ބިންވެރިޔާގައި ނުހިމެނޭ ގޯތިތަކެއް ދިންކަމަށް ތުހުމަތުވާ މައްސަލައިގެ ތަހުގީގައި ހަ ފަރާތަކާ ސުވާލުކޮށްފައިވާއިރު ގޯތި ލިބުނުކަމުގެ އެއްބަސްވުންތަކުގައި ސޮއިކުރީ ކުރީ ސަރުކާރުގައި ކަމަށް އެިން ބައެއް މީހުން ބުނެފައިވާކަން ފުލުހުން ހާމާކުރި
ބިންވެރިޔާ ސްކީމުގެ ތެރެއިން ގޯތި ލިބުނުކަމަށް ސައްހަ ނޫން ލިޔެކިޔުން ހުށަހަޅައިގެން ގޯތީގެ އިންފާރު ރޭނުމަށް އެޗްޑީސީން ހުއްދަ ދިން މައްސަލައިގައި މިހާތަނަށް ކުރެވުނު ތަހުގީގުތަކުން ކުރީ ސަރުކާރުގެ ވެރިންނަށް ބޮޑެތި ތުހުމަތުތަކެއް ކުރެވޭކަން ފުލުހުން ހާމަކޮށްފި އެވެ. 
މި މައްސަލައާ ގުޅިގެން ފުލުހުން އިސްކަންދަރު ކޮށީގައި ބާއްވަމުންދާ ނޫސްވެރިންގެ ބައްދަލުވުމުގައި ވާހަކަދައްކަވަމުން އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފު ވިދާޅުވީ މިހާރު ތަހުގީގުކުރަމުންދާ މައްސަލާގައި ބިންވެރިޔާ ސްކީމުގެ ދަށުން ގޯތި ނުލިބޭ ބައެއް ފަރާތްތަކުން ގޯތި ލިބުނުކަމުގެ ލިޔުން ޕޯޓަލް މެދުވެރިކޮށް ހުށަހަޅައިގެން އެެ ފަރާތްތަކަށް އެ ބިންތަކުގައި ބައެއް މަސައްކަތްކުރުމުގެ ހުއްދަތައް އެޗްޑީސީން ދޫކޮށްފައިވާ ކަމަށެވެ. 
އަދި އެ ލިޔެކިޔުންތަކުގައި މައްސަލައެއް އުޅޭކަން އެޗްޑީސީގެ ސަމާލުކަމަށް އައީ އެއް ބިމަކަށް އެކަކަަށްވުރެ ގިނަ މީހުން ހުއްދަ ހޯދަން އެދި ހުށަހެޅުމުން ކަމަށާއި، އެ މައްސަލަ ފެންމަތިވުމާއެކު އެ ބިންތަކުގައި މަސައްކަތްކުރަން ހުށަހެޅި ފަރާތްތަކުން ހުށަހަޅާފައިވާ ލިޔެކިޔުމުގެ ސައްހަކަން ކަށަވަރުކުރަން އެޗްޑީސީން ހައުސިން މިނިސްޓްރީގައި އެދިފައިވާކަމށް ޝަރީފު ވިދާޅުވި އެވެ. 
މިހާތަނަށް އެ މައްސަލައިގެ ތަހުގީގުގައި ސުވާލުކުރެވުނު މީހުން ދީފައިވާ މައުލޫމާތުތަކަށް ބަލާއިރު ބިންވެރިޔާއަށް ކުރިމަތިލުމުން ޝަރުތު ހަމަނުވާކަމަށް ނިންމުމުން، އެ ނިންމުމާމެދު ހިތްހަމަނުޖެހިގެން ކުރީ ސަރުކާރުގެ ހައުސިން މިނިސްޓްރީގެ ވެރިންނާ ބައްދަލުކޮށް، އެކަމުގެ ޝަކުވާ ކުރިކަމަށް ބުނެފައިވާކަން ފާހަގަކުރައްވައި، ޝަރީފު ވިދާޅުވީ އެއިން އެކަކަށް ގޯތި ހަމަޖެހުނު ވާހަކަ އެއިރުގެ ވެރިޔަކު ފަހުން އަންގަވާފައިވާކަމަށް ތަހުގީގަށް ކިޔައިދީފައިވާ ކަމަށެވެ. 
"އެއް ފަރާތަކާ ސުވާލުކުރުމުން ބުނެފައިވޭ، އެ ޝަކުވާކުރަން ރަސްމީކޮށް އެއިރުގަ މިދިޔަ ސަރުކާރުގަ އެދުނީމާ، އެތާނގެ އިސްވެރިންނާ ބައްދަލުކޮށްފަައި ހުންނާނެ ކަމަށް. އެ ބައްދަލުވުން ނިންމާފައި އެ ޝަކުވާ ބަލާނެކަމަށް ބުނެފައިވާކަމަށް މައުލޫމާތު ދީފައިވޭ. އަދި އޭގެ ފަހުން ގުޅައި އެފަރާތަށް ބިން ހަމަޖެހިފައިވާކަމަށް ހައުސިން މިނިސްޓްރީން ގުޅައިގެން ގޮސް އެ ލިޔުމުގައި ސޮއިކުރި ވާހަކަވެސް އެއް ފަރާތަކުން ބުނެފައިވޭ،" ޝަރީފު ވިދާޅުވި އެވެ. 
އަދި ބިންވެރިޔާ ސްކީމާއެކު ހިންގި ގެދޮރުވެރިޔާ ސްކީމުގެ ތެރެއިން ފުލެޓު ހޯދުމަށް ކުރިމަތިލި ފަރާަތަކަށް ބިން ލިބިފައިވާކަންވެސް ތަހުގީގަށް ހޯދިފައިވާކަން ޝަރީފު ފާހަގަކުރެއްވި އެވެ. 
ޝަރީފު ފާހަގަކުރެއްވި ގޮތުގައި ތަހުގީގުގެ މިހާރުގެ މައިގަނޑު މަގުސަދަކީ މިހާތަނަށް މިގޮތަށް ބިންވެރިޔާ ލިސްޓުން ބޭރުން ދޫކޮށްފައިހުރިކަން އެނގިފައިވާ ބިންތަކުގެ އިތުރަށް ބިންތަކެއް ދޫކޮށްފައި ހުރިތޯ ބެލުމެވެ. އަދި އޭގެ އިތުރަށް މިގޮތަށް ބިން ދޫކުރުމާ އެޗްޑީސީގައި އަދި ހައުސިން މިނިސްޓްރީގައި ނިމުނު ދައުރުގައި މަސައްކަތްކުރި މީހުންނާއި މިހާރު މަސައްކަތްކުރާ މީހުންގެ ތެރެއިން އެއްވެސް ބަޔަކާ ގުޅެއް އޮތްތޯ ބެލުމެވެ. 
އެގޮތުން މިހާތަނަށް ލިބުނު މައުލޫމާތުތަކަށް ބަލާއިރު މިހާރު ދައުރުވަމުންދާ ބިން ލިބުނުކަމުގެ ލިޔުންތަކަކީ ސައްހަ ލިޔުންތަކެއްކަން ބަލައި، އެކަމާ ގުޅޭ އިތުރު މައުލޫމާތުތައް ހިއްސާކުރައްވަމުންދާނެކަން ޝަރީފު ހާމަކުރެއްވި އެވެ،. 
މިއަދު ޕީޖީ ނެރުއްވި އަމުރާ އެއްގޮތަށް މި މައްސަލާގައި އެއްވެސް ފަރާތަކުން މަގާމުގެ ނާޖާއިޒު ފައިދާ ހޯދައިގެން އެއްވެސް ކަމެއް ހިންގާފައިވޭތޯ ބެލުމަށް އެންޓި ކޮރަޕްޝަން ކޮމިޝަނާ ގުޅިގެން މަސައްކަަތް ކުރަމުން އަންނަ ކަމަށްވެސް އޭނާ ވިދާޅުވި އެވެ. 
މި މައްސަލާގައި ފުލުހުން މިހާތަނަށް ކޮށްފައިވާ މަސައްކަތްތަކުގެ ތަފުސީލު ހިއްސާކުރައްވަމުން ސުޕްރިޓެންޑެންޓް އޮފް ޕޮލިސް ރަޖްނީ ޝުއައިބު ވިދާޅުވީ މިހާތަނަށް މި މައްސަލައާ ގުޅުންހުރި ހަ ފަރާތަކާ ސުވާލުކޮށްފައިވާނެ ކަމަށެވެ. އަދި އެ މައްސަލައާ ގުޅުންހުރި ލިޔެކިޔުންވެސް ހޯދާފައިވާނެ ކަމަށެވެ. 
އެގޮތުން އެގްރިމެންޓުތަކާއި، އެޗްޑީސީން ދޫކުރި ހުއްދަތަކާއި، އެ ހުއްދަތައް ބާތިލުކޮށް ފޮނުވި ލިޔުންތައްވެސް ބަލައި ވެރިފައިކުރުމުގެ މަސައްކަތް ފުލުހުން ކުރަމުންދާކަމަަށް ރަޖްނީ ވިދާޅުވި އެވެ. 
ރަޖްނީ އިތުރަށް ވިދާޅުވީ ތަހުގީގުގެ ތެރެއިން މީސްމީޑިޔާގައި ދައުރުކުރަމުންދާ މައްސަލަތައް ނޫން އެހެނިހެން ބައެއް މައްސަލަތައް ފެންމަތިވަމުންދާކަން ފާހަގަކުރައްވައި ރާޖްނީ ވިދާޅުވީ އެފަދަ އިތުރު މައްސަލައެއް ކުރިމަތިވެފައިވާ ފަރާތެއްނަމަ އެ މައުލޫމާތު ފުލުހުންނާ ހިއްސާކުރުމަށް އެދިވަޑައިގަންނަވާަ ކަމަށެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ