ނަމާދުގެ ޙަޤީޤީ މާނައަށް ވިސްނާނަމަ އެންމެ ބޮޑަށް ގުޅިފައިވަނީ ސަމާލުކަންދިނުމާއިއެވެ. ކޮންކަމަކަށް ހެއްޔެވެ؟ ﷲ ތަޢާލާގެ ޙަޟްރަތަށެވެ. އެކަމަށް ވިސްނައިގެން ތިބެ އަޑުއަހާށެވެ!  
އަހަރެމެން ޙަރަމް ބަންނަނީ ﷲއަކްބަރު ކިޔަމުންނެވެ. މާނައަކީ އެންމެ ބޮޑީ ﷲ އެވެ. އެންމެހައިމަތިވެރިކަމެއް ލިބިވޮޑިގެންވަނީ ﷲ ތަޢާލާއަށެވެ! ﷲ ތައާލާއަށްވުރެ މަތިވެގެންވާ އެހެން އެއްވެސް ފަރާތެއް ނުވެއެވެ. ވީމާ "ﷲއަކްބަރު" ދުލުން ކިޔައި ނަމާދަށް ފަށައިގަންނަ ހިސާބުން ދުނިޔަވީ އެއްވެސް ކަމެއް ހިތްމައްޗަށް ނުގެންނާށެވެ! އެހިސާބުން ތިމާ ގުޅިފައި އެވަނީ އެންމެހައި މަތިވެރިކަން ލިބިވޮޑިގެންވާ އެންމެ މަތިވެރި ﷲ ތަޢާލާ އާއިއެވެ.  
ނަމާދުގެ ޙަރަކާތްތައް ފަށަނީ ޙަރަމްބަންނަ ތަކްބީރުންނެވެ! ދެއަތް އުފުލައިލުމުންނެވެ. ބައެއް މީހުން ދެކަތްފަތު ފޫޅާއި ހަމައަށެވެ. އަނެއް ބައަކު ދެކޮނޑާއި ހަމައަށެވެ. މިއީ ކީއްކުރަން ކުރާ ކަމެއް ހެއްޔެވެ؟ ނަމާދު، ނަމާދެއްގެ ގޮތުގައި ފުރިހަމައަށް ކުރެވޭނީ އެއީ ކީއްކުރަން ކުރާ ކަމެއްކަން ރަނގަޅަށް އެނގިގެންނެވެ.  
ކުށެއް ކުރެވުމުން ފުލުހުންގެ ކުރިމަތީގައި އަހަރެމެން ދެއަތް އުފުލައި "ސަރެންޑަރ" ކުރަމުއެވެ. އެއީ ކިޔަމަންތެރިކަން އަދާކުރުމަށެވެ! ތިމާ ނިކަމެތިވެއްޖެކަން ޤަބޫލުކުރުމުގެ ގޮތުންނެވެ! އެކަން ކުރަނީ ވަރަށް ފަރުވާތެރިކަމާއިއެކުގައެވެ. ފަރުވާކުޑަކޮށްފިނަމަ ގައަށް ބަޑިޖަހައިފާނެކަމުގެވެސް ބިރަށެވެ
ނަމާދުގައި ވެސް އަހަރެމެން ދެއަތް އުފުލަނީ ﷲ ތަޢާލާގެ ޙަޟްރަތުގައި އަހަރެމެންނަކީ ނިކަމތިންކަން ބަޔާންކުރުމަށެވެ! ނަމާދުގައި މިތިބެނީ ފުރިހަމައަށް ﷲ ތަޢާލާއަށް ކިޔަމަންތެރިވެގެންކަން ބަޔާންކުރުމަށެވެ. އަދި ފަރުވާތެރިވާންވީ ކުރާ ނަމާދު ﷲ ތަޢާލާ ޤަބޫލުފުޅު ނުކުރައްވަވައިފާނެ ކަމުގެ ބިރަށެވެ! އެއީ މީހަކަށް ލިބޭނެ އެންމެ ބޮޑު ދެރަކަމުގައި ނޫނީ ނުވާނެއެވެ!  
ލޮބުވެތި އަޚުންނާއި އުޚުތުންނޭވެ! ބަންގިވެސް ފެށެނީ ﷲ ތަޢާލާ މަތިވެރިކުރުމުންނެވެ. ޤަމަތްވެސް ފެށެނީ ހަމައެފަދައިންނެވެ. ނަމާދު ނިމިގެން މަދުވެގެން 33 ފަހަރު ހަމައެކަލިމަ ކިޔައި ﷲ ތަޢާލާ މަތިވެރިކުރަމުއެވެ. އަދި ނިދުމުގެކުރިންވެސްމެއެވެ. ވީމާ ޢާންމުގޮތެއްގައި މުސްލިމުންގެ ދުލުން އެންމެ ގިނައިން ކުރެވޭނެ ކަމަކީ ﷲ ތަޢާލާ މަތިވެރިކުރުމެވެ.
 
ލޮބުވެތި އަޚުންނާއި އުޚުތުންނޭވެ! މިވާހަކަ މިގޮތަށް ދައްކަން މިޖެހެނީ ނަމާދަށް ހުއްޓުހުރެ ދެއަތް އުފުލައި ﷲއަކްބަރު ކިޔައި ޙަރަމްބަންނައިރު މިކުރެވެނީ ކިހައިވަރެއްގެކަމެއްކަމާއިމެދު ގިނަ ބައަކު ނުވިސްނާތީއެވެ. ނަމާދުގައި އެތައް ފަހަރަކު ކިޔައި އަތްއުފުލާއިރުވެސް ދޭންޖެހޭ ސަމާލުކަން ނުދެވޭތީއެވެ! ފަރުވާކުޑަކުރެވޭތީއެވެ!
 
ނަމާދު ފުރިހަމަ ގޮތުގައި ކުރެވޭނީ ކިޔާތަކެއްޗަށް ސަމާލުކަންދީގެންނެވެ. ޚާއްޞަކޮށް "ﷲއަކްބަރު" އަށް ސަމާލުކަން އިތުރުކޮށްގެންނެވެ. އެކަމުން ހިތަށް ވަންނަން ޖެހޭ ބިރުވެތިކަން ހިތަށް ވައްދައިގެންނެވެ. ވީމާ ﷲއަކްބަރު ކިޔުމުގައާއި އަތް އުފުލުމުގައާއި އަތްތިރިކުރުމުގައިވެސް ވަރަށް ބޮޑަށް ސަމާލުކަންދޭށެވެ! ﷲ ތަޢާލާއަށް ކިޔަމަންތެރިކަމާއިއެކު ނަމާދުކުރެވުމަކީ އެއީއެވެ.
 
--އިސްލާމީ ތިލަފަތުގެ ދަރުސަކުން