ގެއްލިފައިވާ މިނިވަން ނޫހުގެ ނޫސްވެރިޔާ އަޙްމަދު ރިޟްވާނާއި މެދު ދޮގު މައުލޫމާތު ފަތުރަމުންދާކަމަށްބުނެ، ކުރީގެ ހޯމް މިނިސްޓަރ އުމަރު ނަޞީރާއި ދެކޮޅަށް ދަޢުވާކުރާނެކަމަށް ރިޟްވާންގެ ދައްތަ ފާތިމަތު ޝެހެނާޒް ބުނެފިއެވެ.
ދާދިފަހުން "ސަންގު ޓީވީ"ގެ ޕްރޮގްރާމެއްގައި ވާހަކަ ދައްކަވަމުން އުމަރު ވަނީ، ރިޟްވާން ނޫސްވެރިއަކަށްވުމުގެ ކުރިން އުޅުނީ "ޑޮޓު" ޖަމާޢަތުގެ މީހެެއްގެ ގޮތުގައިކަމަށް ވިދާޅުވެފައެވެ. އަދި ރިޟްވާން އެ ޖަމާއަތުގައި އެކު މަސައްކަތްކޮށް، ތުނބުޅި ދިގުކޮށްގެން ބޮލުގައި ފޮށާ އޮޅައިގެން އުޅުނުކަމަށްވެސް އެބޭފުޅާ ވިދާޅުވިއެވެ. އަދި އެ ޖަމާއަތުން ވަކިވެގެން މިނިވަން ނޫހަށްގޮސް، އެ ޖަމާއަތުގެ މީހުންނާއި "ސެކިއުލަރ ފިކުރުގައި" ދިމާކުރިކަމަށްވެސް އުމަރު ވަނީ ވިދާޅުވެފައެވެ.
އަދި އެކަމުގެ ސަބަބުން ދެފަރާތުގެ މެދުގައި "ކޯޅުމަކަށް" ދިޔަކަމަށް ކުރީގެ ހޯމް މިނިސްޓަރ ވިދާޅުވިއެވެ. އުމަރަކީ ރިޟްވާން ގެއްލުނުއިރު، ހޯމް މިނިސްޓަރަށް ހުރި ބޭފުޅާއެވެ.
އެ ވާހަކަތަކަށް ރައްދުދެމުން ރިޟްވާންގެ ދައްތަ ފާތިމަތު ޝެހެނާޒް ކުރި ޓްވީޓެއްގައި ބުނީ އުމަރަކީ ރިޟްވާން ގެއްލުވާލާފައިވާ ލަދެއްނެތް ދޮގުވެރިއެއްކަމަށެވެ. އަދި ރިޟްވާނާއި މެދު ދޮގު މައުލޫމާތުތަކެއް ފެތުރީތީ އުމަރު ނަޞީރާއި ދެކޮޅަށް ދައުވާކުރުމަށް ޤާނޫނީ އެހީތެރިކަން ހޯދަމުންދާކަމަށް ޝެހެނާޒް ވަނީ ބުނެފައެވެ.
އޭނާ އިތުރަށް ބުނީ ކުޑަ ދުވަސްކޮޅެއްވަންދެން ހަރުކަށި ވިސްނުމުގެ ގްރޫޕަކާއި ގުޅުން އޮތްކަމަށާއި، ނަމަވެސް އުމަރު ބުނެފައިވާ ގޮތަށް ރިޟްވާން އަމަލުކޮށްފައި ނުވާކަމަށެވެ. އަދި ރިޟްވާނަށް އެމީހުންގެ ވިސްނުން ހުރިގޮތް އެނގުމުން ގްރޫޕް ދޫކޮށް ދިޔަކަމަށްވެސް ޝެހެނާޒް ވަނީ ފާހަގަކޮށްފައެވެ.
މީގެކުރިން މަރުތަކާބެހޭ ކޮމިޝަނުން ހާމަކުރިގޮތުގައި ރިޟްވާން ދިރިއުޅޭ ގެކައިރިން އޭނައަށް ވަޅިން ބިރު ދައްކައިގެން ގަދަކަމުން ކާރަކަށް އެރުވުމަށްފަހު އޭނާ ވަނީ ދޯންޏަކަށް ގެންގޮސްފައެވެ. މި ދޯނީގައި އޭނާ މަރާލުމަށްފަހު ކަނޑުފެެއްތިކަމަށްވެސް އެ ކޮމިޝަނުން ވަނީ ހެކިވެރިއަކާއި ހަވާލާދީ ބުނެފައެވެ. ނަމަވެސް މި ހެކިބަހުގައި ފުށުއެރުންތަކެއް ހުރިކަމަށް އެ ކޮމިޝަނުން ވަނީ ފާހަގަކޮށްފައެވެ.
ފޮޓޯ: މިހާރު