ލޯކަލް ކައުންސިލްތަކަށް މިހާރަށްވުރެ ބޮޑަށް ބާރުވެރިކަން ދިނުމަށާއި، އިޤްތިޞާދީ އިޞްލާޙީ ބަދަލުތައް ގެނެސް ސިޔާސީ ހަރަކާތްތައް އިތުރުކުރުމަށް ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
ބޮޑު ބަދަލުގެ ކެމްޕެއިނުގެ ތެރެއިން، މިރޭ ފުވައްމުލައް ސިޓީގައި ކުރިޔަށް ގެންދިޔަ ޖަލްސާގައި ރައީސް ނަޝީދު ވަނީ އެ ސިޓީގެ ރައްޔިތުން އެމަނިކުފާނަށް ދެއްވަމުންދާ އެއްބާރުލުމަށާއި މި ޖަލްސާގައި ބައިވެރިވީތީ ޝުކުރު އަދާކުރައްވާފައެވެ. އަދި ވޭތުވެދިޔަ އަހަރުތަކުގެ ތެރޭގައި ރާއްޖޭގެ އިޤްތިޞާދަށް އައިސްފައިވާ ބަދަލުތަކަށް އަލިއަޅުއްވާލައްވަމުން، މީގެ ކުރިން ރާއްޖޭގެ ބަޖެޓަކީ މިހާރާ އަޅާބަލާއިރު ވަރަށް ކުޑަ ބަޖެޓެއްކަން ފާހަގަކުރެއްވިއެވެ.
ރައީސް ނަޝީދު ވިދާޅުވި ގޮތުގައި، ދައުލަތަށް ލިބޭ އާމްދަނީ ވަނީ ވަރަށް ބޮޑަށް އިތުރުވެފައެވެ. އެގޮތުން ޤައުމީ އާމްދަނީ ގާތްގަނޑަކަށް 7 ބިލިއަން އެމެރިކާ ޑޮލަރަށްވުރެ މައްޗަށް ގޮސްފައިވީ ނަމަވެސް، ޤައުމަށް އާމްދަނީ ލިބޭ ގޮތްތަކާއި އެ ފައިސާ ހޭދަކުރެވޭ ގޮތް ގިނަ ރައްޔިތުންނަށް އަދިވެސް ސާފުނުވާކަން އެމަނިކުފާނު ފާހަގަކުރެއްވިއެވެ.
ފުވައްމުލަކުގެ އިޤްތިޞާދީ ހިއްސާއާ ބެހޭގޮތުން ވާހަކަފުޅު ދައްކަވަމުން، އެމަނިކުފާނު ކުރެއްވި ދިރާސާތަކުން ދައްކާގޮތުގައި ހަމައެކަނި ފުވައްމުލަކުން އަހަރަކު ގާތްގަނޑަކަށް 85 މިލިއަން އެމެރިކާ ޑޮލަރުގެ އާމްދަނީއެއް އުފައްދާ ކަމަށާއި، އެއީ ބޮލަކަށް 7،500 ޑޮލަރުގެ އާމްދަނީއެއްކަން ހާމަކުރެއްވިއެވެ.
އެމަނިކުފާނު ވިދާޅުވި ދެއްވި ގޮތުގައި، އިޤްތިޞާދީ ގޮތުން އެކަށީގެންވާ ފިޔަވަޅުތަކެއް ނާޅައިފިނަމަ، ރާއްޖެއަށް ލިބިފައިވާ ކުރިއެރުންތައް ގެއްލި، އިޤްތިޞާދީ ގޮތުން ”ފަހަތަށް ސާކާލައިފާނެ“ ކަމުގެ ބިރު އެބައޮތެވެ.
މީގެ އިތުރުން، 2009 ވަނަ އަހަރުން ފެށިގެން ރާއްޖެއަކީ މެދު ފަންތީގެ އާމްދަނީ ލިބޭ ޤައުމެއްގެ ގޮތުގައި ކަނޑައަޅާފައިވާއިރު، އަލުން ތަރައްޤީވަމުން އަންނަ ޤައުމުތަކުގެ ގިންތިއަށް ރާއްޖެ ވެއްޓިއްޖެނަމަ، އޭގެ ނުރައްކާތެރި ނަތީޖާ ރައްޔިތުންނަށް ކުރިމަތިވާނެ ކަމަށް ވިދާޅުވިއެވެ.
ރާއްޖޭގައި މިހާރު ހިނގަމުންދާ އިޖުތިމާޢީ ރައްކާތެރިކަމުގެ ޕްރޮގްރާމްތަކާއި، ޕެންޝަނާއި، އެކަނިވެރި މައިންނަށްދޭ މާލީ އެހީތެރިކަމަކީ ވޭތުވެދިޔަ އަހަރުތަކުގައި ހޯދި ބޮޑެތި ޑިމޮކްރެޓިކް ކާމިޔާބީތަކާ ގުޅިފައިވާ ކަންކަން ކަމުގައި އެމަނިކުފާނު ވިދާޅުވިއެވެ.
ރާއްޖޭގެ ދަރަނި އިތުރުވަމުންދާތީ ކަންބޮޑުވުންފާޅު ކުރައްވައި ރައީސް ނަޝީދު ވަނީ ދެމެހެއްޓެނިވި ރޭވުމެއް ނެތި ދަރަނި ނަގަމުންދާނަމަ، ރާއްޖެ މާލީ ބޮޑު ގެއްލުމެއްގެ ތެރެއަށް ތެރެއަށް ވެއްޓިދާނެ ކަމުގެ އިންޒާރު ދެއްވާފަ އެވެ.
ރައީސް ނަޝީދު ވިދާޅުވީ، ރަށްރަށުގައި ހިންގާ ތަރައްޤީގެ މަޝްރޫޢުތަކުގެ ފުރިހަމަ މަންފާ ރައްޔިތުންނަށް ލިބެން ގިނަ ފަހަރަށް 10 ވަރަކަށް އަހަރު ނަގާ ކަމަށެވެ. އަދި ރާއްޖޭގެ އެކި ކަންކޮޅުތަކުގައި ފަށާފައިވާ މަޝްރޫޢުތައް ހުއްޓިފައިވާތީ އެކަމަށް ފާޑުވިދާޅުވެ، މިފަދަ މަޝްރޫޢުތައް ލަސްވަނީ ކައުންސިލްތަކަށް އެކަށީގެންވާ ބާރުތައް ދީފައި ނުވާތީ ކަމަށް ވަކާލާތު ކުރެއްވިއެވެ.
ރައީސް ނަޝީދު ވިދާޅުވި ގޮތުގައި، ކައުންސިލްތަކަށް މިހާރަށްވުރެ ބޮޑެތި ބާރުތަކާއި މަސްއޫލިއްޔަތުތައް ހަވާލުކޮށްފިނަމަ، ތަރައްޤީގެ މަޝްރޫޢުތައް މިހާރަށްވުރެ މާ ހަލުވި ދުވެއްޔެއްގައި ކުރިއަށް ގެންދެވޭނެއެވެ.
މި ބައްދަލުވުމުގައި ރައީސް ނަޝީދު ވަނީ އެމްޑީޕީއަކީ ޤައުމީ އިޞްލާޙީ ބަދަލުތައް ގެނައުމަށާއި ލާމަރުކަޒީ ނިޒާމު ބާރުވެރިކުރުވުމަށް މަސައްކަތްކުރާ ރާއްޖޭގެ އެންމެ ބޮޑު އެއް ސިޔާސީ އަދި އިޖުތިމާޢީ ޖަމާޢަތްކަމަށް ސިފަކުރައްވާފައެވެ. އަދި ޕާޓީއާ މެދު އެމަނިކުފާނު ގެންގުޅުއްވާ ތަޞައްވުރު ހިއްސާކުރައްވަމުން ވިދާޅުވީ، ޗެއަރޕާސަންގެ މަޤާމަށް އިންތިޚާބުވެއްޖެނަމަ، ކައުންސިލްތައް ބާރުވެރިކުރުވުމަށާއި، ތަރައްޤީގެ މަސައްކަތްތައް ފައިދާހުރި ގޮތެއްގައި ކުރިއަށް ގެންދިއުމަށް ބޭނުންވާ ބާރުތައް ކައުންސިލްތަކަށް ހޯދައިދިނުމަށް މަސައްކަތް ކުރައްވާނެ ކަމަށެވެ.