ކުރީގެ ރައީސް މައުމޫން އަބްދުލް ގައްޔޫމްގެ ދަ މައުމޫން ފައުންޑޭޝަންގެ ސީއީއޯގެ މަގާމަށް ދައުލަތަށް ގިނަ ދުވަހު ހިދުމަތް ކުރައްވާފައިވާ އަބްދﷲ ކަމާލުއްދީން އައްޔަންކޮށްފި އެވެ.
އެ މަގާމަށް ކަމާލުއްދީން އައްޔަންކުރިކަން އިއުލާންކުރީ މި މަހުގެ 4 ގަ އެވެ. އެ ދުވަހު މައުމޫން ސޯޝަލް މީޑިއާ ޕޯސްޓެއްގައި ވިދާޅުވީ އެ މަނިކުފާނުގެ ފައުންޑޭޝަންގެ މަގާމު ކަމާލުއްދީނަށް ހުށަހެޅުއްވުމުން ގަބޫލު ކުރައްވާފައިވާ ކަމަށެވެ. އަދި ކަމާލުއްދީންގެ ތަޖުރިބާގެ އަލީގައި ފައުންްޑޭޝަންގެ މަސައްކަތްތަކަށް އިތުރު ކުރިއެރުންތަކެއް ލިބޭނެ ކަމަށް ގަބޫލު ކުރައްވާ ކަމަށް ވިދާޅުވި އެވެ.
ކަމާލުއްދީނަކީ މައުމޫންގެ ވެރިކަމުގައި މިނިސްޓަރުކަން ވެސް ކުރައްވާފައިވާ ބޭފުޅެކެވެ. އެގޮތުން ހޯމް މިނިސްޓަރުގެ މަގާމު އަދާކުރައްވާފައިވެ އެވެ. އަދި ކަމާލުއްދީނަކީ މައުމޫން އެންމެ ފަހުން އުފެއްދެވި އަދި މިހާރު އުވާލާފައިވާ ޕާޓީ، އެމްއާރްއެމްގައި ވެސް މަސައްކަތްކުރެއްވި ބޭފުޅެކެވެ.
ކަމާލުއްދީން ކުރިން ޑީއާރްޕީ އާއި ޕީޕީއެމް އަދި ޖުމްހޫރީ ޕާޓީގައި ވެސް މަސައްކަތްކުރެެއްވި އެވެ.