އިލެކްޝަންސް ކޮމިޝަންގެ މެމްބަރު ކަމުގެ މަގާމަށް ދެ ބޭފުޅަކު އައްޔަންކުރަން ރުހުން ދިނުމަށް ރައްޔިތުންގެ މަޖިލީހުން ފާސްކޮށްފި އެވެ.
މަޖިލީހުން މިއަދު ރުހުން ދިން ދެ ބޭފުޅުންނަކީ ހުޅުމާލެ އެންދެރި 7 އަހްމަދު ސުލައިމާންއާއި މ. ވޭވަށް ބުލްބުލާގޭ މުހައްމަދު ޝަކީލް އެވެ.
މި ދެ ބޭފުޅުން ރުހުންދޭން ފެންނަ ކަމަށް މަޖިލީހުގެ މިއަދުގެ ޖަލްސާގައި ވޯޓް ދެއްވީ 54 މެންބަރުންނެވެ. ނުފެންނަ ކަމަށް 16 މެންބަރުން ވޯޓް ދެއްވި އެވެ.
ސުލައިމާންއާއި ޝަކީލަށް ކޮމިޓީން މާކްސް ލިބިވަޑައިގެންނެވި ގޮތަށް ބަލާއިރު ޝަކީލަށް 86 މާކްސް އަދި ސުލައިމާނަށް 83 މާކްސް ލިބިވަޑައިގެންނެވި އެވެ. ކޮމިޓީގެ އިންޓަވިއުން ފާސްވުމަށް 75 މާކްސްއަށް ވުރެ މަތިން ހޯދަންޖެހެ އެވެ.
އިލެކްޝަންސް ކޮމިޝަންގެ މެންބަރު ކަމަށް އައްޔަންކުރުމަށް ސުލައިމާންއާއި ޝަކީލްގެ އިތުރުން އދ. މަހިބަދޫ ސަނޯރާމާގޭ ފާތިމަތު މުނާ އާއި ދަފްތަރު ނަންބަރު 1548 މުހައްމަދު ޒާހިދުގެ ނަންވެސް މަޖިލީހަށް ފޮނުއްވި އެވެ. ނަމަވެސް އެ ދެ ބޭފުޅުން ކޮމިޓީގެ އިންޓަވިއުން ފާސްވެފައެއް ނުވެ އެވެ.
ރައީސް އަބްދުﷲ ޔާމިން ވަނީ މިދިޔަ މަހު އިލެކްޝަންސް ކޮމިޝަންގެ މެންބަރު ކަމަށް ގއ. މާމެންދޫ އަލިވާގޭ އަމްޖަދު މުސްތަފާ އައްޔަންކުރައްވާފަ އެވެ.