މަޖިލީހުން ގެންދަނީ ސަރުކާރުގެ ބާރުތަކުގެ ތެރެއަށް ވަދެ ބައެއް ބާރުތައް މަޖިލީހަށް ބަދަލުކުރަމުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު މިހެން ވިދާޅުވީ، ރައްޔިތުންގެ މަޖިލީހުން ނަގާ ވޯޓަކުން ކައުސިލަރުންނާއި މޭޔަރުން، މަގާމުން ވަކިކުރެވޭ ގޮތަށް ލާމަރުކަޒީ ގާނޫނަށް މަޖިލީހުގެ ލާމަރުކަޒީ ކޮމިޓީން އިސްލާހު ގެނައުމުން މިއަދު ކުރެއްވި ފޭސްބުކް ޕޯސްޓެއްގައެވެ.
އުމަރު ވިދާޅުވީ، ލޯކަލް ކައުންސިލް ތަކަކީ ސަރުކާރު ހިންގުމުގެ ފަށަލައެއް ކަމަށްވާއިރު، ކައުންސިލުތައް ޒިންމާދާރު ކުރުވާ އަދި ކައުންސިލުތަކުން ޖަވާބުދާރީވާން ޖެހޭނީ ވެސް ސަރުކާރަށް ކަމަށެވެ. އަދި ކައުންސިލަރުން، މަޖިލީހުން ވަކި ކުރެވޭ ގޮތަށް އޮތުމަކީ އެއްވެސް ގައުމެއްގައި ކަންކުރާ ގޮތް ނޫން ކަމަށް އުމަރު ވިދާޅުވެފައިވެއެވެ.
އޭނާ އިތުރަށް ވިދާޅުވީ، ރައްޔިތުންގެ މަޖިލީހުގެ އެ ނިންމުމަކީ މިސަރުކާރުގެ ތެރޭގައި "ޑަބަލް ސްޓޭޓް" ނުވަތަ ދެ ދައުލަތް އޮތްކަން ހާމަކޮށްދޭ މިސާލެއް ކަމަށެވެ.
ލާމަރުކަޒީ ގާނޫނަށް މަޖިލީހުގެ ލާމަރުކަޒީ ކޮމިޓީން ގެނައުމަށް ނިންމި އިސްލާހާއެކު ކައުންސިލުގެ ވާޖިބުތައް އަދާކުރަން ކައުންސިލަރުން ނުކުޅެދިއްޖެނަމަ އެ ކައުންސިލަށް ފިޔަވަޅު އެޅުމުގެ ބާރު ރައްޔިތުންގެ މަޖިލީހުގެ ރުހުމާއެކު ކައުންސިލުތަކުގެ ބެލެނިވެރި ފަރާތް ކަމަށްވާ ލޯކަލް ގަވަރުމަންޓު އޮތޯރިޓީ (އެލްޖީއޭ)އަށް ވަނީ ދީފައެވެ.