މާލޭ، އަލިކިލެގެފާނު މަގުން ސައިކަލެއްގައި ދިޔަ އަންހެނެއްގެ އަތުން ފޭރެން މަސައްކަތްކުރި މައްސަލާގައި ހައްޔަރުކުރި ފިރިހެން މީހާގެ ވަނަވަރު ފުލުހުން އާއްމުކޮށްފި އެވެ.އެ މައްސަލައިގެ ތުހުމަތަށް އިއްޔެ ހަވީރު ހައްޔަރުކުރީ ފުލުހުން ބުނިގޮތުގައި، ވިލިމާލޭ، ފިޔަބަރި، ހަސަން އިސާމް، 30 އެވެ.މި ހާދިސާ ހިނގައިދިޔައީ އިއްޔެގެ ވަގުތެއްގައެވެ. އަދި އިސާމް ހައްޔަރުކޮށްފައި ވަނީ އިއްޔެ ހަވީރު 17:20ގައެވެ. އޭނާ ދުއްވި ސައިކަލު ވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން މިއަދު މައުލޫމާތުދިނެވެ.ސޯޝަލް މީޑިއާގައި އާއްމުވެފައިވާ ވީޑިއޯއަކުން ފެންނަ ގޮތުގައި ސައިކަލުގައި ދިޔަ އަންހެން މީހާއާ އަރާ ހަމަކުރި އެހެން ސައިކަލެއްގައި އިން ފިރިހެނަކު ވަނީ އެ އަންހެން މީހާގެ ކަރުގައި އޮތް ފަށް ފޭރުމަށް މަސައްކަތްކޮށްފައެވެ. އެކަން އޭނާއަށް ނުވުމުން, ސައިކަލުން ފައިބައި އަންހެން މީހާގެ އަތްދަބަސް ފޭރެން މަސައްކަތް ކުރެއެވެ.ނަމަވެސް އަންހެން މީހާ މަގުގެ އެއްފަރާތު ގޯޅިތެރެއަށް ދުވެފައިދާ މަންޒަރު ވީޑިއޯއިން ފެނެއެވެ. ދެ ވަނަ ފަހަރަށް އޭނާ ހަމަލާދީ މަސައްކަތްކުރީ އަންހެން މީހާގެ އަތުގައި އޮތް އަތްދަބަސް ޖަހައިގަތުމަށް ކަމަށް ބެލެވެ އެވެ. ހަމަލާ ދޭން މަސައްކަތް ކުރަމުން އަންހެން މީހާގެ ފަހަތުން ދުވެފައި ގޮސް ޕޭވްމަންޓު މައްޗަށް އެރި ނަމަވެސް އެ ސަރަހައްދަށް މީހުން ގިނަ ވާން ފެށުމުން ފިރިހެން މީހާ ސައިކަލްގައި ދުވެ ފިލީ އެވެ.ފުލުހުން މިއަދު ބުނީ ފަށް ޖަހައިގަތް ކަމަށް ތުހުމަތު ކުރެވޭ އިސާމް މިހާރު ހައްުޔަރުކޮށްފައިވާ ކަމަށެވެ. ފުލުހުން ބުނިގޮތުގައި، އޭނާ ދުއްވި ސައިކަލް ވެސް މައްސަލައިގެ ތަހުގީގަށް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.