މިދިޔަ އަހަރު ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމު "ދުރަންދަރު"ގެ ދެވަނަ ބައި، "ދުރަންދަރު: ދަ ރިވެންޖް" ފުރަތަމަ ބަޔަށްވުރެ ދިގުވާނެ ކަމަށް ރިޕޯޓުތަކުން ބުނެފިއެވެ. އެގޮތުން ތިން ގަޑިއިރާއި 40 މިނެޓު ނުވަތަ ތިން ގަޑިއިރާއި 55 މިނެޓާ ދެމެދުގެ ދިގުމިން އެ ފިލްމުގައި ހުންނާނެ ކަމަށް ރިޕޯޓުތަކުން ވަނީ ބުނެފައެވެ. މި މަހުގެ 19 ވަނަ ދުވަހު ފިލްމު "ދުރަންދަރު 2" ސިނަމާތަކަށް ގެންނަން ތާވަލުކޮށްފައި އޮތްއިރު ފިލްމަށް ވަރަށް ފޯރީގައި ގިނަބަޔަކު އަންނަނީ އިންތިޒާރު ކުރަމުންނެވެ. ޑައިރެކްޓަރު އަދިތިޔަ ދާރުގެ ޓީމާ ހަވާލާދީ ބޮލީވުޑް ހަންގާމާއިން ބުނެފައިވާ ގޮތުގައި، މި ފިލްމުގެ ދިގުމިން 235 މިނެޓަށް، ނުވަތަ ތިން ގަޑިއިރާއި 55 މިނެޓަށް ދެމިގެންދާނެ ކަމަށް ލަފާކުރެވެއެވެ. ނަމަވެސް ބައެއް ސަރަޙައްދުތަކުގައި މި ފިލްމުގެ ދިގުމިނަކީ ތިން ގަޑިއިރާއި 40 މިނެޓް ކަމަށްވެސް އަޑުފެތުރިފައިވެއެވެ. ފިލްމު "ދުރަންދަރު"ގެ މަންޒަރެއްގައި އެކްޓަރު އަކްޝޭ ކަންނާ--ފޮޓޯ/ބޮލީވުޑްހަންގާމާ ކޮންމެއަކަސް، މި ފިލްމު ފުރަތަމަ ބައި ބަލާލުމަށް ގަޑިއިރަކާއި ހަތަރު މިނެޓްވަންދެން ބެލުންތެރިން ސިނަމާގައި ތިބިއިރު ދެވަނަ ފިލްމު އެއަށްވުރެ ދިގުވުމަކީ ހައިރާންވާންޖެހޭ ކަމެއް ނޫން ކަމަށް ބައެއް މީހުން ވަނީ ބުނެފައެވެ. "ދުރަންދަރު: ދަ ރިވެންޖް" ގެ ދިގުމިން 3 ގަޑިއިރާއި 55 މިނެޓަށް އަރައިފިނަމަ، މިއީ ހިންދީ ސިނަމާގައި މިހާތަނަށް އުފެއްދި އެންމެ ދިގު ފިލްމުތަކުގެ ތެރޭގައި ހިމެނިގެންދާނެ ފިލްމެކެވެ. އަދި ފާއިތުވި 26 އަހަރު ތެރޭގައި ނުކުތް ދެވަނައަށް އެންމެ ދިގު ފިލްމަށްވެސް ވާނެއެވެ. މި ލިސްޓުގެ އެއްވަނައިގައި އޮތީ 2003 ވަނަ އަހަރު ނުކުތް ޖޭ.ޕީ ދައްތާގެ "އެލްއޯސީ ކާގިލް"އެވެ. އެ ފިލްމުގެ ދިގުމިނަކީ ހަތަރު ގަޑިއިރާއި ހަތް މިނެޓެވެ. ފިލްމު "ދުރަންދަރު 2"ގެ ލީޑް ރޯލްއިން ވެސް ރަންވީރު ސިންގް ފެންނާނެއިރު މި ފިލްމުގެ މުހިއްމު ރޯލްތަކުން ފެންނާނެ އިތުރު ތަރިންގެތެރޭ ސަންޖޭ ދަތު، އާރް މާދަވަން، އަރުޖުން ރާމްޕާލް، ސާރާ އަރުޖުން އަދި ރާކޭޝް ބެދީ ހިމެނެއެވެ. ޖުމްލަ 475 ކްރޯޑު ރުޕީސްގެ ބަޖެޓަކުން އުފެއްދި މި ފިލްމުގެ ފުރަތަމަ ބަޔަށް ބޮކްސް އޮފީހުގައި 1428 ކްރޯޑު ރުޕީސްގެ އާމްދަނީއެއް ވަނީ ލިބިފައެވެ.