އެންވަޔަރަމަންޓް މިނިސްޓްރީގެ 'އެންދެރި' މަޝްރޫއުގެ ދަށުން ހިންގަން ހަމަޖެހިފައިވާ ބޭސިކް ރޭންޖާސް ޓްރެއިނިން ކޯސް ތައްޔާރުކޮށް ހިންގަން ރާއްޖޭގެ ގައުމީ ޔުނިވާސިޓީ (އެމްއެންޔޫ)އާ ހަވާލުކޮށްފި އެވެ.
ވީ ކިހިނެއް؟ - މިއަދު އެމްއެންޔޫގެ އިދާރީ މަރުކަޒުގައި ބޭއްވި ރަސްމިއްޔާތެއްގައި އެކަމާ ގުޅޭ އެއްބަސްވުމުގައި ސޮއިކުރެއްވީ:
އެންވަޔަރަމަންޓް މިނިސްޓްރީގެ ޑިރެކްޓާ ޖެނެރަލް މުހައްމަދު ޒާހިރު
އެމްއެންޔޫގެ ވައިސް ޗާންސެލަރު އައިޝަތު ޝެހެނާޒް އާދަމް
ތަފްސީލު - އެ އެއްބަސްވުމުގެ ދަށުން ތިމާވެށި އެންމެ އެކަށީގެންވާ ގޮތުގައި ބަލަހައްޓައި، މުސްތަގްބަލުގެ ޖީލުތަކަށް ފޯރުކޮށްދިނުމަށްޓަކައި މީހުން ބިނާ ކުރުމަށް ވަނީ ހަމަޖެހިފަ އެވެ. އެކަން ކުރަނީ އަސާސީ ރޭންޖާ ތަމްރީން ކޯހެއް ހިންގައިގެންނެވެ.
"މިއީ ހިމާޔަތްކޮށް، ރައްކާތެރިކޮށްފައިވާ ސަރަހައްދުތަކުގައި މަސައްކަތްކުރާ ރޭންޖަރުންނަށް ކަނޑާއި އެއްގަމުގެ ވެށިތައް ހަރުދަނާކަމާ އެކު ބެލެހެއްޓުމާއި މެނޭޖު ކުރުމާއި އަދި ދެމެހެއްޓެނިވި ގޮތެއްގައި ތަރައްގީކުރުމަށް ބޭނުންވާ ހުނަރުތަކާއި މައުލޫމާތާއި އަދި ގަާބިލުކަން ދިނުމަށްޓަކައި ފުރިހަމަ ތަމްރީނު ޕްރޮގްރާމެއް އެކުލަވާލުމަށެވެ،" އެމްއެންޔޫގެ ބަޔާނުގައިވެ އެވެ.
އެ ކޯހުގައި ހިމެނޭ މޮޑިއުލްތަކުން ގާބިލުކަން އިތުރުވާނެ ކަންކަމުގެ ތެރޭގައި:
ތިމާވެށީގެ ގަވާއިދުތައް ބެލެހެއްޓުމާއި ތަންފީޒުކުރުން
ސައިންޓިފިކް މޮނީޓަރިން ހިންގުން
ރަށްރަށުގެ މުޖުތަމައުތަކާ އެކު މުއާމަލާތްކުރުން
ކުއްލި ހާލަތްތަކަށް އިޖާބަ ދިނުމުގައި ރޭންޖަރުންގެ ގާބިލުކަން އިތުރުކުރުން
އެ މަޝްރޫއު ކުރިއަށްގެންދާނީ، އެމްއެންޔޫއިން ބުނި ގޮތުގައި ލ. އަތޮޅުގަ އެވެ.