އިންޑިޔާގެ ޓާޓާ ގްރޫޕުގެ ސަބްސިޑިއަރީ ކުންފުނި ޓާޓާ ޕަވަރ ކޮމްޕެނީއިން ކަރަންޓުގެ ޚިދުމަތް ހޯދާ އެޤައުމުގެ މަރުކަޒީ ސިޓީ މުމްބާއީގެ ބޮޑު ސަރަހައްދަކުން މިއަދު ކަރަންޓު ކެނޑިއްޖެ އެވެ.
ޓާޓާ ޕަވަރ ކުންފުންޏާ ހަވާލާދީ، ރޮއިޓަރސް އިންޑިޔާއިން ބުނީ، މިއަދު މުމްބާއީ ގަޑިން ހެނދުނު 09:45 ހާ އިރު މުމްބާއީގެ އެކި ސަރަހައްދުތަކުން ކަރަންޓު ކެނޑެން ފެށީ، އެ ކުންފުނީގެ ޕަވަރ ޔުނިޓަކަށް ދިމާވި ޓެކްނިކަލް މައްސަލައެއްގެ ސަބަބުން ކަމަށެވެ.
އަދި މިކަމުގެ ސަބަބުން މުމްބާއީގެ އެކި ސަރަހައްދުތަކާއި، ވިޔަފާރީގެ ބައެއް މަރުކަޒީ ޕޮއިންޓުތަކުން ވެސް ކަރަންޓު ކެނޑުނު ކަމަށް ޓާޓާއިން ބުނެ އެވެ.
ނަމަވެސް، މިކަން ދިމާވާން މެދުވެރިވި ސީދާ ސަބަބެއް ޓާޓާއިން ބުނެފައެއް ނުވެ އެވެ.
ޓާޓާއިން ވަނީ، ރޭގަނޑު އަނދިރިވުމުގެ ކުރިން ކަރަންޓުގެ ޚިދުމަތް އަލުން ދޭން ފެށުމަށް މަސައްކަތް ކޮށްފަ އެވެ.
ކަރަންޓު ކެނޑުނު ނަމަވެސް، މުމްބާއީ ސްޓޮކް އެކްސްޗޭންޖާއި ބޭންކްތަކަށް މިކަމުގެ އެއްވެސް ނޭދެވޭ އަސަރެއް ނުކުރާ ކަމަށް އެފަރާތްތަކުން ބުނެ އެވެ.
މުމްބާއީގެ ގިނަ އޮފީސްތަކުގައި މުވައްޒަފުން މަސައްކަތް ކުރަން ޖެހުނީ ކުޑަދޮރުތަކުން ވަންނަ އަލީގެ އެހީގައި، ހޫނު ގަދަކަމުގެ ތެރޭގައި އެވެ.
މުމްބާއީއަކީ، މިފަދަ ކަރަންޓުގެ މައްސަލަތައް ޢާންމުކޮށް ދިމާވެ އުޅޭ ސިޓީއެއް ނޫނެވެ.
ނަމަވެސް، ހަލުވިކޮށް އުފުލެމުން އަންނަ ކަރަންޓުގެ ޑިމާންޑާ ބައްދަލުވާ ޚިދުމަތެއް ދިނުމަށް އިންޑިޔާގެ ކަރަންޓު ކުންފުނިތަކުން އަންނަނީ ވަރަށް ބުރަކޮށް މަސައްކަތް ކުރަމުންނެވެ.