އިއްޔެ އަވަހާރަވި ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޢަބްދުﷲ ޖަމީލްގެ ހަނދާނުގައި މަޖިލީހުގައި ސުކޫތެއް ގެނެސްފިއެވެ.އިއްޔެ އަވަހާރަވި އަބްދުﷲ ޖަމީލަކީ ދައުލަތަށް 54 އަހަރަށްވުރެ ދިގު މުއްދަތެއްގައި ހިދުމަތްކުރެއްވި އިއްޒަތްތެރިއެކެވެ. ޤައުމީ ޚިދުމަތުގައި ހޭދަކުރެއްވި ދިގު މުއްދަތުގައި އެމަނިކުފާނު ވަނީ މަޖިލީހުގެ މެމްބަރުކަން 30 އަހަރަށްވުރެ ގިނަ ދުވަހު އަދާކުރައްވާފައެވެ.މަޖިލީހުގެ މިއަދުގެ ޖަލްސާ ފެށުމަށްފަހު ރިޔާސަތުން ވަނީ އަބްދުﷲ ޖަމީލު މަޖިލީހަށް ކޮށްދެއްވި ޚިދުމަތްތައް ފާހަގަކުރައްވާފައެވެ. އަދި އެމަނިކުފާނުގެ ހަނދާނުގައި މަޖިލީހުގައި ވަނީ ސްކޫތެއް ގެނެސްފައެވެ.ސުކޫތެއް ގެނައުމުގެ އިތުރުން، ޢަބްދުﷲ ޖަމީލްގެ ހަނދާނުގައި މިއަދުން ފެށިގެން 3 ދުވަސް ވަންދެން ރައްޔިތުންގެ މަޖިލީޙުގައި ތައުޒިޔާގެ ދަފްތަރެއް ހުޅުވުމަށްވެސް ވަނީ ނިންމާފައެވެ.އަބްދުﷲ ޖަމީލް ވަނީ ޖޫން 6، 1964 އިން ޑިސެމްބަރު 24، 1970ގެ ނިޔަލަށް އަދި ޖުލައި 5، 1972 އިން ފެބްރުއަރީ 23، 1995 އަށް ރައްޔިތުންގެ މަޖިލީހުގެ މެންބަރުކަން ކުރައްވާފަ އެވެ.އަބްދުﷲ ޖަމީލު ވަނީ ނޮވެމްބަރު 24، 1980 އިން ފެބްރުއަރީ 23، 1995 އަށް ރައްޔިތުންގެ ހާއްސަ މަޖިލީހުގެ މެންބަރުކަންވެސް ކުރައްވާފަ އެވެ.އަބްދުﷲ ޖަމީލު ވަނީ ރައީސުލްޖުމްހޫރިއްޔާގެ ޕްރައިވެޓް ސެކްރެޓަރީގެ މަގާމާއި، ރައީސުލްޖުމްހޫރިއްޔާގެ އެގްޒެކެޓިވް ސެކްރެޓަރީގެ މަގާމާއި، މިނިސްޓާ އޮފް ސްޓޭޓް ފޯ ޕްރެޒިޑެންޝަލް އެފެއާޒްގެ މަގާމާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރު ކަމުގެ މަގާމާއި ޓޫރިޒަމް މިނިސްޓަރުގެ މަގާމުވެސް ފުރުއްވާފަ އެވެ.އަބްދުﷲ ޖަމީލު ރަސްމީ އިއްޒަތުގައި އިއްޔެގެ ވަގުތެއްގައި ފަސްދާނުލައިފައިވަނީ ގަލޮޅު ސަހަރާ ގައެވެ.