ކުރީގެ ރައީސް މައުމޫން އަބްދުލްގައްޔޫމް އާއި ރައީސް މުހައްމަދު ނަޝީދަކީ އިސްލާމް ދީނުގެ ވާހަކަ ދައްކަން ކުފާ ހަމަވާ ބޭފުޅުން ނޫން ކަމަށް ދީނީ އިލްމުވެރިޔާ ޝެއިޚް ފަޟްލޫން ބިން މުހައްމަދު ވިދާޅުވެއްޖެއެވެ.
ޝެއިޚް ފަޟްލޫން މިފަދައިން ވިދާޅުވެފައިވަނީ އިސްލާމް ދީނުގައި ޔޯގާ ހުއްދަ ކަމަށް ރައީސް ނަޝީދާއި ރައީސް މައުމޫން ވިދާޅުވުމާއި ގުޅިގެން އެކަމަށް ރައްދު ދެއްވައި ކުރެއްވި ޓްވީޓެއްގައެވެ.
ޔޯގާގެ ބަހުސް ހޫނުވެ، އެކަމާމެދު އިސްލާމިކް މިނިސްޓްރީ އަދި ފަތުވާ މަޖިލީހުން އެއްވެސް ބަހެއް ބުނެފައި ނުވިނަމަވެސް، ގިނަ ދީނީ އިލްމުވެރިންނާއި ސިޔާސީ ބޭފުޅުންނާއި އާންމުންވެސް ދަނީ އެކަމާމެދު އަމިއްލަ ރައުޔު ހާމަކުރަމުންނެވެ.
އެގޮތުން، ޔޯގާއަކީ ޝިރުކެއް ކަމަށް ދަންނަބޭކަލުން އިޖުމާޢު ވެފައި ނުވާ ކަމަށާއި، ވަކި ބައެއްގެ ފަލްސަފާއަކީ އިސްލާމްދީނުގެ ޙުކުމެއް ކަމަށް ބަލައިގަންނަން ދަތި ކަމަށް ރައީސް މުހައްމަދު ނަޝީދު ވަނީ ވިދާޅުވެފައެވެ.
އަދި، ޔޯގާއަކީ ހަރާމްކަމެއް ނޫން ކަމަށާއި ޔޯގާއަކީ ޞިއްޙީ އަދި ނަފްސާނީ ދުޅަހެޔޮކަން ހިފެހެއްޓުމަށް ކުރާ ކަސްރަތުތަކެއް ކަމަށް ރައީސް މައުމޫން ވިދާޅުވެފައިވެއެވެ.
މިވާހަކަތަކަށް ރައްދު ދެއްވައި ޝެއިޚް ފަޟްލޫން ކުރެއްވި ޓްވީޓުގައި ވިދާޅުވެފައިވަނީ ދިވެހިރާއްޖޭގެ 3 ވަނަ އަދި 4 ވަނަ ރައީސް އިސްލާމް ދީނާ މެދު އެއްޗެއް ބުނެފިނަމަ އާންމުގޮތެއްގައި އިސްލާމް ދީނުގައި އެކަމެއް އޮންނާނީ އޭގެ އިދިކޮޅަށް ކަމަށާއި، އެދެބޭފުޅުންނަކީ ދީނުގެ ވާޙަކަ ދައްކަން ކުފޫ ހަމަވާ ބައެއް ނޫންކަމަށެވެ.
ބައިނަލްއަގްވާމީ ޔޯގާ ދުވަސް ފާހަގަކުރުމަށް ބޭއްވި ހަރަކާތަށް ހުރަސްއެޅުމަށް ހަމަނުޖެހުން ހިންގި ކަމުގެ ތުހުމަތުގައި ހައްޔަރުކުރުމަށް ފަހު ޝެއިޚް ފަޟްލޫން ބަންދުން ދޫކޮށްލާފައިވަނީ ޖުލައި މަހުގެ 21 ވަނަ ދުވަހުއެވެ.