މަސްތުވާތަކެތީގެ ގާނޫނަށް މިހާރު ހުށަހަޅާފައިވާ ބިލުގައި އެފަދަ މައްސަލަތަކުގައި ކުށް ސާބިތު ނުވިޔަސް މީހުންގެ މުދާ ދައުލަތަށް ނެގޭ ގޮތަށް އޮތުމުން އައްޑޫ މީދޫ ދާއިރާގެ މަޖިލިސް މެންބަރު އަބްދުއްރަހުމާން އައްދު) ކަންބޮޑުވުން ފާޅުކުރައްވައިފި އެވެ.
މަޖިލީހުގެ މިއަދުގެ ޖަލްސާގައި އެ ބިލަށް ބަހުސް ކުރައްވަމުން މިނިވަން މެންބަރު ވިދާޅުވީ ކުށް ސާބިތު ނުވާ މީހެއްގެ މުދާ ދައުލަތަށް ނެގޭނެ އެއްވެސް ހަމައެއް އޮންނާނެ ކަމަށް ގަބޫލު ނުކުރައްވާ ކަމަށެވެ.
"އަޅުގަނޑުގެ ސިކުނޑިއަށް ގަބޫލު ނުކުރެވޭ މީހެއްގެ މުދަލެއް ދައުލަތަށް ނެގޭނެ އެއްވެސް ހަމައެއް ކުށް ސާބިތު ނުވެ އޮންނަން ވާނެ ކަމަށް، އަދި 151 ވަނަ މާއްދާގެ ހ. ގެ 10 ގައި ވާގޮތަށް އުޅަނދެއް ދައުލަތަށް ނެގޭ ނަމަ އޮޑިވެރިޔާގެ އެއްވެސް ބައިވެރިވުމެއް ހިއްސާއެއް ނެތް ކަމެއްގައި އޮޑި ދައުލަތަށް ނެގުމުގެ ފުރުސަތު ބޮޑު،" އައްދު ވިދާޅުވި އެވެ. "އަދި މި މާއްދާތައް ގާނޫނުއަސާސީގެ 40 ވަނަ މާއްދާއާ ހިލާފު ކަމަށް ވެސް އަޅުގަނޑަށް ފާހަގަކުރެވޭ."
އޭނަ ވިދާޅުވީ ގާނޫނުގައި މިހާރު އޮތް ގޮތުން ކޮންޓްރޯލްޑް ޑެލިވަރީ އޮޕަރޭޝަންތައް ހިންގައި ކުށް ސާބިތު ކުރުމަށް ވެސް ހުރަސްތަކެއް ހުރި ކަމަށެވެ. އެހެންވެ އެކަންކަމަށް ވެސް ހައްލު ހޯދައިދީ މިހާރަށް ވުރެ ފަސޭހައި ކޮންޓްރޯލްޑް ޑެލިވަރީ އޮޕަރޭޝަންތައް ހިންގޭނެ މަގެއް ގާނޫނުގެ ތެރެއިން ކޮށައިދޭން ޖެހޭ ކަމަށް ގަބޫލު ކުރައްވާ ކަމަށް ވިދާޅުވި އެވެ.
އައްދު ވިދާޅުވީ މި ބިލުން ހާސިލު ކުރަން ބޭނުންވާ މަގުސަދު ސާފު ނަމަވެސް އެ މަގުސަދު ހާސިލުވާނެކަމާ މެދު ސުވާލު އުފެދޭ ކަމަށެވެ.
"ގާނޫނު ތަންފީޒު ކުރެވޭނެ ތަނެއް ނުފެނޭ، އެ ކެޕޭސިޓީއެއް ނެތް އެ އިހުލާސްތެރިކަމެއް ނެތް. ފުރަތަމަ ކަމަކަށް އިސްލާހު ކުރަން އަންނަ މީހާ މި އަންނަނީ އިންތިހާބުތަކުގައި ވެސް މަސްތުވާތަކެއްޗާއި ފައިސާ ބަހައި ގޭންގު ހިންގުވައި ކޮރަޕްޝަން ހިންގައި މަގާމު ހޯދައިގެން،" އޭނަ ވިދާޅުވި އެވެ. "މިކަން ނުކޮށް ޕޮލިސީ މޭކަރުން މަގާމުތަކަށް އައި ދުވަހަކުން މެނުވީ މިކަން ހައްލު ވާނެ ތަނެއް އަޅުގަނޑަށް ނުފެނޭ."
އައްދު ވިދާޅުވި ގޮތުގައި މަސްތުވާތަކެތީގެ މައްސަލަ ހައްލު ކުރުމަށް މިނިސްޓްރީ އަށް ބޮޑެތި ބާރުތައް ދިނުމަ ގަބޫލު ކުރާ ކަމަށެވެ. ނަމަވެސް ދައުލަތުގެ މިނިސްޓްރީތަކާއި ގާނޫނު ތަންފީޒު ކުރާ އިދާރާތަކަށް އެއްވެސް އިތުބާރެއް ނެތް ކަމަށް ވިދާޅުވި އެވެ. އަދި މަސްތުވާތަކެތީގެ ވަބާގައި ޖެހޭ ކުޑަކުދިންގެ އަދަދު މަދު ކުރުމަށްޓަކައި މަސްތުވާތަކެތީގެ ވިޔަފާރީގެ ތެރެއަށް ކުޑަކުދިން ވައްދާ މީހުންނަށް ހަރުކަށި ފިޔަވަޅުތަކެއް ގާނޫނުގައި ކަނޑައަޅަން ޖެހޭނެ ކަމަށް ވެސް ވިދާޅުވި ވެ.
"ކުދިން ބައިވެރި ކޮށްގެން ހިންގާ މުއާމަލާތް އެއީ ސީދާ ކުދިން އެބިއުސް ކުރުން ކަމަށް ބަލައި، ހެކި ހޯދުމާއި ސާބިތު ކުރުމަށް ބޭނުންވާ ކަންކަން ފަސޭހަކޮށް ބްރޯޑުކޮށް މާފެއް ނެތް ގޮތަށް ހަރުކަށި އަދަބު ދެވޭނެ ގޮތަށް އަޅުގަނޑުމެން މި ގާނޫނު ބައްޓަން ކުރުން ވާޖިބު." އައްދު ވިދާޅުވި އެވެ.