'ބޯހިޔާވަހިކަން އެންމެންނަށް ސްކީމު'ގެ ދަށުން ބޯހިޔާވަހިކަން ދިނުުމުގައި އިސްކަން ދޭ ކެޓަގަރީގައި ހިމެނޭ، އެކި އިދާރާތަކާއި މުވައްސަސާތަކުގެ ފްލެޓު ލިބުމަށް ފަހު، އެ އިދާރާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރަން އެއްބަސްވާން ޖެހޭ ގޮތަށް، އެ ކެޓަގަރީގެ ޝަރުތުތައް އިސްލާހުކޮށް މިއަދު އާންމުކޮށްފި އެވެ.
ވީ ކިހިނެއް؟ - މި ސްކީމުގެ ދަށުން 18 އަހަރުން މަތީ ކޮންމެ ރައްޔިތަކަށް ބޯހިޔާވަހިކަން ފޯރުކޮށްދިނުމަށް، ފްލެޓާއި ގޯއްޗަށް ކުރިމަތިލާން މިދިޔަ 28 ޑިސެމްބަރުގައި ވަނީ ހުޅުވާލައިފަ އެވެ. 
'މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުސޫލު'ގެ ދަށުން ބޯހިޔާވަހިކަން ފޯރުކޮށްދިނުމުގައި ހާއްސަ އިސްކަންދޭ ކެޓަގަރީތަކެއް ކަނޑައެޅި އެވެ. އޭގެ ތެރޭގައި ހައުސިން މިނިސްޓްރީން ކަނޑައަޅާ ދައުލަތުގެ އިދާރާތަކާއި މުވައްސަސާތައް ހިމެނެ އެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ވަނީ، އެ އިދާރާތަކުގެ ތަފްސީލާއި ކޮންމެ ކެޓަގަރީއަކަށް ދޫކުރަން ކަނޑައަޅާފައިވާ ފުލެޓުގެ އަދަދު ވެސް އާންމުކޮށްފަ އެވެ.
މި ކެޓަގަރީތަކަށް އެދި ހުށަހަޅާއިރު، ފްލެޓު ދޫކުރުމުގެ އުސޫލުގައިވާ ޝަރުތުތަކުގެ އިތުރުން ފުރިހަމަވާން ޖެހޭ ޝަރުތުތައް އިސްލާހުކުރި އެވެ.
ތަފްސީލް - އިސްލާހުކޮށްފައިވާ ޝަރުތުގައިވާ ގޮތުން، މި ކެޓަގަރީއަށް ހުށަހެޅޭނީ މާލޭގައި އާއިލާ ބިނާކޮށްފައިވާ، އަދި އެ އިދާރާއެއް ނުވަތަ މުވައްސަސާއެއްގައި މަދުވެގެން މެދުނުކެނޑި އެއް އަހަރު ފުލް ޓައިމް ވަޒީފާ އަދާކޮށްފައިވާ ނަމަ އެވެ.
ބޯހިޔާވަހިކަން ހަވާލުކުރާ ތާރީހުން ފެށިގެން އެމީހަކު މަސައްކަތްކުރާ ތަނަކުން ކަނޑައަޅާ ގޮތެއްގެ މަތިން ވަޒީފާ އަދާކުރަން އެއްބަސްވާން ޖެހޭނެ ކަމަށް ވެސް ޝަރުތުގައިވެ އެވެ.
މި އިއުލާންގައިވާ ގޮތުން، ހާއްސަ އިސްކަމެއްދޭ ކެޓަގަރީގެ ފްލެޓުތަކުން، ދައުލަތުގެ އިދާރާތަކާއި މުވައްސަސާތަކަށް  1،000 ފްލެޓު ދޭނެ އެވެ. 
އޭގެ ތެރެއިން 600 ފްލެޓު ހާއްސަކޮށްފައިވަނީ:
ޖުޑިޝަރީގެ މުވައްޒަފުން - 100 ފްލެޓު
ފުލުހުން - 100 ފްލެޓު
އެމްއެންޑީއެފް - 100 ފްލެޓު
ސިވިލް ސާވިސްގެ މުވައްޒަފުން - 200 ފްލެޓު 
ކަރެކްޝަންސް ސާވިސް - 100 ފްލެޓު
ބާކީ 400 ފްލެޓު ހާއްސަކޮށްފައިވަނީ:
ރައީސް އޮފީސް (މުލިއާގޭ އަދި ހިލާލީގޭގެ މުވައްޒަފުން ހިމެނޭ ގޮތަށް)
ރައްޔިތުންގެ މަޖިލީހުގެ އިދާރާ 
އެޓާނީ ޖެނަރަލްގެ އޮފީސް 
ފޮރިން ސާވިސް 
ޖުޑިޝަލް ސާވިސް ކޮމިޝަން (ޖޭއެސްސީ)
އިލެކްޝަންސް ކޮމިޝަން (އީސީ)
ސިވިލް ސާވިސް ކޮމިޝަން
ހިއުމަން ރައިޓްސް ކޮމިޝަން (އެޗްއާރުސީއެމް) 
އެންޓި ކޮރަޕްޝަން ކޮމިޝަން (އޭސީސީ)
އޮޑިޓާ ޖެނަރަލްގެ އޮފީސް
ޕްރޮސެކިއުޓާ ޖެނަރަލްގެ އޮފީސް 
މޯލްޑިވްސް މަނިޓަރީ އޮތޯރަޓީ (އެމްއެމްއޭ) 
މޯލްޑިވްސް އިންލެންޑް ރެވެނިއު އޮތޯރަޓީ (މީރާ) 
ޕެންޝަން އޮފީސް 
ނޭޝަނަލް އިންޓެގްރިޓީ ކޮމިޝަން 
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން 
ފެމިލީ ޕްރޮޓެކްޝަން އޮތޯރިޓީ 
ނޭޝަނަލް ޑިޒާސްޓާ މެނޭޖްމަންޓް 
ޗިލްޑްރަންސް އޮމްބަޑްސް ޕާސަންގެ އޮފީސް 
ވަޒީފާއާ ބެހޭ ޓްރައިބިއުނަލް 
ލޯކަލް ގަވާމަންޓް އޮތޯރިޓީ (އެލްޖީއޭ) 
ޓެކްސް އެޕީލް ޓްރައިބިއުނަލް 
ސިވިލް އޭވިއޭޝަން އޮތޯރިޓީ 
ކެޕިޓަލް މާކެޓް ޑިވެލޮޕްމަންޓް އޮތޯރިޓީ 
މިނިސްޓްރީން ބުނީ މިއިން ކޮންމެ އިދާރާއަކަށް ފުލެޓްތައް ލިބޭ މީހުން ކަނޑައަޅާނީ، ފުލެޓަށް ޝަރުތު ހަމަވާ މީހުންގެ ތެރެއިން އެ އިދާރާއަކުން ހަދާ އުސޫލެއްގެ މަތިން ކަމަށެވެ.