ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ މަސްލަހަތު އޮންނަ ހެވީލޯޑުގެ 3 ރަށް ވިއްކާލަން ސިވިލް ކޯޓުން ދިން ހުއްދައަށް އަމަލުކުރުން މަޑު ޖައްސާލަން ހައިކޯޓުން އަމުރުކޮށްފިއެވެ.
މި 3 ރަށް ވިއްކާލުމަށް ބޭންކް އޮފް މޯލްޑިވްސް (ބީއެމްއެލް) އިން އިއުލާނުކޮށްފައިވަނީ ހެވީލޯޑް ކުންފުންޏަށް ބީއެމްއެލް އިން ދޫކުރި 11 މިލިއަން ޑޮލަރުގެ ލޯނަށް ފައިސާ ނުދައްކާތީއެވެ. ބީއެމްއެލް އިން ވަނީ އެ ލޯނަށް ރަހުނުކޮށްފައިވާ ހެވީލޯޑްގެ 3 ރަށް ގަންނަން ޝައުގުވެރިވާ ފަރާތްތަކުން އަންނަ މަހުގެ 28 ވަނަ ދުވަހުގެ ކުރިން ޕްރޮޕޯސަލް ހުށަހެޅުމަށް އިއުލާނުކޮށްފައެވެ.
ނަމަވެސް ސިވިލް ކޯޓުން މި ރަށްތައް ވިއްކާލަން ދީފައިވާ ހުއްދައަށް އަމަލުކުރުން މަޑުޖައްސާލަން ހައިކޯޓުން އަމުރުކުރީ ހެވީ ލޯޑްގެ ފަރާތުން އެ މައްސަލަ އިސްތިއުނާފު ކުރުމާ ގުޅިގެންނެވެ. އެގޮތުން ހައިކޯޓުން މިއަދު ނެރުނު އަމުރުގައި ބުނެފައިވަނީ އެ މައްސަލައާ ގުޅިގެން އެ ކޯޓުން ގޮތެއް ނިންމަންދެން އެ ހުއްދައަށް އަމަލުކުރުން ފަސްކުރަން އަންގާ ކަމަށެވެ.
ބީއެމްއެލްއިން ވިއްކާލަން އޭރު އިއުލާން ކޮށްފައިވަނީ ލ. ފަރެސް އައިލެންޑާއި ކުޑަ ފަރެސް އައިލެންޑް އަދި ބޮޑުހުރާ އައިލެންޑެވެ. މީގެ ތެރެއިން ފަރެސް އާއި ކުޑަފަރެސްގައި ރަހާ ރިސޯޓް ހިންގަމުންދާއިރު، ބޮޑުހުރާއަކީ ދަނޑުވެރި ކަމަށް ދޫކޮށްފައި އޮންނަ ރަށެކެވެ.
ފާހަގަކޮށްލެވޭ ގޮތުގައި ފަރެސް އާއި ކުޑަފަރެސްގައި ހިންގާ ރަހާ ރިސޯޓުގައި ބީޗް ވިލާގެ 100 ކޮޓަރި ހުރެއެވެ. މި ރިސޯޓުތަކުން ޑައިވިންއާއި، ސްޕާގެ ހިދުމަތްތަކުގެ އިތުރުން ވޯޓާ ސްޕޯޓްސްގެ ކުޅިވަރުތަކުގެ ހިދުމަތް ވެސް ލިބެން ހުރެއެވެ.