ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ވެރިކަން ކުރާ ޕީޕީއެމް/ޕީއެންސީގެ މުލަކު ދާއިރާގެ ޓިކެޓު، މަޝްހޫރު ވިޔަފާރިވެރިޔާ އަހުމަދު ސަލީމް (ރެޑްވޭވް ސަލީމް) ގެ ދަރިފުޅު އިބްރާހިމް ނައުފަލު އަށް ލިބިއްޖެއެވެ.
ޕީޕީއެމް/ޕީއެންސީން ބޭއްވި ޕްރައިމަރީގައި ސަލީމްގެ ދަރިފުޅު ނައުފަލު ވަނީ މުލަކު ދާއިރާގެ ޓިކެޓް ކަށަވަރު ކުރައްވި އިރު، ސަލީމަށް ވަނީ ޕްރައިމަރީއަކާ ނުލައި އޭދަފުށީ ދާއިރާގެ ޓިކެޓު ކަށަވަރުވެފައެވެ. ސަލީމަކީ ޕީޕީއެމްގެ ޕާލަމެންޓްރީ ގްރޫޕްގެ ލީޑަރެވެ. މި ފަހަކާ ޖެހެންދެން އޭނާ ހުންނެވީ މަޖިލިހުގެ މައިނޯރިޓީ ލީޑަރުގެ ގޮތުގައެވެ.
އެހެންކަމުން ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ސަލީމާއި އޭނާގެ ދަރިފުޅު ވެސް ފެނިގެންދާނެއެވެ.
ޕީޕީއެމް/ޕީއެންސީގެ ޓިކެޓް ޕްރައިމަރީއާ ނުލައި 13 ބޭފުޅަކަށް ކަށަވަރުވީއިރު، އިއްޔެ ޕްރައިމަރީ ބާއްވާފައިވަނީ 73 ދާއިރާއަކަށެވެ. 283 ކެންޑިޑޭޓުން ޕްރައިމަރީގައި ވާދަކުރިއެވެ. މި ޕްރައިމަރީގައި ގިނައިން ޓިކެޓު ކަށަވަރު ކުރައްވާފައި ވަނީ މަޖިލިހުގެ ކުރީގެ މެމްބަރުންނެވެ. މަޖިލިހުގެ ކުރީގެ މެމްބަރުންގެ ތެރެއިން ޓިކެޓު ކަށަވަރު ނުވި ބޭފުޅުންތަކެއް ވެސް ތިއްބެވިއެވެ.