މާލޭ ސިޓީ ކަރަންޓްގެ ޙިދުމަތް މިހާރަށްވުރެ ފުޅާކުރުމަށްޓަކައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އިތުރު ޖަނަރޭޓަރެއް ގެނެސްފިއެވެ.
ސްޓެލްކޯއިން އަލަށް ގެނައި 8.9 މެގަވޯޓްގެ މި އާ ޖަނަރޭޓަރާއެކު ކަރަންޓްގެ ކެޕޭސިޓީ 72.9 އަކަށް އިތުރުވާއިރު އެންމެ ގިނައިން މާލޭގައި ކަރަންޓް ބޭނުންކުރާ ވަގުތުތަކުގައި 54 ކިލޯވޯޓް ބޭނުންވާ ކަމަށް ސްޓެލްކޯއިން މަޢުލޫމާތުދެއެވެ.
މާލެއަށް އާ ޖަނަރޭޓާރެއް ގެނައުމާއި ގުޅިގެން ސްޓެލްކޯއިން ބުނީ، މިއީ މާލޭގައި އިމާރާތްތައް ގިނަވެ ދުވަހެއް ދުވަހަކަށް ބޭނުންކުރާ ކަރަންޓްގެ މިންވަރު އިތުރުވަމުންދާތީ ކެޕޭސިޓީ އިތުރުކުރުމުގެ ބޭނުމުގައި ގެނެވުނު ޖަނަރޭޓަރެއް ކަމަށެވެ.
މި ޖަނަރޭޓަރު އިންސްޓޯލްކޮށް އަންނަ އޭޕްރީލްމަހު ބޭނުންކުރަން ފެށޭވަރުވާނެ ކަމަށް ސްޓެލްކޯއިން ލަފާކުރާއިރު އާ ޖަނަރޭޓަރުގެ ސަބަބުން އިންޖީންތަކުގެ މަސައްކަތްކުރުމަށްވެސް ފަސޭހަ ވެގެންދާނެ ކަމަށް އެފަރާތުން ޤަބޫލުކުރެއެވެ.