ސްޕެއިންގެ ގައުމީ ފުޓުބޯޅަ ޓީމުން ފީފާ ވޯލްޑް ކަޕް 2026 ކާމިޔާބުކުރުމާ ގުޅިގެން، ސްޕެއިންގެ ރަސްގެފާނު ފެލީޕޭ ހަ ވަނައަށާއި، ސްޕެއިންގެ ބޮޑުވަޒީރު ޕޭދްރޯ ސަންޗެޒް ޕެރޭޒް-ކަސްތޭޚޯނަށް، ރައީސް ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ. ފީފާ ވޯލްޑް ކަޕުގެ ފައިނަލުގައި އާޖެންޓީނާއާ ވާދަކޮށް، ސްޕެއިނުން ތަށި ނެގީ އިތުރު ވަގުތުގެ ދެވަނަ ހާފުގައި ލަނޑެއް ޖަހައިގެންނެވެ. އެއީ 2010 ވަނަ އަހަރުގެ ފީފާ ވޯލްޑް ކަޕަށްފަހު ސްޕެއިނުން ވޯލްޑް ކަޕް އުފުލާލި ފުރަތަމަ ފަހަރެވެ. އަދި އެއީ އެ ގައުމުގެ ތާރީޚުގައި ވޯލްޑް ކަޕުގެ ޗެމްޕިއަންކަން ހޯދި ދެވަނަ ފަހަރެވެ. ރައީސް އޮފީހުން ބުނި ގޮތުގައި ސްޕެއިންގެ އެ ކާމިޔާބީއާ ގުޅިގެން، ރައީސް ވަނީ އެ ގައުމުގެ ރަސްގެފާނަށާއި ބޮޑުވަޒީރަށް ވަކިވަކިން މެސެޖުތައް ފޮނުއްވައިފައެވެ. އެ މެސެޖުތަކުގައި ރައީސް ވަނީ، މި ކާމިޔާބީއަކީ ސްޕެއިންގެ ގައުމީ ފުޓުބޯޅަ ޓީމުގެ ހުނަރާއި، މަސައްކަތްތެރިކަމާއި، ކުޅިވަރުގެ މޮޅުކަން ދައްކުވައިދޭ ކަމެއްގެ ގޮތުގައި ސިފަކުރައްވާފައި ކަމަށް ރައީސް އޮފީހުން ބުންޏެވެ. ފުޓުބޯޅައަކީ ރާއްޖޭގައި ނުހަނު މަގުބޫލު ކުޅިވަރެއްކަން ފާހަގަކުރައްވައި ރައީސް ވަނީ، ސްޕެއިން ޓީމަކީ ދިވެހިންގެ ގިނަ ބައެއްގެ މެދުގައި މަގުބޫލުކަން ހޯދާފައިވާ ޓީމެއް ކަމަށް ވިދާޅުވެފައެވެ. އަދި ސްޕެއިންގެ ކާމިޔާބީ، މުޅި ރާއްޖޭގައި ވަރަށް އުފަލާއެކު ފާހަގަކޮށްފައިވާކަމަށާއި، މިކަމުގެ ސަބަބުން ދެ ގައުމުގެ ދެމެދުގައި އޮތް ރަޙްމަތްތެރިކަމާއި ގާތް ގުޅުން އިތުރަށް ބަދަހިވާނެ ކަމަށް ރައީސް ވިދާޅުވިކަން ރައީސް އޮފީހުން ހާމަކުރިއެވެ. މީގެ އިތުރުން، ދިވެހިރާއްޖެއާއި ސްޕެއިނާ ދެމެދު އުފެދިފައިވާ ގާތް، އަދި ދެމެހެއްޓެނިވި ރަޙްމަތްތެރިކަމަށްޓަކައި ރައީސް ވަނީ ޝުކުރު އަދާކުރައްވާފައެވެ. އަދި ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމުގައި ސްޕެއިންގެ ފަތުރުވެރިންނާއި ބައިވެރިންގެ ފަރާތުން މެދުކެނޑުމެއްނެތި ލިބެމުންދާ އަގުހުރި އެހީތެރިކަން އެ މަނިކުފާނު ފާހަގަކުރެއްވިއެވެ. ރައީސް އޮފީހުން ބުނި ގޮތުގައި، ރައީސްގެ މެސެޖުފުޅުތައް ނިންމަވާލައްވަމުން، ސްޕެއިންގެ ރަސްގެފާނާއި ބޮޑުވަޒީރަށް ފުރިހަމަ ޞިއްޙަތާއި ދުޅަހެޔޮކަމަށް އެދިވަޑައިގެންނެވިއެވެ. އަދި ސްޕެއިންގެ ރައްޔިތުންނަށް ދާއިމީ ސުލްޙަވެރިކަމާއި، ފާގަތިކަމާއި ކުރިއެރުމަށް އެދިވަޑައިގެންފައިވެއެވެ. https://sun.mv/224866 ފާހަގަކޮށްލެވޭ ގޮތުގައި ވޯލްޑް ކަޕް ފެށުމުގެ ކުރިން ރައީސް ވަނީ އެ މަނިކުފާނު ބޮޑަށް ތާއީދުކުރައްވަނީ އާޖެންޓީނާއަށް ކަމަށް ވިދާޅުވެފައެވެ. އަދި އާޖެންޓީނާއަށް ތަށި ނުލިބިއްޖެ ނަމަ، ދެން ތާއީދު ކުރައްވަނީ އިނގިރޭސިވިލާތަށް ކަމަށް ރައީސް ވިދާޅުވެފައިވެއެވެ. ވޯލްޑް ކަޕްގެ ފައިނަލް މެޗުން އާޖެންޓީނާ ނާކާމިޔާބުވިއިރު، ސެމީ ފައިނަލްގައި ފްރާންސާ ދެކޮޅަށް ނުކުމެ އިނގިރޭސިވިލާތުން ވަނީ ލޯ މެޑަލް ހޯދައިފައެވެ.