ކަރެކްޝަންގެ ބެލުމުގެ ދަށުގައި ހުރި ޖަލުތައް ފުރޭ މައްސަލައަށް ހައްލު ހޯދަން މިދިޔަ ސަރުކާރުން ޕްރޮޖެކްޓްތަކެއް ފެށިފައިވާ ކަމަށާއި، އެ ޕްރޮޖެކްޓްތައް ކުރިއަށްގެންގޮސް ނޫނީ ޖަލުތައް ފުރުމުގެ މައްސަލައަށް ހައްލެއް ނާންނާނެ ކަމަށް ކުރިގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
ޖަލުތައް ފުރިފައިވުމާއި ގުޅިގެން މިއަދު އުމަރު ވިދާޅުވީ، އެކަންކަން ހައްލު ކުރުމަށްޓަކައި އާދައިގެ ކުށްވެރިން ގެންގުޅުމަށް "ޕްރިފެބް" (ރާވާލެވޭ ޖަލެއް) ޗައިނާއިން އޯޑަރު ކޮށްގެން ގެނެސްފައިވާ ކަަމަށެވެ. އަދި އިލެކްޓްރޯނިކް ޓެގް ތައާރަފްކޮށްފައިވާ ކަމަށް އުމަރު ވިދާޅުވިއެވެ.
"މި ދެ ޕްރޮޖެކްޓް ކުރިއަށްގެންގޮސް މެނުވީ ޖަލުތައް ފުރުމުގެ މައްސަލަ ހައްލު ނުކުރެވޭނެ". އުމަރު ވިދާޅުވިއެވެ.
އޭނާ ވިދާޅުވީ، އެހެނިހެން ގައުމުތަކިގައިވެސް އެކަން ކުރަނީ މިގޮތަށް ކަމަށެވެ.
އުމަރު މިގޮތަށް ވިދާޅުވިއިރު، މިހާރުގެ ހޯމް މިނިސްޓަރ ޝައިޙް އިމްރާން އަބްދުﷲ ވިދާޅުވީ، 2020 ވަނަ އަހަރު ނިމުމުން ކުރިން ޖަލުތައް ފުރުމުގެ މައްސަލައަށް ހައްލު ހޯދާނެ ކަަމަށެވެ.
މޯލްޑިވްސް ކަރެކްޝަނަލް ސާވިސް އިން ގައިދީން ބަންދުކުރާ ޖަލުތައް ފުރި، އިތުރު ކުށްވެރިން ޖަލަށް ލެވޭނެ ގޮތެއް ނެތް ކަމަށް ކަރެކްޝަނުން ފުލުހުންނަަށް ވަނީ އަންގާފައެވެ.
ފުލުހުން ރޭ ވިދާޅުވީ ކަރެކްޝަނަލް ސާވިސަސް އާ ހަވާލުކުރަން ޖެހޭ 58 ގައިދީން މިވަގުތު ދޫނިދޫ ޖަލުގައި އެބަތިބި ކަމަށާއި އޭގެ ތެރެއިން 50 މީހުންނަކީ ހުކުމް ތަންފީޒުކުރަން ހަވާލު ކުރަން ޖެހޭ މީހުން ކަމަށެވެ.