\"ބިންވެރިޔާ" ސްކީމުގެ ދަށުން ހައްގު ނޫން ބަޔަކަށް ހުޅުމާލެއިން ބިންތަކެއް ދީފައިވާ ކަމަށް ތުހުމަތުކުރެވޭ މައްސަލައިގައި، ތުހުމަތުކުރެވޭ ފަރާތްތަކަށް ލިޔެކިޔުންތައް ލިބިފައިވަނީ ކުރީގެ ސަރުކާރުން ކަމަށް ފުލުހުން ބުނެފިއެވެ.މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ޕޮލިސް ކޮމިޝަނަރު އަބްދުﷲ ޝަރީފް ވިދާޅުވީ، މި މައްސަލައިގައި މިހާތަނަށް 6 ފަރާތަކާ ސުވާލުކުރެވިފައިވާ ކަމަށެވެ. އަދި މި ހުރިހާ ފަރާތްތަކަކީވެސް "ބިންވެރިޔާ" ސްކީމުގެ ޝަރުތު ފުރިހަމަނުވާ އަދި ސްކީމުގައި ބައިވެރިވާން ހުށަހަޅާފައިނުވާ ފަރާތްތަކެއްކަން ފާހަގަކުރެވިފައިވާ ކަމަށް އޭނާ ވިދާޅުވިއެވެ."ތަހުގީގުގައި ސުވާލުކުރެވުނު މީހުން ދީފައިވާ މައުލޫމާތުތަކަށް ބަލާއިރު، ބިންވެރިޔާއަށް ކުރިމަތިލުމުން ޝަރުތު ހަމަނުވާކަމަށް ނިންމުމުން، އެ ނިންމުމާމެދު ހިތްހަމަނުޖެހިގެން ކުރީ ސަރުކާރުގެ ހައުސިން މިނިސްޓްރީގެ ވެރިންނާ ބައްދަލުކޮށް، އެކަމުގެ ޝަކުވާ ކުރިކަމަށް ބުނެފައިވޭ،" ޝަރީފް ވިދާޅުވިއެވެ.މީގެ އިތުރުން، ބައެއް ލޮޓްތަކަށް އެއް ފަރާތަށްވުރެ ގިނަ ފަރާތުން ހުށަހަޅާފައިވާ ކަމަށާއި، މި ލިޔެކިޔުންތަކަކީ ސައްހަ ލިޔެކިޔުންތަކެއްތޯ ބެލުމަށް އެޗްޑީސީން ހައުސިން މިނިސްޓްރީގައި އެދިފައިވާ ކަމަށްވެސް ޝަރީފް ވިދާޅުވިއެވެ. ހައުސިން މިނިސްޓްރީން ހާމަކޮށްފައިވާ ގޮތުގައި، މި ލިޔެކިޔުންތަކަކީ ބިންވެރިޔާގެ ލިސްޓުގައި ނުހިމެނޭ ފަރާތްތަކަކުން ހުށަހަޅާފައިވާ ލިޔެކިޔުންތަކެކެވެ.ފުލުހުންގެ ފަރާތުން އިތުރަށް ހާމަކުރި ގޮތުގައި، މި މައްސަލައިގައި މުވައްސަސާތަކުގެ އިހުމާލާއި މަޤާމުގެ ނުފޫޒު ބޭނުންކޮށްފައިވޭތޯ ބަލަމުންދާ ކަމަށެވެ. މި މައްސަލައިގެ ތަހުގީގު ކުރިއަށްދާ ކަމަށާއި، އިތުރު މައުލޫމާތު ލިބުމުން އާންމުންނާ ހިއްސާކުރާނެ ކަމަށްވެސް ފުލުހުން ބުނެފައިވެއެވެ.