަށް ހުށަހަޅައިފަ އެވެ.
އުމަރު ވިދާޅުވީ ފުރަތަމަ ބުރުގެ ވޯޓުގެ ވަގުތީ ނަތީޖާ އިއުލާންކޮށް ނުނިމެނީސް ވެސް ވޯޓުލީ މީހުންގެ ލިސްޓް ދޭން އެދި އޭނާ އިސްވެ ހުންނަވައިގެން އިލެކްޝަންސް ކޮމިޝަނަށް ވަޑައިގެންނެވި ކަމަށެވެ. އަދި އެ ލިސްޓް އޭރު ދެއްކެން ނެތް ކަމަށާއި "ތިކަމާ ދޭތެރޭގައި ފަހުން އެއްޗެއް ބުނާނަން" ކަމަށް ކޮމިޝަނުން ބުނި ކަމަށް އުމަރު ވިދާޅުވި އެވެ.
"މިއަދާ ހަމައަށް ވެސް މި ދަންނަވާ ލިސްޓް ދައްކާލުމުގެ ގާބިލްކަން އިލެކްޝަންސް ކޮމިޝަނަކަށް އަދިވެސް ލިބިފައެއް ނެތް. އެކަމަކު ޑިމޮކްރެސީގެ ތެރޭގައި އަޅުގަނޑުމެން މަސައްކަތް ކުރާ ކަމަށް މިވަނީ ދެ ފުށް ފެންނަ ގޮތަށް ކަންތައްތައް ހިންގައިގެން ކަމަށް އެންމެން ވެސް ވަކާލާތުކުރޭ. އަޅުގަނޑުމެންގެ ލީޑަރު ވިދާޅުވިހެން 95،000 ވޯޓު ލިބުނު ކަމަށް ވަކާލާތުކުރާ މީހުންނަކަށް ]އެމްޑީޕީ[ ނުކެރުނު ބުނާކަށް އެ ލިސްޓް ދައްކާށެކޭ،" އޭނާ ވިދާޅުވި އެވެ.