ކަރަންޓު ބިލުތަކުގައި ރޯދައަށް ދިން ޑިސްކައުންޓު ހިމެނުމާއެކުވެސް ބިލުތައް ބޮޑުވެގެން ދިޔަ އެއް ސަބަބަކީ ހޫނު މޫސުމާއި ދިމާވުމުން ކަރަންޓު ބޭނުންކުރި މިންވަރު އިތުރުވުމުން ކަމުގައި ސްޓެލްކޯއިން ބުނެފިއެވެ.
ޑިސް ކައުންޓާއެކުވެސް ކަރަންޓު ބިލުތައް ބޮޑުވެގެން ދިއުމާއެކު ގިނަ ބަޔަކު ވަނީ ސޯޝަލް މީޑިއާގައި ހިންހަމަނުޖެހުން ފާޅުކޮށްފައެވެ. މިކަމާ ގުޅިގެން ސްޓެލްކޯގެ މީޑިއާ އޮފިޝަލް އަހުމަދު މުހައްމަދު ވިދާޅުވީ ކަރަންޓް ބިލްތައް ބޮޑުވީ ރޯދަ މަހާއި ހޫނު ދުވަސްވަރު ދިމާވުމުންކަމަށާއި، ނަމަވެސް މިދިޔަ އަހަރުގެ ރޯދަ މަހަށްވުރެ މި އަހަރު ޕީކް ކުޑަވި ކަމަށެވެ.
އަހުމަދު މުހައްމަދު ވިދާޅުވީ ރޯދަމަހުގެ ބިލްތަކުގައި ޑިސްކައުންޓު ހިމެނިފައިވަނީ މިދިޔަ އަހަރުގެ އެންމެ ހޫނު 3 މަސްދުވަސް، ފެބްރުއަރީ، މާޗް އަދި އެޕްރީލް އުނި ކުރުމަށްފަހު ބާކީ 9 މަސް ދުވަހުގެ އެވްރެޖެއް ހަދާ އެ އެވްރެޖަށް ވުރެ ބޮޑު ނުވާނެ ހެން ކަމަށެވެ.
ކޮންމެ ރޯދަ މަހަކު ވެސް ކަރަންޓު ބޭނުންކުރާ މިންވަރު އިތުރު ވާނެ ކަމަށާއި، ހާއްސަކޮށް ހޫނު މޫސުމާއެކު ރޯދަ މަސް އައިސްފިނަމަ ބިލުތައް މީގެކުރިންވެސް ބޮޑުވެގެން ދާ ކަމަށް އޭނާ ވަނީ ވިދާޅުވެފައެވެ.
ފާހަގަކޮށްލެވޭ ގޮތުގައި ރޯދަމަހުގެ ކުރިން ބިލް ނުކުރެވިހުރި ދުވަސްތަކަށް ބިލް ކުރުމަށްޓަކައި، ސްޓެލްކޯގެ އެންމެ އިސްވެރިން ހިމެނޭހެން 350 އަށްވުރެ ގިނަ މުވައްޒަފުން ވަނީ ރޯދައިގެ ކުރިން ނިކުމެ ރީޑިންތައް ނަގާފައެވެ. އަދި މި ރީޑިން ހިމަނައިގެން ތައްޔާރުކުރާ ބިލްތައް ދެއްކުމަށް 30 ދުވަހުގެ މުއްދަތެއް ދޭނެ ކަމަށް އެ ކުންފުނިން ވަނީ ބުނެފައެވެ.