އެމެރިކާއިން ⁠އީރާނާ ދެކޮޅަށް ހިންގާ އަސްކަރީ އޮޕަރޭޝަންތަކުގެ ސަބަބުން "ނިމުމެއް ނެތް ހަނގުރާމައެއް" ނުހިނގާނެ ކަމަށާއި، އަމާޒަކީ އީރާނުގެ މިސައިލްތަކާއި ⁠ކަނޑުގެ ސިފައިންނާއި އެހެނިހެން ސަލާމަތީ އިންފްރާސްޓްރަކްޗާތައް ނައްތާލުން ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތް ވިދާޅުވެއްޖެއެވެ. އެމެރިކާއާއި އިސްރާއިލު ގުޅިގެން މިދިޔަ ހޮނިހިރު ދުވަހު އީރާނަށް ދޭން ފެށި ހަމަލާތަކާ ގުޅިގެން ބޭއްވި ނޫސްވެރިންގެ ބައްދަލުވުމުގައި ހެގްސެތް ވިދާޅުވީ އީރާނާ ދެކޮޅަށް ކުރާ ހަނގުރާމައަކީ އިރާގުގައި އެތައް އަހަރެއް ވަންދެން އެމެރިކާއިން ކުރި ހަނގުރާމައާ އެއްގޮތް ހަނގުރާމައެއް ނޫން ކަމަށް ވިދާޅުވެފައެވެ. އެގޮތުން، އީރާނުގައި ހިންގާ އޮޕަރޭޝަނަކީ އެ ގައުމުގައި ޑިމޮކްރަސީ ބިނާކުރުމަށް ކުރި މަސައްކަތެއް ނޫން ކަމަށް އޭނާ ވިދާޅުވިއެވެ. އެ ބައްދަލުވުމުގައި އެމެރިކާގެ ޖެނެރަލް ⁠ޖޮއިންޓް ޗީފްސް އޮފް ސްޓާފްގެ ޗެއާމަން ޑޭން ކޭން ވިދާޅުވީ، އީރާނުގައި އެމެރިކާގެ އަސްކަރީ މަގްސަދުތައް ހާސިލު ކުރުމަށް ވަގުުތު ނަގާނެ ކަމަށާއި، އެމެރިކާއަށް އިތުރު ގެއްލުންތަކެއް ލިބޭނެ ކަމަށް ލަފާކުރެވޭ ކަމަށެވެ. އެމެރިކާގެ އަސްކަރީ މަގުސަދުތައް ހާސިލް ކުރަން ބޭނުން ނަމަ ހަތަރު ހަފުތާ އާއި ފަސް ހަފުތާ ވަންދެން އޮޕަރޭޝަންތައް ކުރިއަށް ގެންދެވިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕްވެސް މީގެކުރިން ވަނީ ވިދާޅުވެފައެވެ. ހަނގުރާމަ ފެށީ އެމެރިކާއިން ނޫން ކަމަށާއި ނަމަވެސް ނިންމާނީ އެމެރިކާއިން ކަމަށްވެސް ހެގްސެތް ވިދާޅުވިއެވެ. ހެގްސެތް ވަނީ މިވަގުތު އީރާނުގައި އެމެރިކާގެ ސިފައިން ނެތް ކަމަށް ތަކުރާރުކޮށް ވިދާޅުވެފައެވެ. ނަމަވެސް ކުރިއަށް އޮތްތަނުގައި އަޅާނެ ފިޔަވަޅުތަކާ ގުޅޭގޮތުން އެއްޗެއް ވިދާޅެއްނުވެއެވެ. އެމެރިކާއިން އިރާގަށް އަރައިގަނެ، ހަނގުރާމައެއް ފެށީ އަލްގައިދާއިން ސެޕްޓެމްބަރު 11، 2001ގައި އެ ގައުމަށް ދިން ހަމަލާތަކަކާ ގުޅިގެން ޓެރަރިޒަމާ ދެކޮޅަށް ފެށި އޮޕަރޭޝަނެއްގެ ތެރެއިންނެވެ. އަދި އިރާގުން ނުރައްކާތެރި ހަތިޔާރު ގެންގުޅޭ ކަމުގެ ދޮގު ތުހުމަތުކޮށް، އޭރުގެ ސައްދާމް ހުސައިންގެ ވެރިކަން ވައްޓާލިއެވެ. އެ ވެރިކަން ބަދަލުކުރުމަށް ފަހު ވެސް އެމެރިކާގެ ފައުޖުތަކުން އިރާގު ދޫކޮށް ދިޔުމަށް ދެކޮޅު ހަދައި، އެ ސަރަހައްދުގައި ހަނގުރާމަ ކުރިއަށްގެންދިޔައެވެ. އަދި އިރާގުގައި ފެށި މިޝަން ރަސްމީކޮށް ނިންމާލިކަން އިއުލާންކުރީ 2021ގައި ކަމަށްވާއިރު، އިރާގު ހަނގުރާމައިގައި މަރުވި މީހުންގެ އަދަދު 150،000އާއި އެއް މިލިއަނާ ދޭތެރޭގެ އަދަދަކަށް އަރާނެ ކަމަށް ރިޕޯޓުތަކުގައިވެއެވެ. އެމެރިކާއާއި އިސްރާއީލުން އީރާނަށް ދެމުން އަންނަ ހަމަލާތަކުގައި މިދިޔަ ހޮނިހިރު ވަނީ އެ ގައުމުގައި 1989އިން ފެށިގެން ރޫހީ ލީޑަރުކަން ކުރައްވާފައިވާ އާޔަތުﷲ އަލީ ޚާމަނާއީ އަވަހާރަކޮށްލައިފައެވެ.