އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައަށް 100 ދުވަސް ފުރިފައިވާއިރު، މި ހަނގުރާމައަށް އެމެރިކާގެ އާންމު ރައްޔިތުންގެ ތާއީދު ހޯދުމުގައި އެ ގައުމުގެ ރައީސް ޑޮނަލްޑް ޓްރަމްޕް ނާކާމިޔާބުވެވަޑައިގެންފިއެވެ. ހަނގުރާމައާއި ހަމަލާ ބަދަލުކުރުންތައް ހުއްޓާލުމުގެ މަޝްވަރާތައް ކުރިއަށްދާއިރު، އެމެރިކާގެ ގިނަ ރައްޔިތުން މި ހަނގުރާމައާ ދެކޮޅުކަން ޚިޔާލު ހޯދުމުގެ ވޯޓުތަކުން ދައްކައެވެ. މިއީ ޓްރަމްޕާއި އޭނާ ނިސްބަތްވެވަޑައިގަންނަވާ ރިޕަބްލިކަން ޕާޓީއަށް ސިޔާސީ ގޮތުން ކުރިމަތިވެފައިވާ ވަރަށް ބޮޑު ގޮންޖެހުމެކެވެ. ޔުނިވާސިޓީ އޮފް މޭރީލޭންޑްގެ ޕްރޮފެސާ، ޝިބްލީ ތެލްހާމީ ވިދާޅުވި ގޮތުގައި އީރާނާއެކު ކުރާ ހަނގުރާމައިން އެމެރިކާގެ މަސްލަހަތު ހިމާޔަތްކުރެވޭ ކަމަށް ގަބޫލުކުރަނީ ވަރަށް މަދު އެމެރިކާ ރައްޔިތުންނެކެވެ. އެ ޔުނިވާސިޓީން ކުރިއަށްގެންދިޔަ "ކްރިޓިކަލް އިޝޫޒް ޕޯލް" އިން ދައްކާ ގޮތުގައި، މި ހަނގުރާމައިން އެމެރިކާ މޮޅުވެއްޖެ ކަމަށް ނުވަތަ މޮޅުވަމުންދާ ކަމަށް ގަބޫލުކުރަނީ ވޯޓުލާ މީހުންގެ ތެރެއިން އެންމެ 16 އިންސައްތަ މީހުންނެވެ. އަދި ހަނގުރާމައިގެ ސަބަބުން އެމެރިކާއަށް ފައިދާއަށްވުރެ ބޮޑަށް ލިބެނީ ގެއްލުން ކަމަށް ގިނަ މީހުން ގަބޫލުކުރާއިރު، އޭގެ ތެރޭގައި ރިޕަބްލިކަން ޕާޓީއަށް ނިސްބަތްވާ 33 އިންސައްތަ މީހުންވެސް ހިމެނެއެވެ. އިންސްޓިޓިއުޓް ފޯ ގްލޯބަލް އެފެއާޒް (އައިޖީއޭ) ގެ ޕްރޮގްރާމް ޑިރެކްޓާ، ޖޮނަތަން ގުޔާ ވިދާޅުވި ގޮތުގައި މިއީ އާންމުންގެ މެދުގައި ވަރަށް މަގުބޫލުކަން ކުޑަ ހަނގުރާމައެކެވެ. އައިޖީއޭއިން ނެގި ޚިޔާލު ހޯދުމުގެ ވޯޓަކުން ދައްކާ ގޮތުގައި، ޓްރަމްޕް މި ހަނގުރާމަ ކުރިއަށްގެންދަވާ ގޮތާ މެދު 58 އިންސައްތަ މީހުން ހިތްހަމައެއް ނުޖެހެއެވެ. މީގެ ތެރޭގައި ރިޕަބްލިކަން ޕާޓީގެ 21 އިންސައްތަ މީހުން ހިމެނެއެވެ. ހޮރުމުޒް ކަނޑުއޮޅި ބަންދުކުރުމުގެ ސަބަބުން އެމެރިކާގައި ތަކެތީގެ އަގުބޮޑުވެ، އިންފްލޭޝަން މައްޗަށް ދިއުމަކީ އާންމުންގެ ކަންބޮޑުވުމެކެވެ. އައިޖީއޭގެ ސާވޭއިން ދައްކާ ގޮތުގައި 79 އިންސައްތަ މީހުން ގަބޫލުކުރާ ގޮތުގައި ހަނގުރާމައިގެ ސަބަބުން އެމެރިކާގައި ދިރިއުޅުމުގެ ޚަރަދުތަކަށް ވަނީ އަސަރުކޮށްފައެވެ. އިގުތިސާދަށް ކުރާ ނޭދެވޭ އަސަރުތަކާ ގުޅޭގޮތުން ޓްރަމްޕް ވިދާޅުވެފައިވަނީ، އޭނާގެ ހަމައެކަނި އަމާޒަކީ އީރާނުން ނިއުކްލިއާ ހަތިޔާރު ހޯދުން ހުއްޓުވުން ކަމަށާއި، އެމެރިކާ ރައްޔިތުންގެ މާލީ ހާލަތާ މެދު ވިސްނާވަޑައިނުގަންނަވާ ކަމަށެވެ. އަދި ނޮވެމްބަރު މަހު އޮންނަ އިންތިޚާބާ މެދުވެސް ފަރުވާލެއް ނެތް ކަމަށް އޭނާ ވަނީ ވިދާޅުވެފައެވެ. ނަމަވެސް ތެލްހާމީ ވިދާޅުވި ގޮތުގައި، ޓްރަމްޕް އެފަދައިން ވާހަކަދައްކަވަނީ ހަނގުރާމަ ހުއްޓާލަން އޭނާ ބޭނުންވެފައި ހުރިކަން އީރާނަށް ނާންގަވައި، މަޝްވަރާތަކުގައި ބާރުވެރިކަން ހޯއްދެވުމަށެވެ. ހަނގުރާމައިގެ ސަބަބުން އެމެރިކާގެ އިގުތިސާދަށް ބޮޑެތި ގެއްލުންތަކެއް ލިބިއްޖެނަމަ، ކުރިއަށް އޮތް އިންތިޚާބުގައި ރިޕަބްލިކަން ޕާޓީއަށް ގާނޫނުހަދާ މަޖިލީސް ގެއްލި، ޓްރަމްޕް މަގާމުން ދުރުކުރުމުގެ މައްސަލައަކާ ކުރިމަތިލާން ޖެހިދާނެ ކަމަށްވެސް ތެލްހާމީ އިންޒާރުދެއްވިއެވެ. ފެބްރުއަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން އީރާނަށް ދިން ހަމަލާތަކުގައި އީރާނުގެ ރޫހާނީ ލީޑަރު އަލީ ޚާމަނާއީއާއި އިސް އޮފިޝަލުންގެ އިތުރުން އެތައް ސަތޭކަ އާންމުންނެއް ވަނީ މަރުވެފައެވެ. މީގެ ރައްދުގައި އީރާނުން އިސްރާއީލަށާއި ސަރަހައްދުގެ އެކި ކަންކޮޅުތަކަށް މިސައިލާއި ޑްރޯން ހަމަލާތައް ދިނެވެ. އަދި ހަކަތައިގެ ބާވަތްތައް އުފުލުމަށް ބޭނުންކުރާ މުހިންމު މަގެއް ކަމަށްވާ ހޮރުމުޒް ކަނޑުއޮޅި ބަންދުކުރުމާ ގުޅިގެން ތެލާއި ގޭހުގެ އަގު ވަނީ ވަރަށް ބޮޑަށް އުފުލިފައެވެ. އޭޕްރީލް މަހުގެ އަށްވަނަ ދުވަހު ހަމަލާތައް މެދުކަނޑާލުމަށް އެއްބަސްވުމަކަށް އާދެވުނު ނަމަވެސް، ގަލްފުގެ ސަރަހައްދުގައި އަދިވެސް ކުދިކުދި ކުރިމަތިލުންތައް ހިނގަމުންދެއެވެ. އަދި އީރާނުން ހޮރުމުޒް ކަނޑުއޮޅި ބަންދުކޮށްފައި އޮތް އޮތުން ދެމިއޮތްއިރު، އެމެރިކާއިން ވަނީ އީރާނުގެ ބަނދަރުތައް ހިސާރުކޮށްފައެވެ.