މިރޭ މުޅި ހުޅުމާލޭ ދެ ފިޔަވަހީގެ ބޮޑު ސަރަހައްދަކުން ކަރަންޓު ކެނޑުނީ ފީޑަރެއް ޓްރިޕްވުމުގެ ސަބަބުން ކަމަށް ސްޓެލްކޯއިން ބުނެފިއެވެ. މިރޭ 11:10 ހާއިރު މުޅި ހުޅުމާލޭގެ ބޮޑު ސަރަހައްދަކުން ވަނީ ކަރަންޓު ކެނޑިފައެވެ. ކަރަންޓު ކެނޑުނު ސަބަބު ހާމަކޮށް ސްޓެލްކޯއިން މިރޭ ބުނީ އެ ސަރަހައްދުތަކުން ކަރަންޓުގެ ޚިދުމަތް މެދުކެނޑިފައިވަނީ ހުޅުމާލެއަށް ކަރަންޓު ދޭ ފީޑަރުތަކުގެ ތެރެއިން ފީޑަރެއް ޓްރިޕްވުމުން ކަމަށެވެ. ފީޑަރު ޓްރިޕްވުމަކީ ކަރަންޓު ދިނުމުގައި ނުރައްކާތެރި ހާލަތެއް މެދުވެރިވުމުގެ ފުރުސަތެއް ފާހަގަވެއްޖެނަމަ އޮޓޮމެޓިކުން ކަރަންޓު ޑިސްޓްރިބިއުޝަން ނެޓްވޯކާ ގުޅިފައިވަ ޓްރާންސްފޯމަރުން ކަރަންޓު ކެނޑިގެން ދިއުމެވެ. ފީޑަރު ޓްރިޕްވާ ބައެއް ހާލަތްތަކުގެ ތެރޭ ފީޑަރަށް ނުކަތާވަރަށް ކަރަންޓު ދޭން ޖެހުމުން، އާދަޔާ ޚިލާފަށް ހޫނުވުން ފަދަ ކަންކަން މެދުވެރިވިޔަ ނުދިނުމަށް ކަރަންޓު ކެނޑުމާއި، ވޮލްޓޭޖު ދަށްވުން ހިމެނެއެވެ. އެއާއެކު ސްޓެލްކޯއިން ބުނީ ފުރަތަމަ ފިޔަވަހީގެ ތިން ޓްރާންސްފޯމަރެއް މިހާރު އެނަޖައިޒްކޮށް ކަރަންޓުދެވިފައިވާ ކަމަށެވެ. އަދި ކަރަންޓު ނުދެވި ހުރި ސަރަހައްދުތަކަށް ވީ އެންމެ އަވަހަކަށް ކަރަންޓު ދޭނެކަމަށް ބުންޏެވެ. "ކުރަންޖެހޭ މަސައްކަތްތައް އަޅުގަނޑުމެންގެ މުވައްޒަފުން ދަނީ ކުރަމުން. ދިމާވާނެ ދަތިތަކަށް މަޢާފަށް އެދެން،" ސްޓެލްކޯއިން ބުންޏެވެ. ކަރަންޓު ކެނޑުމުގެ މައްސަލަތައް މަދުން ނަމަވެސް މާލޭ ސަރަހައްދުގައި ދިމާވެއެވެ. މިފަހުން އެ ކަން އާންމުވީ ޓްރާންސްފޯމަރުތަކުން ވައްކަން ކުރަން ފެށުމާއެކުގައެވެ.