މަސްތުވާތަކެތީގެ މައްސަލަތަކާ ގުޅުން ހުރި ސިޔާސީ ފަރާތްތަކާމެދު ފިޔަވަޅު އަޅާނެ ކަމުގެ އިންޒާރު ހޯމް މިނިސްޓަރު އުމަރު ނަސީރު މިރޭ ދެއްވައިފި އެވެ.
ދިޓީވީ ހަބަރު ތެރެއިން ޕްރޮގްރާމުގައި ވާހަކަދައްކަވަމުން މިނިސްޓަރު އުމަރު ވިދާޅުވީ މަސްތުވާތަކެއްޗާއި ދެކޮޅަށް މިކުރާ ހަނގުރާމައިގައި ފުރޮޅާނުލާނެ އެންމެ ގާ ކޮޅެއް ވެސް ނުބާއްވާނެ ކަމަށާއި ފިޔަވަޅު ނާޅާނެ އެއްވެސް މީހެއް ވެސް ނުހުންނާނެ ކަމަށެވެ.
އެގޮތުން މަސްތުވާތަކެތި އެތެރެކުރުމުގައި ސިޔާސީ ބޭފުޅުން ތިއްބެވި ނަމަވެސް އެފަރާތްތަކާއި މެދުގައި ފިޔަވަޅު އަޅާނެ ކަމަށް ވެސް މިނިސްޓަރު ވިދާޅުވި އެވެ.
"މަސްތުވާތަކެއްޗާއި ދެކޮޅަށް އަޅުގަނޑުމެން މިދޭ ފައިޓުގައި ފުރޮޅާނުލާނެ އެއްވެސް ގާކޮޅެއް ވެސް ނުބާއްވާނަން، ފިޔަވަޅު ނާޅާނެ އެއްވެސް މީހަކު ވެސް ނުހުންނާނެ، ހަލުވާނުލާނެ އެއްވެސް ހާއްޔެއް ވެސް ނޯންނާނެ، އެގޮތުން ސިޔާސީ ބޭފުޅުން އޭގެ ތެރޭގައި ތިއްބެވި ކަމުގައިވިޔަސް ޑޮކްޓަރުން ތިއްބަސް، އަޅުގަނޑުމެން ހަވާލުވެ ތިއްބެވި މުއައްސަސާތަކުގެ މުވަޒަފުންގެ ގޮތުގައި ތިބޭ މީހުން ތިއްބަސް، އަޅުގަނޑުމެން ހުރިހާ ފިޔަވަޅެއް އަޅާނަން" އުމަރު ވިދާޅުވި އެވެ.
އުމަރު ވިދާޅުވީ ރާއްޖެއަށް އެތެރެކުރާ ކޮންމެ 5 ގުރާމުގެ މަސްތުވާތަކެތީގެ ސަބަބުން އެކަމުގެ ތެރެއަށް ކޮންމެވެސް ޒުވާނަކު ވަންނަމުންދާ ކަމަށާއި އެހެންކަމުން މަސްތުވާތަކެތި ގޭޓުތަކުން ވަނުނުދީ ހިފެހެއްޓުން އެއީ ސަރުކާރުން ކޮންމެހެން ކުރަން ޖެހޭ ކަމެއް ކަމަށެވެ.
މިނިސްޓަރު ވިދާޅުވީ މަސްތުވާތަކެތީގެ ސަބަބުން ކުށް ކުރުން އާދަޔާ ހިލާފަށް އިތުރުވެފައިވާ ކަމަށާއި ޒުވާނުން ރާއްޖޭގައި ކުށް ކުރަން ހުރިހާ "މާއްދާތަކެއް" ހުރިއިރު އެ މާއްދާތައް އުނިކުރަން ޖެހޭ ކަމަށެވެ. އެގޮތުން ވަޒީފާގެ ފުރުސަތުތައް އިތުރުކޮށް މީހުންނަށް ވިޔަފާރިކުރުމަށް ފުރުސަތު ހުޅުވާލައި މަސްތުވާތަކެތި އެތެރެކުރާ ދޮރުތަކުގައި ތަޅު އަޅުވަން ޖެހޭ ކަމަށް މިނިސްޓަރު ވިދާޅުވި އެވެ.
އަދި މަސްތުވާތަކެތި އެތެރެކުރާ ނެޓްވޯކްތައް ފުނޑު ފުނޑުކޮށްލާ ސޯޝަލް ސިސްޓަމް ރަނގަޅުކޮށް ކުޑަ ކުދިން ކުށްތަކުގެ ތެރެއަށް ވަނަ ނުދިނުމަށްޓަކައި ތަފާތު މެކޭނިޒަމްތައް ގާއިމުކުރަން ޖެހޭ ކަމަށް އުމަރު ވިދާޅުވި އެވެ.
އުމަރު އިތުރަށް ވިދާޅުވީ ސަރުކާރުން ވެރިކަމާއި ހަވާލުވީ ވަރަށް އިހްލާސްތެރި މަސައްކަތްތަކެއް ކުރުމަށް ކަމަށާއި 24 ގަޑިއިރު ވަޒީރުންނާއި އެހެނިހެން ބޭފުޅުން ކުރައްވާ މަސައްކަތްތަކަކީ ގައުމު ރަނގަޅުކޮށް އާރާސްތުކުރުމުގެ މަސައްކަތް ކަމަށާއި އެހެންކަމުން މި މަސައްކަތުގައި ސިޔާސީ ވާދަވެރިން މިހާރު ދައްކަމުން ގެންދާ ހިތްތިރިކަން ދައްކާ އެއްބާރުލުން ދިނުމަށް އެދިވަޑައިގަންނަވާ ކަމަށެވެ.
އަދި މިސަރުކާރުން ކުއްލިއަކަށް ކަންތައްތަކެއްކޮށްދޭނެ ކަމަށް ރައްޔިތުން ހީނުކުރުމަށާއި މި ސަރުކާރަށް ވަގުތުދީ ކަންކަން ރަނގަޅުކުރުމަށް ފުރުސަތު ދިނުމަށް ވެސް އުމަރު ވަނީ ރައްޔިތުންގެ ކިބައިން އެދިވަޑައިގަންނަވާފައެވެ.