ކުރީގެ އެމްޑީޕީ ސަރުކާރުން ބަދަލުގެ ގޮތުގައި ދޭން ނިންމާފައިވާ 1 ބިލިއަން ރުފިޔާއަށްވުރެ ގިނަ ފައިސާ ދޫކުރުން މިހާރުގެ ސަރުކާރުން ހުއްޓުވައިފިއެވެ. މިކަން ހާމަކުރައްވާފައިވަނީ ބަންޑާރަ ނައިބުގެ އޮފީހުންނެވެ.ބަންޑާރަ ނައިބުގެ އޮފީހުން ނެރުއްވާފައިވާ ބަޔާނެއްގައި ވިދާޅުވެފައިވަނީ 2022 ވަނަ އަހަރުގެ ނޮވެންބަރު 28 ވަނަ ދުވަހު ސޮއިކޮށްފައިވާ 9 ސެޓްލްމަންޓް އެއްބަސްވުމަކީ ބާޠިލް އެއްބަސްވުންތަކެއް ކަމަށެވެ. އަދި މި އެއްބަސްވުންތަކަކީ ޤާނޫނުއަސާސީއާއި ޤާނޫނާ ޚިލާފަށް އެކުލަވާލެވިފައިވާ އެއްޗެހި ކަމަށްވެސް ވިދާޅުވެފައިވެއެވެ.ބަންޑާރަ ނައިބުގެ އޮފީހުން އިތުރަށް ހާމަކުރައްވާފައިވާ ގޮތުގައި، މި މައްސަލަތައް ޙައްލުކުރުމަށް އުފައްދާފައިވާ ލަފާދޭ ކޮމިޓީ އުވާލައްވައި، މައްސަލަތައް އެޓަރނީ ޖެނެރަލްގެ އޮފީހަށް ފޮނުއްވާފައިވެއެވެ. އަދި މި އެއްބަސްވުންތަކަށް ޢަމަލުކުރަން ނުޖެހޭކަން ކަމާބެހޭ އިދާރާތަކަށް އަންގަވާފައިވާކަމަށްވެސް ވިދާޅުވެފައިވެއެވެ.މި ނިންމުމާ ގުޅިގެން، އެކި ފަރާތްތަކަށް ދޭން ނިންމާފައިވާ ބޮޑެތި އަދަދުތަކުގެ ފައިސާއާއި ރަށްރަށް ދޫކުރުން ހުއްޓުވިފައިވާކަން ބަންޑާރަ ނައިބުގެ އޮފީހުން ފާހަގަކުރައްވާފައިވެއެވެ.މި ނިންމުމަކީ ދައުލަތުގެ ބަޖެޓަށް ބޮޑު ލުޔެއް ލިބިގެންދާނެ ނިންމުމެއްކަމަށް ބެލެވެއެވެ. އަދި މިއީ ޤާނޫނީ ހަމަތަކާ އެއްގޮތަށް ކަންކަން ކުރިއަށް ގެންދިއުމަށް އެޅޭ މުހިންމު ފިޔަވަޅެއްކަމަށްވެސް ފާހަގަކުރެވެއެވެ.